Ebre 13

1De pooren, de ya sɛba n wan tara nɔŋerɛ bɔ'ɔra taaba wo sɔɔnrɔ Krista sore dɔlɔga poan la. 2Tɛnre ya la ya tɔ'ɔha saama soŋa soŋa ya yiya poan. Te sɛba eŋɛ bala mɛ ge lagom to'e Na'ayenɛ soŋoreba ba yiya poan ge ka baŋɛ te ba dela bama. 3Da tamɛ ya sɛba te ba nyɔkɛ pagɛ la yele. Tɛnra ba yele wo ba lagom nyɔkɛ yamam me pagɛ la ba me la. Da kelom tamɛ ya sɛba me n nyɛte namehegɔ la. Tɛnre ya ba yele wo yamam me lagom nyɛta la namehe seko te ba nyɛta la. 4Ge nɛra woo sontii a bɔ'ɔra pɔgɔdire la sera ele na'ahegɔ. Sereba la pɔgɔba dɛna birikindoma la taaba. Ge Na'ayenɛ wan namehɛ sɛba n tone yalomdoma la sɛba n tone kabonhe. 5Da ba' kɔ'ɔn tɛn'ɛhe ya la ligiri ma'an yele. Tare ya popeelom la sɛla te ya nyɛ'. Se'ere n sɔe la, Na'ayenɛ yeti, N kan malom bahɛ ho, bii n zagahɛ ho. 6Dene poan, Na'ayenɛ n yele dena wa zuo, to ta'an yeti, Na'ayenɛ n soŋore mam, mam kan zɔta dabeem asaala ete mam la bem? 7Da tamɛ ya kpɛ'ɛndoma n daa tɔgɛ Na'ayenɛ yetɔgom bo ya la yele. Tɛn'ɛhɛ ya behɛ yelese'a te ba daa nyɛ' ba bɔŋa poan ge daa wa ki' la ya tɔgɔhɛ ban daa nam Na'ayenɛ se'em wa. 8Yesu Krista n zam de se'em la dela bala mea zina ge wan kelom dɛna la bala mea wuuha! 9Ge da bahɛ ya te nɛresɛba n pa'ale pa'aleyooro bahɛ ya te ya ka dɔla pa'aleseko n de yelemɛŋɛrɛ wa. Te la an soŋa te to to'e paŋa Na'ayenɛ zen'en yɛhera a som la poan ge dagɛ to to'e de doohe la dia kihiga poan. Ge nɛresɛba n yuun dole dia kiha ana taaba yuun ka nyɛ' soŋore a poan. 10To tara la kaanbegɔ zen'an te malemadoma sɛba n tone Sogorɛ la poan ka tara sore te ba lagom di'. 11Malema nɛŋadaana la ne tare la dunhe ziim wa'an toolom zen'an ge ba duuhe nɛreba be'em la zuo, ge duŋse'ehe te ba kɔrom bala la, ba ne tare ba yehe yeŋa ta nyɔ' ba la bugum. 12Te la dela dene mea zuo te Yesu me daa ki' la yeŋa ge dagɛ teŋa la poan te duuhe nɛreba be'em la a ziim la. 13Dene poan, bahɛ te to lagom yehe ya yeŋa te to ta lagom nyɛ' visebo te a nyɛ' la. 14Se'ere n sɔe la, teŋa ka boe teŋa wa zuo bo to te to bɔna bini wuuha. To kelom behera la teŋsɛka n bo saazuo ha te to ta yete to bɔna bini ba'ahegɔ la. 15Bala, bahɛ te to dekɛ pɛnka te la dɛna kaanbegɔ bo Na'ayenɛ daarɛ woo doohe la Yesu n eŋɛ se'em la. To bo'ore bo'olom bona wa la tomam n yi'ire en Daana la. 16De ya sɛba n wan eta yelesoma ge me soŋora taaba. Se'ere n sɔe la, yele ana wa ane wo kaanbegɔ bo'olom bo Na'ayenɛ te la eŋɛ a suunre nyɛlom la. 17Nana ya kpɛ'ɛndoma ge eta sɛla te ba yele ya te ya eŋɛ. Ba gu'ure ya soŋa soŋa ka vɔ'ɔha te ba mi' te Na'ayenɛ wan ta soke ba yɛhera ban gu'ure se'em. Ya han nana ba, ba na tona ba tooma mea la popeelom ge han dagana bala, ba wan tona la sunsagaŋɔ. Bala me ya kan nyɛ' soŋorɛ de poan. 18Tɛnre ya la ya kɔ'ɔn po'oha bɔ'ɔra tɔ. To mɛhe mi' soŋa soŋa te to ka tɛn'ɛhe potɛn'ɛra ayi' ayi' te to bote to tona sɛla n de ma'an yelese'ere woo poan. 19Ge n bene ya mɛ te ya po'ohɛ te Na'ayenɛ bahɛ mam te n da yuue ge lebe ya zen'en na. 20Na'ayenɛ bahɛ te to Daana Yesu vo'e a kum la poan te magahɛ wo duŋkeensoŋa n behere peehe se'em la, bala mea te enŋa Yesu me de'a to duŋkeense'em n gane zan'an zan'an behera tɔ ge la dela en ki' la zuo te nɔbiŋpaale se'ere n ka tare de malom tee la bɔna wuuha. Na'ayenɛ se'em n bo'ore sunma'ahom la, 21wan bo ya yelese'ere woo n an soŋa te ya nara te ya nyɛ' dɛ la ya ta'an tom a tooma. Yesu Krista poan, a me wan eŋɛ tɔ sɛla n ete a suunre nyɛlom ge Krista wan nyɛ' pɛnka wuuha. Taarɛ. 22Ge n sɔɔnrɔ, n bene ya mɛ te ya ma'ɛn ya mɛŋa ge kelehe n yetɔgom sebo n wan soŋɛ ya wa. Te gɔŋseko te n golehɛ bo ya wa dagɛ gɔŋwoko. 23N bote ya mina te to sɔɔn Timoti yehe pakadeen la na. A han ka yuue ge wa'an na, ge te n ta yɛ'a na te n behɛ ya, n wan doohe la en wa'ana. 24Po'ohɛ ya kpɛ'ɛndoma la woo la Yenɛ nɛreba la woo bo to. Ge to sɔɔnrɔ sɛba n de Italidoma po'ohere ya na. 25Na'ayenɛ wan eŋɛ ya zan'an som.

will be added

X\