Hagai 1

1Naba Darius na'am gɔŋɔ zuo yuuma ayi' poan ŋmarehe seyoobe pɔhega daarɛ te Na'ayenɛ yelehom wa'an a nɔtɔgɔha Hagai zen'an na, bo Sealtiel dayɔa Zerubabel se'em n de Yuda teŋa behera la Yehozadak dayɔa Yosua n de malemadoma keema la. 2Pɛɛntɛɛnreba Na'ayenɛ la n yele se'em n wana. Nɛreba wa yeti, Na'ayenɛ yire mea saŋa la ka paɛ. 3Bala te Na'ayenɛ yelehom wa'an a nɔtɔgɔha Hagai zen'an na yeti. 4Saŋa paɛ ya te yamam mɛhe mɛ yisoma se'a taaba te ya mɛ kɛn'ɛra a poan ge te Na'ayenɛ yire la ton dɛna daboo la? 5Bala, Pɛɛntɛɛnreba Na'ayenɛ n yele se'em n wana. Tɛn'ɛhe ya yan ete se'em la soŋa behɛ 6Ya ka nyɛte ya ne borɛ zo'e zo'e ge ne ta kɛ' dia la fiin wa? Dita ge ka malom tegera? Nyuura ge ka malom sekera? Dekɛ lɔgɔrɔ bagɛ ya mɛhe ge te ɔɔrɔ tara ya? Ya ne wan nyɛ ligiri, ge dekɛ i eŋɛ ligiri daŋa sɛka n yule poan te i zɔngɛ zan'an. 7Pɛɛntɛɛnreba Na'ayenɛ yeti, Tɛn'ɛhɛ ya etegɔ la bahɛ soŋa. 8Zom ya zɔya la zuto ta ŋma' dɔɔrɔ sonɔ na mɛ N yire la, te n poorɛ pee, te tɔ'ɔha na'ahegɔ ko poan. Na'ayenɛ n yele se'em n bala. 9Ya ne tara potɛn'ɛrɛ te ya wan nyɛ zo'e, ge ya ne ta nyɛ la fiin wa. Sɛla te ya ne tare kule na la, mam ne pebele ba mɛ yeregɛ. Wane te n eta bala? Pɛɛntɛɛnreba Na'ayenɛ la yeti, Yamam n bahɛ mam yire la te de dɛna daboo ge te ya mɔ'ɛ nini la ya mɛhe yiya la n sɔe. 10Bala zuo, yamam zuo te saŋgbana wa kan ni saa, te teŋa wa me kan maalɛ dia. 11Mam yi' la warɛ bahɛ ya samana zuto, zɔya zuto, la dia woo te ya borɛ, daam paalom, tan'ahe wɔŋa zuo, la sɛla woo n bule teŋa wa poan yɛhera na, ta' saaleba, dunhe la ya nu'uhe toonɛ woo zuo. 12Bala te Sealtiel dayɔa Zerubabel la Yehozadak dayɔa Yosua se'em n de malema nɛŋadaana la la nɛreba la woo n boe bini la nam ba Na'ayenɛ ba Yenɛ yelehom la te nɔtɔgɔha Hagai tɔgɛ la. Se'ere n sɔe la Na'ayenɛ n tom en na. Te dabeem kɛn' nɛreba la, la Na'ayenɛ yelehom la. 13Te Na'ayenɛ bitonoŋa Hagai dekɛ Na'ayenɛ yelehom bona wa bo nɛreba la pa'ahɛ yeti, Na'ayenɛ yeti, Mam boe mɛ la ya. 14Te Na'ayenɛ kpemehe Zerubabel n de Sealtiel behera Yuda teŋa la, la Yehozadak dayɔa Yosua n de malemadoma keema la, la nɛreba la zan'an potɛn'ɛrɛ, te ba lagahɛ taaba wa'ana pɔhɛ Pɛɛntɛɛnreba Na'ayenɛ Yire la tooma. 15Ba pɔhɛ la ŋmarehe seyoobe poan dabeha pihiyi' la anaahe daarɛ, Naba Darius na'am dia yuuma ayi' poan.

will be added

X\