Hagai 2

1Ŋmarehe seyopɔe poan dabeha pihiyi' la deyema daarɛ, te Na'ayenɛ yelehom wa'an nɔtɔgɔha Hagai zen'an na. 2Yelehom la yeti, Tɔgɛ bo Sealtiel dayɔa Zerubabel n behere teŋa la, la Yehozadak dayɔa Yosua n de malema nɛŋadaana la, la nɛreba la zan'an. Soke ba yeti, 3Ya bane n kelom bɔna zina yuum nyɛ Na'ayenɛ yire wa n yuum sɔe de mɛŋa se'em ma'an la? Zina beere wa, de ane la wane? De nya ka ane me wo daboo la ya nɛŋan? 4Na'ayenɛ yeti, Zerubabel, ihege saazuo, malema nɛŋadaana Yehozadak dayɔa Yosua, ihege saazuo. Teŋa wa poan nɛreba wa, ihege ya saazuo la ya tom. Pɛɛntɛɛnreba Na'ayenɛ la boe mɛ la ya. 5Mam n yuum pon biŋe nɔse'ere la ya, yan yuum ze'ele Mizraim teŋa poan yehe na la n bala. Mam Sea la boe mɛ la ya. Da zote ya dabeem. 6Pɛɛntɛɛnreba Na'ayenɛ la yeti, La kan yuue la mam n wan le miim saazuo la teŋparɛ la ko'kantɛ la teŋkɛ'ɛŋa wa. 7N wan miim teŋhe zan'an. Teŋhe wa zan'an wan bahɛ ban mɔ'ɛ nini ɛɛra sɛla la, ge te n perɛ n yire la pɛnka. Pɛɛntɛɛnreba Na'ayenɛ la n yele se'em n bala. 8Sanlema peelega la sanlema la dela mam denɛ, Pɛɛntɛɛnreba Na'ayenɛ la n yele se'em n bala. 9Pɛnka sɛka n yeti ka bɔna yire wa poan la wan gana pɛnka sɛka n yuun pon bɔna de poan la. Pɛɛntɛɛnreba Na'ayenɛ n yele se'em n bala. Sunma'ahom wan bɔna zen'kana wa poan. Pɛɛntɛɛnreba Na'ayenɛ la n yele se'em n bala. 10Naba Darius na'am dia yuuma ayi' poan, ŋmarehe sewae' dabeha pihiyi' la anaahe daarɛ, te Na'ayenɛ yelehom wa'an a nɔtɔgɔha Hagai zen'an na yeti, 11Pɛɛntɛɛnreba Na'ayenɛ la n yele se'em n wana. Soke ya malemadoma la pa'alegɔ la n pa'ale se'em. 12Nɛre han dekɛ nɛnɔ toolom nɛnɔ eŋɛ a fuo poan yɛ'a, te a fuo la ta kalom dia, bii zɛɛnrɔ bii daam bii kaam bii disɛka woo te fuo la kalom, disɛka te fuo la kalom la wan lebege la toolom lɔkɔ yoi? Te malemadoma la lerege yeti, Aai. 13Te Hagai le yeti, Nɛra han kalom kum ganlom, ge kalom toolom lɔgɔseko, a ne ganlom lɔgɔrɔ la me? Te malemadoma la lebehe en yeti, Ɛɛn, a ganlom lɔgɔrɔ la me n bala. 14Bala te Hagai nya yele ba yeti, Na'ayenɛ yeti, Nɛrebana wa ane la bala mam Na'ayenɛ nɛŋan. Sɛla woo te ba eta, bii sɛla woo te ba tara bɔ'ɔra mam dela ganleŋɔ lɔgɔrɔ mam nɛŋan. 15Bala, tɛn'ɛhɛ ya yele wa zina soŋa. Behɛ ya sɛla woo n daa ane se'em ge te ya pɔhɛ dekɛ kugure dɔgɔlɛ de tadaana zuo te ya mɛ Na'ayenɛ Yire wa, tara tara la zina. 16Sɛla han kan'ahe gan'an dɛna bonɔ pihiyi' te yamam ayema yɛ'a te a ta vaɛ, a ta paɛ te ba dela pia ma'an. Ya ayema han yɛ'a te a ta ka'ɛ daam n perɛ leŋehe pihinuu, a ta paɛ te bo dela leŋehe pihiyi' ma'an. 17Mam bahɛ te bonyooro la saakuga n sagom ya nu'uhe tooma la zan'an, ge la bala zan'an, ya kelom kan ŋmɛregɛ lebe mam zan'an na. Na'ayenɛ n yele se'em n bala. 18Pɔhɛ zina dabaherɛ wa, zina ŋmarehe sewae' wa dabeha pihiyi' la anaahe daarɛ wa, ma'ɛn ya mɛhe tɛn'ɛhɛ lan daa ane se'em ge te ya daa pɔhɛ ɛɛnbɛ Na'ayenɛ Yire wa. Tɛn'ɛhɛ ya zina dabaherɛ yɛ'ɛha soŋa soŋa. 19Keho yee bɔna baanrɛ poan zina wa? Behɛ ya lan paɛ se'em beene ge te tan'ahe la doonhe la kenkanhe kelom ka wom. Yehe zina dabaherɛ wa yɛ'ɛha n kan' som bahɛ ya zuo na. 20Ŋmarekaŋa mea poan ka dabeha pihiyi' la anaahe daarɛ mea te Na'ayenɛ yelehom wa'an a nɔtɔgɔha Hagai zen'an na yeti, 21Yele Zerubabel n behere Yuda teŋa la yeti, Mam Na'ayenɛ wan miim saazuo la teŋparɛ wa. 22N wan sigehe nadoma, ge sagom sateŋhe n zaan panhe. N wan lobɛ yiri toroto la yire ban'areba, la yiri la i ban'areba la zan'an wan fɔ ba so'ahe tuluge ko taaba. 23De daarɛ, n wan dekɛ hom Sealtiel dayɔa Zerubabel n de mam yameŋa wa, te ho lebege mam na'am nu'toa. Mam mɛŋa n loe ho. Pɛɛntɛɛnreba Na'ayenɛ la n yele se'em n bala.

will be added

X\