Ebre 4

1Ge nananawa Na'ayenɛ biŋe a nɔɔrɛ la bo la tomam te to ta'an kɛn' nyɛ' vo'ohogo la. Dene poan, bahɛ ya te to behɛ ha ya to mɛhe soŋa soŋa te to se'em da yehe ge ka nyaŋɛ nyɛ' vo'ohoseko te a biŋe a nɔɔrɛ bo to la. 2Te to wom yelesoma la wo bama me n yuun wom dɛ se'em la. Ge bama yuun ka nyɛ' yelesonɛ yɛhera de poan. Se'ere n sɔe la bama n yuun wom dela ba yuun ka sakɛ bo de. 3Bala, tomam sɛba n nya sakɛ bo yelesoma la n de sɛba n wan nyɛ' vo'ohoseko te Na'ayenɛ yuun biŋe nɔɔrɛ bo la wo n yuun yelese'em la. Na'ayenɛ yuun yeti, Mam pɔ' la sunsunyiim te ba kan kɛn' mam vo'ohogo poan. Ge bala ma'an la Na'ayenɛ yuun pon naam teŋa wa zuo ba'ahɛ mɛ. 4Ge zen'an kayema Yenɛ gɔŋɔ la poan tɔgɔra yɛhera dabahese'ere n de yopɔe dabaherɛ yele. La yeti, Bala dabeha ayopɔe daarɛ la a vo'ohe a tooma la woo poan mɛ. 5Ba kelom tɔgɛ yele dena wa me yɛ'ɛha te, Ba kan kɛn' mam vo'ohogo poan. 6Te nɛreba basɛba boe te Na'ayenɛ bahɛ ba te ba nyɛ' vo'ohogo la. Ge sɛba n yuun wom yelesoma yia la yuun ka nyaŋɛ nyɛ' vo'ohogo la. Se'ere n sɔe la, ba yuun ka nam sɛla te Na'ayenɛ yɛta ba la. 7Na'ayenɛ yuun yele a nɛreba te dabaherɛ kena te ba wan ta sɔna te ba nana en. De dela Zina, ge David yuun golehɛ dena wa eŋɛ Yenɛ gɔŋɔ la poan te la yue mɛ yeti, Zina ho han wom a konkore, da kanbɛ ya sunya. 8Yosua yuun ka bo nɛreba la vo'ohoseko te Na'ayenɛ yuun biŋe a nɔɔrɛ te a bo ba la. A yuun han pon bo ne ba, Na'ayenɛ kan tɔgɛ ne pooren le yɛ'ɛha yɛhera daan denɛ. 9Ge dene de se'em la, dabaherɛ kelom bɔna ha bo Na'ayenɛ nɛreba te ba nyɛ' vo'ohogo a mɛŋa tooma poan. 10Ge se'em n kɛn' bini nyɛ' vo'ohogo la wan nyɛ' vo'ohogo a tooma poan wo Na'ayenɛ n yuun nyɛ' vo'ohogo a mɛŋa tooma poan se'em la. 11Dene poan, bahɛ ya te to kpeŋe ya to mɛhe la to nyɛ' vo'ohokona wa. Te to han nyɛ' ko bala, to se'em kan lebe pooren wo bama n yuun lebe pooren se'em la. La yuun dela bama n ka nam sɛla te Na'ayenɛ yɛta ba la zuo te ba yuun lebe pooren la. 12Se'ere n sɔe Na'ayenɛ yetɔgom vɔe mɛ, ge tɛɛnha nɛreba potɛn'ɛra. Bo tare paŋa mɛ dita gana so'a n tare nɔya ayi' kɛ'ɛra paara kɔnberɛ se'em la. Bala te Na'ayenɛ yetɔgom la me mina nɛra etegɔ la a suunre n tɛn'ɛre se'em. Asaala etegɔ la a suunre n tɛn'ɛhere sɛla la, Na'ayenɛ yetɔgom me behere la bilam pa'ala hon de se'em taaba. 13Ge sɛla ka boe wan ta'an sogɛ Na'ayenɛ nɛŋa. A nyɛte ba zan'an mɛ la a nini. Te la de'a la enŋa Na'ayenɛ zen'en te tomam zan'an ta sona te to yele en sɛla te to eŋɛ. 14Dene poan, ton tare malema nɛŋadaana to zen'en se'em n kɔ'ɔn keŋɛ paɛ Na'ayenɛ nɛŋa, Na'ayenɛ Dayɔa Yesu, bahɛ ya te to sɛ' ya ze'ele mɛ kaŋkaŋɛ yɛhera sɛla te to sakɛ bo la. 15Te to malema nɛŋadaana wa dagɛ se'em n ka zote to ninbɔn'ɔn yɛhera to tɔrɔgɔ poan. Se'ere n sɔe la a daa nyɛ makere wo tomam nyɛte makere se'em la ge a ka tom be'em la fiin me. 16Dene poan, da zote ya dabeem ge wa'an ya Na'ayenɛ zo'ohogɔ zen'en la na. Te bilam te to han ta bɔta soŋorɛ, a zo'ohogɔ la a ninbɔn'zɔrɛ la wan soŋɛ tɔ.

will be added

X\