1 Malema nɛŋadaana woo yɛhere la nɛresaaleba poan. Ba loe en bala, te a sɔe ba zuo tone bɔ'ɔra Na'ayenɛ. Enŋa n wan tara bo'olom bɔ'ɔra Na'ayenɛ ge koora dunhe bɔ'ɔra en nɛreba yelebe'ero la zuo. 2 Enŋa mɛŋa me ne ta pɔ'ɛ tɔrɔgɔ yelese'ere poan mɛ. Te la de'a la dena mea zuo n sɔe te a tana sirihe a mɛŋa tona la nɛresɛba me n ne ka ta mina sɛla ge ne tue yelese'ere poan la. 3 Bala, a han yeti a ko' dunhe bo Na'ayenɛ, a ka koore bɔ'ɔra la nɛreba la yelebe'ero ma'an zuo ge a lagom koora bɔ'ɔra a mea yelebe'ero zuo mɛ. 4 Ge la dagɛ la nɛra mea n ne kɔ'ɔn behɛ loe a mɛŋa te enŋa nare a dɛna malema nɛŋadaana la. La dela Na'ayenɛ n bote nɛra te a dɛna malema nɛŋadaana te a dɛna wo n yuun bote Aron dɛna se'em la. 5 Te la de'a la boyena mea n bala te Krista daa ka kɔ'ɔn loe a mea te enŋa nare a de'a malema nɛŋadaana la. Ge, la dela Na'ayenɛ n daa ton loe en ge yele en te, Zina wa ho dela mam Dayɔa te mam mɛ dɛna ho Sɔ. 6 Na'ayenɛ daa le yele zen'an kayema a gɔŋɔ la poan yeti, Ho dela malemadaana ka tara ba'ahegɔ wo Melkizedek la. 7 Ge Yesu n daa nan bo teŋa wa zuo la, a daa sohɛ Na'ayenɛ se'em fan' en bahɛ te a kan ki'. A daa kaahɛ mɛ la nintam dena wa poan. Te en sirihe a mɛŋa ge nana Na'ayenɛ la zuo, te Na'ayenɛ kelehe en. 8 En pon dɛna Na'ayenɛ Dayɔa la, ge a sin ge kelom mina a nana n de sɛla mɛ la namehe seko woo poan te a daa nyɛ' la. 9 Te n daa ta nyaŋɛ sɛla woo zan'an zan'an yɛhera a namehegɔ la poan la, la dela ma'an te enŋa Yesu poan te sɛba woo n nane a nɔɔrɛ la wan tara vom sebo n ka tare ba'ahegɔ Na'ayenɛ zen'en la. 10 Se'ere n sɔe la, Na'ayenɛ daa pon bahɛ en mɛ te a dɛna la malema nɛŋadaana wo Melkizedek n yuun de se'em la. 11 Ge yɛla zo'e zo'e boe te to wan tɔgɛ yɛhera sɛla te n yɛta ya wa. Ge la kpe'emɛ la n tɔgɛ bo ya te ya bɔkɛ, ya ka bɔkerɛ dɛ tɔtɔ la zuo. 12 Ge la paɛ ne se'em wa sone te yamam me dene sɛba n wan pa'ale ne nɛresɛba me. Ge, bala mea zan'an, ya kelom bɔta la se'em te a pa'ala ya yelese'a n sontii te nɛra baŋɛ yia Na'ayenɛ yelehom la poan. Ya bɔkerɛ Na'ayenɛ yelehom poan ane wo se'em n seke a dita sagabɔ ge te a kelom mɔgɔra bin'ihom wo bilia la. 13 Te se'em n kelom mɔgɔra bin'ihom ma'an won te a dela bilia ka mina sɛla n de ma'an la sɛla n dagɛ ma'an. 14 Ge se'em me n sege sagabɔ dia dela bonkotɛ. Nɛra ena daana zamehɛ soŋa soŋa mina yɛleha sɛla n an soŋa la sɛla n de be'em.
