Habakuk 1

1Yelehom sebo te Na'ayenɛ nɔtɔgɔha Habakuk to'e Na'ayenɛ zen'an n wana. 2Na'ayenɛ, yuuma a lɛ te mam yi'ira hɔ te ho soŋɛ mam, te ho ka kɛleha wa? Bii zaberɛ ne ta bɔna te n kaahɛ bo ho gee te ho ne ka gu' de bahɛ? 3Bene te ho bahɛ te mam nini nyɛta yelese'a n dagɛ tontɔɔ? Bene te ho tɔ'ɔha tuure yɛla? Gbirigere la sagaŋɔ n gan' mam nɛŋan. Fan' la zaba ma'an n boe. 4Bala zuo, pa'alegɔ la ka tare paŋa te yelemɛŋɛrɛ ka bɔna. Toonfɛn'ɛhadoma n gu'ure tontɔɔdoma la te yelemɛŋɛrɛ la ki'. 5Behɛ teŋhe wa zan'an kae. Behɛ se soŋa soŋa te la eŋɛ ho pakerɛ. N yeti n eŋɛ la sɛla ho saŋa wa poan, te ba han ta tɔgɔra de yele ho kan sakɛ te la dela bala. 6N maahene la Babilon teŋa nɛreba la n de nɛre wuruba la n dole teŋparɛ wa zan'an fan' zen'se'ehe n dagɛ ba zen'enhe la. 7Ba dela nɛresɛba n de dabeem la toonwurubadoma. Bama mɛŋa n sɔe ba mɛhe, eta ban bote se'em. 8Ba yiri korohe gana yeobaahe, kpe'em gana sanheŋa n boe zɔŋɔ poan zegera te a yehe na la. Ba yiri ɛngere mɛ te la ka tara pa'alegɔ, te sɛba me n ban'are i yiri la ze'ele sateŋhe n zaan na. Ba suŋere me na wo selega n suŋerɛ se'em na te a zɛ nɔbila dekɛ la. 9Ba zan'an lo' la gbirigere potɛn'ɛrɛ ma'an kena na. Ba han kena na, sɛla woo ga'are lɛbɛra la pooren gee bɔ'ɔra ba fole, te ba ne nyɔkɛ ba diŋdoma te ba zo'e wo kolaa tentɔnɔ la. 10Ba toore nadoma mɛ, ka dekɛ nadoma dayɔɔhe yi' sɛla. Teŋa sɛka woo n tara dangoone ne tara ba la yelɔ'ɔrɔ. Ba ne tin' la dɔtɔ sige ka poan ta zabɛ nyaŋɛ ka. 11Ba pebele la bala wo sabeeo la tɔla ban bote zen'an ba dela nɛreyooro sɛba n tue, gee dekɛ ba mɛŋa paŋa lebege ba yena. 12Na'ayenɛ, hom tare la ba'ahegɔ yoi? Mam fa'a Yenɛ wa, hom zuo to kan ki. Na'ayenɛ, hom n loe ba te ba gankɛ. Taŋa wa, hom n bo ba paŋa te ba namehɛ se'em woo n tue. 13Hom nini wa ba dɛna fa'a gaŋɛ i beha be'em. Ho kan nyaŋɛ tɔ'ɔha be'em. Bene te ho sina ge beha toonfɛn'ɛhadoma? Bene te ho sina ge beha toonfɛn'ɛhadoma wa te vɔla nɛreba n de tontɔɔ gana ba? 14Ho eŋɛ saaleba te ba ana me wo zim n boe ko'omen la. Ban ane wo zim n boe ko'omen la, ba ka tara naba. 15Te toonfɛn'ɛhadaana la nya ne keŋɛ la a zimbaŋa ta nyɔkɛ ba, bii a tara yoka n tare lɔbera ta lobe nyɔkɛ ba, bii a tara yoka sɛka n tare bɛŋere te nyɔkɛ ba vɛ'ɛra dɔɔra na, te a poorɛ pee te a nyeena. 16Bala te a kaanbera a yoka la n tare lɔbera la, ge nyɔ'anra nyuŋo soŋɔ zun'uhe bɔ'ɔra a yoka sɛka n tare bɛŋera la. Se'ere n sɔe la bama poan te a tara n bote sɛla, ge dita n bote sɛla. 17Bala a kelom peta a yoka la ka'aha? A kelom sagona teŋhe te ninbɔn'ɔn ka tara en?

will be added

X\