Habakuk 3

1Nɔtɔgɔha Habakuk sohoga n wana: 2Na'ayenɛ, mam wom ho yele. Na'ayenɛ, ho yɛla la zan'an eŋɛ mam la pakerɛ. Malom tom a taaba dabeha wa poan. Tom a pa'alɛ tɔ to saŋa wa poan. Ho suunre han nyie ho tɛɛn ho ninbɔn'zɔrɛ. 3Yenɛ ze'ele Teman na. Fa'adaana ze'ele Paran Zoore zuo na. A soŋa ma'an n pin' saazuo ha, te a pɛnka perɛ teŋparɛ wa zuo zan'an. 4A soŋa la nɛɛ mɛ wo sɔɔnrom n zone na la, te bugum ze'ele a nu'o poan na pa'ala a paŋa n ane se'em. 5Te a bahɛ te namehegɔ bɔna a nɛŋa, te mɛlehegɔ dɔla a poore. 6Te a ze'ele baanlam miim teŋa la, ge behɛ teŋhe ziin te dabeem kɛn' se. Te zɔya kɛgehe la sirige, te zɔya se'a n boe deemen deemen na woo zɔ mɛlom. Na'ayenɛ sɔya boe la bala ka tara ba'ahegɔ. 7Mam nyɛ' te Kusan yire bɔna la namehegɔ poan, te Midian bɔŋa zen'an bɔna daaŋɔ poan. 8Na'ayenɛ, hom suunre nyie mɛ la mɔga la? Ho suunre daa nyie mɛ la kolaahe la? Hom eŋɛ la suunre la ko'kantɛ la, Se'em ma'an te ho ban' ho yiri la i' toroto yɛ'a la? 9Ho yakɛ ho tanhɔ mɛ zanla ge yi'ira te ba tare pɛɛma zo'e zo'e na. Ho dekɛ la ko'om kɛ' teŋa wa wɛkɛ, 10te zɔya nyɛ' pabegɛ. Ko'kanra mea ŋmɛ'ɛre la bala tɔla, te ko'kantɛ wa damɛ te ko'mi'inhe ɛngera zɔna saazuo ha. 11Te wontɛɛŋa la ŋmarega yee zɛ'a bala saazuo ha, ge te ho pɛɛma ɛngera te ho kana lɔbera. 12Ho dekɛ la ho sunsunya doohe teŋkanra poan zan'an tole, ge ze'ele ho sunsunyiim la poan sagom teŋhe. 13Ho yehe na te ho fan' la ho nɛreba bahɛ, ho fan' ho mɛŋa suunre nɛra la. Ho wɔnregɛ toonbe'erodoma nɛŋadaana la mɛ, ze'ele a zuin siie en ta paɛ a na'ma. 14Potɔya la mɛŋa kanɛ te ho fan' lo' a zuo, se'em ma'an te a pɛɛntɛɛnreba la sa'ɛ tomam te ba yeregɛ tɔ bahɛ la, daa kɔ'ɔn zabera la tɔ to soka zen'an la wo ba yeti ba obe to mɛ la. 15Ho sige la ko'kantɛ la poan la ho yiri buurom yakɛ. 16Mam wom yele ana te mam paleŋa n ŋmɛ'ɛra, te mam nɔgbama gbi'ira la yiri dameŋa la ma'an, te mam koba kɔ'ɔhɛ te mam na'ma gbi'ira. Ge mam wan nyɔkɛ n mɛŋa gura dabeem dabaherɛ wa te de sige nɛresɛba n daane to wa zuo na la. 17Kenkanhe han pon ka puue, te tiihe wɔla ka bɔna, te kaam tiihe ka wom, la samana la n ka maale dia, la nii n ka boe nagadeenen la, la piihe n ka boe zoŋɔ poan la, 18mam wan kelom tara popeelom Na'ayenɛ poan. N wan tara popeelom n Yenɛ n de n faanra la poan. 19Daana Na'ayenɛ n de mam paŋa. A wan sɛ n na'ma ze'ele kaŋkaŋe wo walega na'ma la. Enŋa n soŋorɛ mam te n zɔna saazuo. N dekɛ la kɔlɔgɔ ŋmɛ' yuum yuun dena wa bo se'em n pa'ale yooma la.

will be added

X\