Ebre 6

1Dene poan, da bahɛ ya te to ana wo kɔma kelom zameha yelese'a te to pon sone te to zaŋɛ ne. To pon zamehe ya yɛhera to sakerɛ Na'ayenɛ yelehom la poan ge da kɔ'ɔn tɛn'ɛha te yelesoma n wan ta'an fan' tɔ bahɛ, 2la pa'aleseko n tɔgɔre yɛhera ko'om soa yɛla la, ban ne dekɛ nu'uhe pagalɛ nɛreba zuto se'em, la nɛreba n wan vo'e ba kum poan se'em, la teŋa ba'ahegɔ daarɛ la Yenɛ n ta yeti a gankɛ nɛreba se'em. 3Ge nananawa, Na'ayenɛ paŋa poan, to wan teregɛ tole nɛŋa. 4Ge nɛresɛba n pon dɔla Yesu sore kan ta'an lebe na pin'ilom dɔla dɛ, ban tabelɛ pon nyɛ' Na'ayenɛ nɛɛhom la mɛ ge mɛ to'e faanrɛ, la ban to'e Na'ayenɛ Sea, 5la mina te Na'ayenɛ yelehom la ane soŋa, ge me mina ba potɛn'ya poan soŋa soŋa sɛla n wan eŋɛ teŋa ba'ahegɔ daarɛ la. 6Te ba han mina dena wa woo ge sina ge kelom lebe pooren, ba wan le eŋɛ la wane ta'an le lebe dɔla Yesu? Ba kan le nyaŋɛ. Se'ere n sɔe la, la wan ana wo ba le maan kpa'ara Na'ayenɛ Dayɔa la punpuuredɔɔ zuo la me yɛ'ɛha la ge me le tara vi' kɛn'ɛhe en nɛrekooŋɔ poan. 7Nɛra se'em n zo'ore Yesu sore dɔlɔga la poan, Na'ayenɛ wan kan' kan'somɔ bo en wo saa magaha niira va'am ge va'am dia la wan maalɛ te a daana nyɛ' yɔɔrɔ de poan. 8Ge va'am la han ka wom disoŋa ge ton yehe mɛ la gɔn'ɔhe la mɔɔrɔ ma'an, va'amdaana la wan nyɔ' kɔ la bugum. 9N sɔɔnrɔ wa, la ton pon tɔgɔra wana wa, mam mi' soŋa soŋa te yetɔgɔbɔna wa ka lagom tɔgɔra bɔ'ɔra la yamam me. To mi' te ya nyɛ' faanrɛ. 10Ge Na'ayenɛ yelemɛŋɛrɛdaana ge a mi' te ya daa soŋɛ ya sɔɔnrɔ ge kelom soŋora ba yan eŋɛ dena wa pa'alɛ mɛ te ya nɔŋɛ ba la Na'ayenɛ zuo. 11Dene poan to kɔ'ɔn bɔta to suunre poan te ya zan'an kpeŋe ya mɛhe ge sɛ' ze'ele soŋa soŋa gura ba'ahegɔ. Bala, te ya wan nyɛ' sɛla te ya sakɛ ya sunya poan gura la wan de'a sera. 12To ka bote ya dɛna zinyangarɛdoma. Ge, to bote ya toon ana wo nɛresɛba n sakɛ bo Yesu ge din'inhe suunre se'em la. Yamam ane bala la zuo te ya wan nyɛ' sɛla te Na'ayenɛ biŋe a nɔɔrɛ te a eŋɛ la. 13Na'ayenɛ n yuun da biŋe a nɔɔrɛ bo Abraham la, a yuun pɔ' mɛ te a wan seren eŋɛ sɛla te a biŋe a nɔɔrɛ te a eŋɛ la. A yuun pɔ' a mɛŋa yu'urɛ poan, se'em n ka boe gana enŋa mɛŋa la zuo. 14A yuun yeti, N wan kan' som bahɛ ho zuo te ho wi'ɛ zo'e. 15Abraham n yuun din'inhe suunre la zuo te a yuun da nyɛ' sɛla te Na'ayenɛ yuun da biŋe a nɔɔrɛ te a eŋɛ la. 16Nɛra han yeti a pɔ' pɔtɛ, a ne dekɛ la se'em n gane en yu'urɛ pɔ'. Ge te la nya dela pɔtɛ la n pa'alɛ soŋa soŋa te n yele se'em la seren dela bala, ge me ne bahɛ te nɛreba ka le tare nɔkpe'ene. 17Na'ayenɛ yuun bote a pa'alɛ Abraham yaahe te a biŋe a nɔɔrɛ bo ba te a wan eŋɛ sɛla te a yeti a eŋɛ la te ba baŋɛ soŋa soŋa te a kan tee de. Bala n sɔe, te a yuun da pɔ' pɔtɛ de poan bo Abraham la. 18Na'ayenɛ eŋɛ yele ana ayi' wa te a kan ta'an tee ayema ba poan te a pa'alɛ te enŋa n yele se'em la dagɛ ponpɔrɔŋɔ. Bala, te tosɛba n nyɛ' faanrɛ a zen'en la wan nyɛ' soŋorɛ ta sɛ' ze'ele soŋa soŋa yɛhera ton sakɛ to sunya poan gura sɛla la. 19Ton sakɛ sɛla to suunre poan gura la kan malom tee. De kɔ'ɔn bahɛ tɔ te to paɛ Na'ayenɛ zen'en wo malema daandoma keema la n kɛn' Saraa la poan. 20Te zen'kana wa poan, Yesu pon diŋɛ to yia kɛn' bini mɛ tomam zuo. Enŋa nya dela malemadaana ka tara ba'ahegɔ wo Melkizedek la.

will be added

X\