Ebre 3

1Dene poan, n sɔɔnrɔ sɛba n dole Yesu sore te Na'ayenɛ me yi' ya na wa, tɛn'ɛhɛ ya soŋa soŋa yɛhera Yesu yele. Enŋa te Na'ayenɛ tom na te a dɛna malema nɛŋadaana. 2Moses n yuun de birikina tona Na'ayenɛ yire la poan se'em la. Bala mea n bala te Yesu me dɛna birikina nare te Na'ayenɛ loe en te a tom a tooma la. 3Se'em n mɛ' yire, nɛreba pɛngere en gana yire la mea. Dene mea, Yesu me nare a tare pɛnka gana Moses. 4La dela yelemɛŋɛrɛ te nɛra n mɛte yire. Ge, Na'ayenɛ n de mɛta sɛla woo poan. 5Moses yuun de birikina mɛ tona a Yenɛ yire zan'an la poan wo yameŋa la ta yele nɛreba yelese'a te Na'ayenɛ yeti a wan eŋɛ pooren la. 6Ge Yesu Krista de birikina behere Na'ayenɛ yire poan la mɛ wo dayɔa la. To han sɛ' ze'ele soŋa soŋa ge me tara to potɛn'ɛra poan te sɛla te to sakɛ bo la dela sera, to dela Na'ayenɛ yire la. 7Dene poan wo Na'ayenɛ Sea la yeti, Zina ho han wom a konkore, 8da kanbɛ ya sunya wo yamam yuun kpere toba makɛ Yenɛ pɔgɔtia la poan ha la. 9Zen'en te ya sɔdoma ta magahɛ mam behɛ ge pon nyɛ mam eŋɛ sɛla la. Yuuma pihinaahe 10te mam suunre yehe la buuri kaŋa saŋa la. Mam yuun yeti, ba dela nɛreba te ba sunya bɔta bɔrɔgerɛ, te ba ka mina mam sɔrɔtɔ la. 11Bala te mam pɔ' la sunsunyiim yeti, ba kan kɛn' mam vo'ohogo la poan. 12Bala, n sɔɔnrɔ sɛba n dole Yesu sore wa, tare ya ya mɛhe soŋa soŋa te se'em ya poan da tara potɛn'se'ere n ba tɛn'ɛha be'em yɛla te a ka bɔta te a bire poore bo Yenɛ. 13Ge ton de ya sɛba n wan kan'ana taaba daarɛ woo wo ban yele se'em la te, Zina. Bala, te be'em da pan'ahɛ ya se'em te a toba le kpa' la Na'ayenɛ yelehom. 14Ge to han sɛ' ze'ele soŋa soŋa gura ba'ahegɔ ge me tara to potɛn'ɛra poan te ton sakɛ se'em la dela yelemɛŋɛrɛ wo ton daa pon sakɛ bo en yia saŋa la, tomam me la lagom tara tɔntɛ yɛhera sɛla te Krista eŋɛ la. 15Yenɛ gɔŋɔ la yeti, Zina ho han wom a konkore, da kanbɛ ya sunya wo yamam yuun kpere toba makɛ Yenɛ pɔgɔtia la poan ha la. 16Te nɛrebana n yuun wom Na'ayenɛ yelehom ge ŋmɛregɛ zabera la en la? Ba yuun dela nɛresɛba woo te Moses yuun tare ba yehe Egipt teŋa poan la. 17Ge te nɛrebana te Na'ayenɛ sunsunya yuun daa nyie la ba yuun pihinaahe la? La yuun dela nɛresɛba te ba yuun bɔna mɔɔ ha te ba tom be'em ki' gan'an bini ha la. 18Ge nɛrebana yɛ'ɛha te Na'ayenɛ yuun kɔ'ɔn biŋe a nɔɔrɛ yeti ba ne yuun kan nyɛ' vo'ohogo la? La yuun da dela sɛba n yuun ŋmɛregɛ zabera la en la. 19To nyɛ' te ba daa seren ka kɛn' teŋa la poan. Se'ere n sɔe la, ba daa ka sakɛ bo Na'ayenɛ.

will be added

X\