Ebre 12

1Dene poan, to nyɛ' te nɛreba zo'e zo'e pon bɔna bahɛ te to mina te la sontii to nam Na'ayenɛ n yele se'em la. Bala dena wa zuo, bahɛ te to ana wo nɛreba n zote zoa la ge bahɛ yelese'a woo n wan gu' to la be'em n bobe to kaŋkaŋɛ la. Ge, ton bahɛ ya te to zɔ' ya to zɔsɛka te Na'ayenɛ yele to zɔ' la ge da go'e ya zoa. 2Bahɛ ya te to potɛn'ɛra kɔ'ɔn tɛn'ɛhe ya la Yesu yele ma'an. Enŋa n de se'em te to nam pin'ileŋɔ poan na tare yɛ'a ba'ahegɔ poan. A daa ka le vihe lebe pooren punpuuredɔɔ la zuo. A ka tɛn'ɛhe valom yele n daa ta yeti a ki' punpuuredɔɔ zuo la. Se'ere n sɔe la, a mi' te a wan ta tara popeelom pooren. Te nananawa a zin' la Na'ayenɛ na'am gɔŋɔ la zuɔ nu'o. 3Behɛ ya en daa nyɛ' yelese'a a bɔŋa poan, yelebe'erodoma n tom en sɛla n ka an soŋa, ge a daa ŋmibe de poan mɛ. Bala, yamam mɛhe da tɛn'ɛhe ya boyi' boyi' te ya bɔta te ya vihe lebe ta bɔna bɔŋsɛka taaba te ya daa bɔna la. 4Te yan nan zaberɛ la yelese'a n de be'em wa. Ya nan ka zabɛ paɛ zɛn'sɛka n de ya ki' de poan. 5Mam ka tɛn'ɛhɛ ya tamɛ yetɔgom sebo te Na'ayenɛ daa tɔgɛ bo ya te a soŋɛ ya wo a kɔma la. A daa yeti, N bia, da zagaha Na'ayenɛ tobedɔnlegerɛ, bii ho suunre sagom la Yenɛ tanhega. 6Se'ere n sɔe la, Yenɛ tanhere la en nɔŋɛ sɛba, wo sɔ n tanhere a dayɔsɛka te a nɔŋɛ se'em la. 7Ya han nyɛ' namehegɔ, ŋmibe ya de poan ge dekɛ dɛ te de ana wo sɔ n dɔnlegɛ ya toberɛ la. Se'ere n sɔe la, ya han nyɛta namehegɔ la pa'alɛ mɛ te Na'ayenɛ ete ya mɛ wo a kɔma la. Ge bia boe ihege te a sɔ nan ka tabelɛ dɔnlegɛ a toberɛ? 8Ge Na'ayenɛ han ka dɔnlegɛ ya toba wo sɔ n dɔnlehe a kɔma se'em la, la ye pa'alɛ te yamam dagɛ a kɔma sera sera ge ka mi' ya sɔ n yehe zen'en na. 9La han dɛna te teŋa wa sɔdoma, ba dɔnlehe to toba ge te to kelom bɔ'ɔra ba. Dena wa han de'a bala, wane wane te la sona te to dekɛ to mɛhe zan'an zan'an bo to Sɔ se'em n boe saazuo ha te a ta bo to vom sebo n ka tare ba'ahegɔ? 10Te to teŋa wa zuo sɔdoma n dɔnlehe to toba, la ka kan'anle dabeha ban tɛn'ɛhɛ de bala te de de'a ma'an. Ge Na'ayenɛ han dɔnlegɛ to toba, a eŋɛ dɛ la to som zuo, te to wan lagom tara a toolom bɔŋa la taaba la zuo. 11Ba han dɔnlegɛ to toba, bala ma'an poan la, to ka tare popeelom ge to tare la sunsagaŋɔ. Ge pooren, sɛba n baŋɛ te la de ma'an te ban dɔnlehɛ to toba n ne dela sɛba n tare sunma'ahom ge dɛna tontɔɔdoma. 12Dene poan, kpemehe ya ya nu'uhen la n banle la ya duma la n kɔ'ɔhe la. 13Te nɛra na'arɛ deyema han ka bara ge te a kena sɔrɔɔ seko n de tontɔɔ ana soŋa, a na'arɛ la kan daan en. Ge, de wan ton eŋɛ la som. Bala, yamam me sontii ya bɔna bɔŋsɛka n ane wo bala mea. 14Kpeŋe ya mɛhe la ya tara sunma'ahom la nɛra woo ge me bɔna bo Na'ayenɛ ma'an. Se'ere n sɔe la, nɛra han ka bɔna bo Na'ayenɛ ma'an wan ta'an nyɛ' en. 15Tara ya mɛhe soŋa soŋa te se'em ya poan koŋe a to'e som sebo te Na'ayenɛ eta bɔ'ɔra tɔ wa poan. Se'em ya poan han ka to'e som ge eŋɛ la saganɔ, enŋa daana wan ana wo mɔseko n ka soŋa lagom yehe la ki' te i ka zɔ'ɔra soŋa soŋa ge sagaŋɔ na se'em la. 16Le kelom tare ya ya mɛhe soŋa soŋa te se'em ya poan da tona yalomtooma bii a ka bɔna bɔŋsɛka taaba n ete to Daana suunre nyɛlom wo Esau n yuun dekɛ n dene dayɔkeema ge wan to'e ne sɛla la tee dia di'. 17Ge yelemɛŋɛrɛ, ya mi' te a yuun bote a sɔ kan' kan'somɔ bo en. Ge, a yuun zagahɛ en. Se'ere n sɔe la, sɔrɔɔ ka le bɔna bo en te a ta'an tee sɛla te a diŋe enŋɛ la bii la n yuun pon kɛla la nintam bɔta dela. 18Yamam ka wa'an zoore la te nɛreba wan ta'an kalom te dita la bugum peelom te la lebege lika la se'em ka ta'an nyɛta a nɛŋa, ge te sabeeo kantɛ lɔbera, 19te pɛɛbera tentana vɔɔla, te Na'ayenɛ tɔgɛ zoore la zuo ha na ge te nɛreba belom mɛ te ba ka bote ba le wom yelese'ere le pa'ahɛ. 20Se'ere n sɔe la, Na'ayenɛ n yuun bo ba a nɔɔrɛ la se'em la yuun kpe'em bo ba mɛ, yeti, Duŋa han kalom zoore la lobe ya en la kuga ko'. 21Ge zen'an la yuun da ba tara la dabeem te Moses yuun yeti, Te dabeem kɛn' mam. 22Ge, yamam nya ton wa'an la zen'an kayema na, Zion Zoore na. De dela Na'ayenɛ se'em n vɔe wa teŋa la saazuo ha Yerusalem zen'an la Na'ayenɛ soŋoreba tuha tuha bɔna la popeelom la na. 23Ya wa'an zɛn'sɛka te sɛba n dole Yesu sore lagahɛ na. Bama n de Na'ayenɛ kɔma la a golehɛ ba yu'ura saazuo me ha. Ya wa'an Na'ayenɛ se'em n gankere nɛra woo la zen'en me na la tontɔɔ nɛreba zen'en na te Na'ayenɛ bahɛ ba te ba nya kɔ'ɔn dɛna yelemɛŋɛrɛdoma wuuha. 24Ya me le kelom wa'an la Yesu se'em n bo'ore to nɔbiŋpaalega la zen'en na, ge le kelom wa'an ziim sebo te ba miihe bo te bo pa'ala tɔ yelese'a n gana Abel kaanbegɔ ziim la n pa'alɛ tɔ yelese'a. 25Bala, tara ya mɛhe soŋa soŋa te ya han ta wom Na'ayenɛ yelehom, ya da li' toba la a. Te nɛresɛba n yuun zagahɛ ka kelehe Na'ayenɛ n tɔgɛ a yetɔgom teŋa wa zuo la ka ta'an le'ehɛ, tomam nya wan ton eŋɛ la wane ta'an le'ehɛ to han ka sakɛ kelehe Na'ayenɛ se'em n bo saazuo ha tɔgɔra bɔ'ɔra to na? 26Bala ma'an la a yuun tɔgɛ la yetɔgom ma'an te teŋa yuun miim. Ge nananawa, a biŋe a nɔɔrɛ te, La kan yuue la mam wan le miim teŋparɛ, ge lagom miim saazuo ha. 27Te en yeti ge lagom miim wa pa'alɛ mɛ soŋa soŋa te sɛla woo te Na'ayenɛ naam la wan sagom mɛ ge zongɛ yema yema. Bala, te sɛla n ka lagom miim la wan kelom bɔna ban pon bone se'em la. 28Dene poan, bahɛ te to bo Na'ayenɛ fara. Se'ere n sɔe la, ton boe zen'en te a sɔna behere la kan malom miim. Bala, bahɛ te to tare ya popeelom behɛ ya sɔrɔɔ seko te to wan doohe po'oha Na'ayenɛ la, na'ahegɔ la dabeem te la eta a suunre nyɛlom. 29Se'ere n sɔe la, to Na'ayenɛ la seren dela se'em n sagom lɔgɔrɔ wo bugum n sagom se'em la.

will be added

X\