Habakuk 2

1N wan zɛ'a ge beha. N wan zom yaga dangoone wa zuo ge kɛleha Na'ayenɛ n wan yele mam se'em, la lebehegɔ seko te Na'ayenɛ wan lebehe n nyɔyɔm wa poan. 2Te Na'ayenɛ yeti, Golehɛ liligere se'ere te n yeti n lilige pa'alɛ ho wa eŋɛ kuga lama poan, te yetɔgɔmɔɔla dekɛ a zɔ ɛ mɔɔlɛ kae. 3Se'ere n sɔe la, liligere la gure la saŋa kayema te de tom. De dela ba'ahegɔ poan yɛla. La me kan dɛna ponpɔrɔŋɔ. La nyuunre me, gee yeem gura, gee la wan tom, la wan ba'ahom wa'ana, la kan yue. 4Behɛ, pa'ale mea ma'an n perɛ toonfɛn'ɛhadaana. A nɔŋɛ la sɛla n dagɛ tontɔɔ. Tontɔɔdoma wan vɔna mɛ la ba sakere la poan. 5Daam ma'an n sagom en. A dela la bonyore ɛɛra ka malom tara vo'ohogo. Se'ere n sɔe la, a be'elom mɛ wo yɔɔ la, ka tegera wo kum n ka malom koora tegera se'em la. A kan'ahɛ teŋhe la zan'an bo la a mɛŋa, dekɛ nɛra woo te ba dɛna a da'aberɛ. 6Wana wa kan bahɛ te nɛreba la tuluge toora hɔ ge kɛhera hɔ yeti, Yele boe hom se'em n zun' lɔgɔrɔ perɛ ho mɛŋa, ge pemehe sama dɛna bondaana wa zuo. Wane ma'an te wana wa wan bahɛ? 7Ho samadoma la kan ta ihege la hɔ? Ba kan ta ihege bahɛ te dabeem kɛn' hɔ? Bala ma'an la, ho wan lebege ba da'aberɛ. 8Hom n fan' teŋhe zo'e zo'e la zuo, nɛresɛba n gee la me wan fan' hɔ. Ho ka'ahɛ nɛreba ziim mɛ, sagom teŋhe la teŋkanra la se nɛreba n boe se poan. 9Yele boe hom se'em tarega n de piŋa ma'an lɔgɔrɔ wa zuo. Ho han tɛn'ɛhɛ te hom n eŋɛ bala tara la, sɛla kan daana hɔ, sagaŋɔ han ta wa'ana la kan paɛ hɔ, ho parom mɛ. 10Hom fan' la nɛreba zo'e zo'e lɔgɔrɔ, tare nyanɛ wa'an ho yire poan na, te ho vom me sagom. 11Kuga se'a te ho dekɛ mɛ dangoone kae ho mɛŋa bahɛ na la wan dɛna aseradoma bo hom n tom sɛla la, te dɔɔrɔ seto te ho dekɛ kpa' la me pa'alɛ hom eŋɛ sɛla. 12Yele boe hom se'em n dekɛ ziim mɛ' teŋa, dekɛ toonbe'ero mɛ teŋkantɛ ka poan la zuo. 13Pɛɛntɛɛnreba Na'ayenɛ la pon ka maahom te a dekɛ nɛreba n namehɛ nyɛ' sɛla la lebege la dɔɔrɔ nyɔ' bugum la? A ka yeti teŋhe la namehe la ba mɛhe yoo? 14Se'ere n sɔe la, teŋa wa yeti ka perɛ mɛ la Na'ayenɛ soŋa, la a yam wo ko'om n perɛ kolega se'em la. 15Yele boe la hom se'em n dekɛ daam bo ho sɔɔnrɔ, zin'an ka'aha bɔ leŋka poan bɔ'ɔra ba tara tara te a ba buge, te ho nya nyɛta ba yanɛ. 16Nyanɛ n ton wan di ho ge dagɛ pɛnka. Ho saŋa n wana me ya nyu' hom bote se'em, la ho eta hom bote se'em. Na'ayenɛ mɛŋa nu'o wanɛ la zanle kaara kena la hom zen'an na. Nyanɛ wan pin' ho soŋa la. 17Gbirigere se'ere te ho dekɛ gbiri Lebanon teŋa, sagom ka mɔen, ko' ka dunhe la se'em la wan tuluge wa'an ho zuo na. Se'ere sɔe la, ho ka'ahɛ la nɛreba ziim, sagom teŋhe la se teŋkanra, la se nɛreba woo n boe se poan bahɛ yoo. 18Bagarɛ tare la bene? Dagɛ nɛra n dekɛ a nu'uhe maalɛ en? Bii sɛla wɔnhom te ho dekɛ ze'el te a pa'ala hɔ ponpɔrɔŋɔ ma'an la tare la bene? Se'emdaana n maalɛ en la sakɛ bo la sɛla te a mea nu'uhe maalɛ. A maalɛ la bagarɛ te de ka tana tɔgɔra. 19Yele boe hom se'em n yele dɔɔ yeti, Ihege to'e, bii ho yele kugure yeti ihege. A kan ta'an soŋɛ hɔ. Ba yeen dekɛ la sanlema takɛ en, a ka vo'ohe. 20Ge Na'ayenɛ boe la a bɔŋa zen'an, teŋa woo ana baanlam a nɛŋan.

will be added

X\