Ebre 11

1Ton nam Yenɛ la zuo te to mina soŋa soŋa te sɛla te to sakɛ to suunre poan gura wan seren eŋɛ. To mi' la dela yelemɛŋɛrɛ bii to pon kan ta'an nyɛ' dɛ la to nini wa. 2To sɔyaabdoma n yuun nam Yenɛ me zuo te a bahɛ ba te ba baŋɛ te a tare popeelom la ba. 3Ton nam se'em la zuo te to bɔkɛ te Yenɛ yele la yelehom naam sɛla woo n boe teŋa wa zuo la saazuo ha la te a dekɛ sɛla n ka nyɛte la nini naam sɛla n nyɛte la nini wa. 4Abel n yuun da nam Yenɛ me zuo te a bo Yenɛ bo'olom te bo nyana Kain bo'olom la. Abel n nam bala mea zuo te Yenɛ dekɛ en te a de'a tontɔɔdaana. Bala, Abel n pon ki' wa, ge a yetɔgom kelom bɔna mɛ bo to, en yuun nam Yenɛ la zuo. 5Enok me yuun nam Yenɛ me zuo, a bahɛ en te a zom saazuo ha ge ka ki'. Nɛreba yuun da ka nyɛ' en, Yenɛ n yuun da bahɛ en te a zom la zuo. En ka zom saazuo la, Yenɛ bahɛ en ta mi te en eŋɛ Yenɛ suunre nyɛlom mɛ. 6Nɛra me ka boe wan ta'an eŋɛ Yenɛ suunre nyɛlom a han ka nam Yenɛ. Se'ere n sɔe la, nɛra se'em woo n ye' Yenɛ zen'en, sontii a nam en te a dela se'em n boe ge sɛba me n eere en la, a wan bahɛ ba te ba nyɛ' en. 7Noah me yuun nam Yenɛ, Yenɛ n kan'aŋɔ yɛhera sɛla n wan eŋɛ pooren te enŋa kan ta'an nyɛ' la a nini bala ma'an ha la. A sakɛ la Yenɛ nɔɔrɛ kpa' ɔɔnrɔŋkantɛ te enŋa la a nɛreba yuun kɛn' bini nyɛ' faanrɛ. A nam Yenɛ la zuo te a yeti teŋa wa zuo nɛreba tue mɛ ge a nam la zuo Yenɛ dekɛ enŋa Noah te a dela tontɔɔdaana. 8Abraham yuun nam Yenɛ nɔɔrɛ te a keŋɛ teŋsɛka te Yenɛ biŋe a nɔɔrɛ te a bo en la, bahɛ a mea teŋa mɛ ge yehe yɛ'a zen'an te a ka mina. 9A nam Yenɛ la zuo te a yuun bɔna teŋsɛka te Yenɛ biŋe a nɔɔrɛ te a bo en la wo saana n boe teŋa poan se'em la. Enŋa la Isaak la Yakob kɛn' sogora ge Yenɛ me yuun biŋe la nɔdenɛ mɛŋa me bo ba zan'an. 10Abraham ka mɛ' yire bo a mɛŋa. Se'ere n sɔe a gura la a ta kɛn' teŋsɛka te Yenɛ mɛŋa sɔɔn dɛ ge biŋe ɛnberɛ ge mɛ' dɛ la. 11Abraham n yuun nam Yenɛ me zuo n sɔe te a korogɛ paɛ paɛ ge te a pɔga Sarah me gaŋɛ dɔgom ge te Yenɛ kelom bahɛ te a dɔgɛ bia. A nam Yenɛ te sɛla te enŋa Yenɛ biŋe a nɔɔrɛ te a eŋɛ la, a wan seren eŋɛ dɛ. 12Bala, la dela boraa yan'aŋa n yuun korogɛ gaŋɛ dɔgom wa n sɔe te yaahe zo'e zo'e bɔna. A yaahe la zo'e me wo ŋmarebibihe n boe saŋgbana poan la kolaa kantɛ tentɔnbin'ihegɔ n zone se'em la. 13Nɛrebana wa zan'an yuun kelom nam Yenɛ la bala ta paɛ se'em ma'an te ba ki' la. Ba ka to'e sɛla te Yenɛ biŋe a nɔɔrɛ te a bo la. Ge, ba nyɛ' dɛ la zanzaarɛ ha ge te la daa eŋɛ ba sunya nyɛlom. Ba me daa mi' te ba dela saama ge me ka tara ba yito'ore teŋa wa zuo. 14Nɛresɛba n tɔgɔre yele ana taaba pa'alɛ mɛ soŋa soŋa te ba eere la teŋsɛka te ba wan ta yi'ira ba mɛŋa teŋa. 15Ban me yuun tɛn'ɛha teŋsɛka te ba bahɛ bini la yele, sore boe te ba lebe. 16Ge lan de se'em la, ba yuun da ton ɛɛra la teŋsɛka n ane soŋa nyana. Ka me dela teŋsɛka n boe saazuo ha. Bala, valom ka tare Yenɛ te a bahɛ te ba yi'ira en ba Yenɛ. Se'ere n sɔe la, a maahom teŋa bo ba. 17Abraham n yuun nam Yenɛ la zuo te Yenɛ makɛ en behɛ ge te a sakɛ dekɛ a dayɔa Isaak kaanbe la. Yenɛ biŋe a nɔɔrɛ te Abraham nyɛ yaahe zo'e zo'e, ge te a dekɛ a dayɔa bo Yenɛ. 18Yenɛ yele en yeti, Ho yaahe wan Isaak poan na. 19A yuun sakɛ te Yenɛ tare paŋa wan ta'an bahɛ te Isaak vo'e a kum poan. Bala, Abraham zen'en, Yenɛ daa wone te a bahɛ te Isaak le vo'e a kum poan me n bala. 20Isaak yuun nam Yenɛ me zuo te a daa kan' kan'somɔ bo Yakob la Esau sɛla te ba wan nyɛ' pooren. 21Yakob me yuun nam Yenɛ me zuo n sɔe, te a kan' kan'somɔ bo Yosef dayɔɔhe la woo ge din' a doore na'ahe Yenɛ ge ki'. 22Yosef me yuun nam Yenɛ me zuo n sɔe, te n daa pɔnre te a ki' la, a tɔgɛ Israel teŋa nɛreba n wan yehe Egipt teŋa poan se'em mɛ, bo ba yetɔgom te enŋa han ka ta bɔna ba eŋɛ en se'em. 23Moses dɔgɔreba yuun nam Yenɛ me n sɔe, te ban daa dɔgɛ en la, ba dekɛ en mɛ sogɛ ŋmarehe setan'. Se'ere n sɔe la, ba behɛ te a som mɛ ge bama me ka tare dabeem la naba la n bo a nɔɔrɛ la se'em la. 24Moses yuun me nam Yenɛ mɛ n sɔe te ta de'a bonkotɛ la, a ka sakɛ te nɛreba yi'ira en Faro pɔyɔa bia, 25en bote la a lagom nameha la Yenɛ nɛreba nyana a nyɛta lɔgɔtonɔ woo n tara be'em poan ge me ka bɔna wuuha. 26Egipt teŋa yuun kɛɛta Moses la n dole Krista la zuo. Ge bala zan'an, a bote a namehɛ bala nyana a tara lɔgɔseto woo n boe Egipt teŋa poan la. Se'ere n sɔe la, a behera la sɛla te Na'ayenɛ wan bo pooren. 27Moses n nam Yenɛ zuo te a yuun bahɛ Egipt teŋa poan. Dabeem ka tare en la naba la n ete sunsunya la. A kɔ'ɔn din'inhe suunre, a mi' Yenɛ se'em te ba ka nyɛta la nini la boe la en mɛ la zuo. 28A nam Yenɛ me zuo n sɔe te a bahɛ te ba eŋɛ Azootole Daarɛ la, bo nɔɔrɛ te ba dekɛ ziim la miihe ba kolehe. Te Yenɛ soŋora da ko' Israel teŋa dayɔkeendoma wo en koore Egipt teŋa nɛreba dayɔkeendoma se'em la. 29Israel nɛreba n yuun nam Yenɛ n sɔe te ba keŋɛ yakɛ Mɔgɔ Mɔlega la wo teŋkɛ'ɛŋa la. Ge Egipt teŋa nɛreba me n teregɛ dɔla ba poore te bama me yakɛ la, ko'om la di ba mɛ. 30La kelom dela Israel teŋa nɛreba n yuun nam Yenɛ n sɔe te ba keŋɛ kae Yeriko teŋa dangɔɔma dabeha ayopɔe te a lo' la. 31Ge Arahab se'em n de yiyɛa la yuun nam Yenɛ me n sɔe te a to'e nɛresɛba te ba tom te ba keŋɛ Yeriko teŋa poan ta le'ehɛ behɛ ka an se'em la, a yire poan soŋa soŋa. Bala n sɔe, te ba ka lagom ko' en ban da koore nɛresɛba n ka nane Yenɛ la. 32Te yɛla kekeko kelom bɔna te n wan tɔgɛ ne. Ge nɛŋa ka boe bɔ'ɔ te n tɔgɛ yɛhera Gideon la Barak la Samson la Yepta la David la Samuel la nɔtɔgɔheba yɛla. 33Bama woo yuun nam Yenɛ mɛ ge ta'an eŋɛ sɛla woo te ba eŋɛ la. Ba basɛba zabɛ nyaŋɛ teŋse'ehe woo te ba zabɛ la, eŋɛ la sɛla n de ma'an, to'e sɛla te Yenɛ biŋe a nɔɔrɛ bo ba la, tare gbegema paŋa te ba ka ya'ara nɔɔrɛ. 34Ba me yuun kiinhere bugum peelom, zɔ' nɛresɛba n zegere te ba ko' ba la so'ahe zen'en, ka tare panhe ge lebege tara panhe, de panhedoma zaberɛ zen'enhe zabera ge ba nyaŋera teŋse'ehe n dagɛ la ba teŋhe. 35Pɔgɔse'ehe me to'e ba nɛresɛba n yuun ki' ge Yenɛ bahɛ te ba le vo'e. Ge nɛreba basɛba me yuun sakɛ ba namehe ba te ba ta ki' nyana ba zagahɛ Yenɛ ge nyɛ' vo'ohom. 36Nɛreba yuun la'are basɛba mɛ ge ŋmɛ'ɛra ba. Ba me lo' basɛba me tare ba ta eŋɛ pakadeen. 37Ba yuun lobe ba la kuga ko' ge dekɛ sokantɛ ne poregɛ se'em sugumnɔɔren boyi'. Sɛba me ba dekɛ la so'ahe lo' ba ko'. Ba ne yɛ' la piihe la boohe gana ɛɛra kaara dɛna nahadoma, ge te ba nameha ba ge eta ba sɛla n ka soŋa. 38Ba yuun eere mɛ wo ba dela saama ɛɛra mɔɔ ha la zɔya zuto la. Ba gan' la tanhe yogoro poan la yogoseto n bo teŋa. Teŋa wa zuo ka ane soŋa bo ba te ba bɔna. 39Yenɛ yuun yele nɛrebana wa te a tare popeelom la ba la ban nam en la zuo. Ge bala zan'an, ba ka to'e sɛla te Yenɛ yuun biŋe a nɔɔrɛ bo ba la. 40Ge Yenɛ le tɛn'ɛhɛ la yelese'ere n gane bala te a eŋɛ bo to. Yenɛ potɛn'ɛrɛ dela ba wan lagom mɛ la tomam te a bahɛ to zan'an lagom dɛna tontɔɔdoma sɛba n ta nare te to to'e sɛla te a biŋe a nɔɔrɛ bo la.

will be added

X\