Pin'ileŋɔ 8

1Ge Yenɛ tɛnre Noah la mɔen dunhe la yiren dunhe la n boe la en daka deo la poan la yele mɛ, yu'ɛ sabeeo kantɛ te ko lobe na te ko'om la sirigera. 2Bala ma'an te ko'om sebo n gan' teŋa teŋa ha tanhɛ yɛhera na la la ko'om sebo n ze'ele saazuo surena na la go'e mɛ. 3Te ko'om la sirigera teŋparɛ wa zuo finfiinhe. Dabeha kɔbega la dabeha pihinuu daarɛ te ko'om la sirige ya. 4Ŋmarehe seyopɔe poan dabeha pia la ayopɔe daarɛ te daka deo la fehega kalom teŋa Ararat zɔya zuo. 5Te ko'om la sige finfiinhe, tara tara la ŋmarehe pia pin'ileŋɔ daarɛ, te zoore la zuo nyɛta na. 6Te dabeha pihinaahe ta tole te Noah yu'ɛ takole peka te a maalɛ kɛn'ɛhɛ daka deo la, 7tom goɔn te ko ɛngera lɛbera na tara tara te ko'om la ta kɛɛnhɛ teŋa la zuo. 8Te a tom dayene te a baŋɛ nya ko'om la kɛɛnhɛ teŋa la zuo. 9Ge dayene la n yehe la de ka nyɛ zen'an te de wan ze'ele. Ko'om n kelom gan'an teŋa la zuo. Te de tuluge lebe Noah zen'an daka deo la poan na, te a laalɛ nyɔkɛ dɛ kɛn'ɛhɛ daka deo la poan na, 10ge le gu'uhe ta paɛ dabeha ayopɔe, le tom dayene te de ze'ele daka deo la poan yehe. 11Dayene la n lebe Noah zen'an daka la poan na zanɔɔrɛ la, kaam tia vɔnman'aherɛ n yula de nɔɔrɛn. Te Noah baŋɛ te ko'om la ba'ahɛ ya. 12Te a gu'uhe dabeha ayopɔe, tom dayene la te de yehe ka le lebena. 13Noah yuuma kɔbehe seyoobe la deyena ŋmarega pɔhega daarɛ te ko'om la kɛɛnhɛ teŋparɛ la zuo. Te Noah ɔkɛ daka deo la liŋa la veehe behɛ na, te teŋa la zan'an ku'e mɛ. 14Ŋmarehe seyi' dabeha pia la ayopɔe daarɛ te teŋparɛ la zan'an ku'e ya. 15Te Yenɛ yele Noah yeti, 16Yehe daka la poan na, hom la ho pɔga la ho dayɔɔhe la se pɔgɔba la. 17Tare bonvɔa sɛka woo n boe la ho daka deo la poan yehe na. Niihe la duuhe la bonvɔɔhe se'ehe woo n boe teŋparɛ wa zuo bɔna la ho daka deo la poan la yehe na, te ba wi'ɛ perɛ teŋparɛ wa zuo. 18Bala te Noah yehe na la a dayɔɔhe la a pɔga la a dayɔɔhe pɔgɔba la zan'an. 19Te dunhe la woo la bonvɔa woo n eere teŋparɛ wa zuo la niihe la bonvɔa n boe teŋparɛ wa zuo zan'an tagalɛ taaba ba buuri ba buuri ze'ele daka deo la poan yehe na. 20Te Noah maalɛ bimbine bo Na'ayenɛ, nyɔkɛ dunhe se'ehe n de toolom dunhe la buute woo la niihe se'ehe n de toolom niihe la buute woo kayena kayena lagom taaba nyɔ' ba, te la dɛna nyɔ'an bo'olom. 21Te Na'ayenɛ wom nyuŋo soŋɔ la, yele a suunre poan yeti, N kan le malom sagom teŋparɛ wa asaala zuo. La asaala suunre poan n pon ka tara tɛn'ɛhe soŋɔ a bonbilomen ta paɛ a korogerɛ wa. N me kan le malom sagom bonvɔɔhe wo mam eŋɛ se'em wa. 22Teŋa wa n gan' wa, borega la kɛ'a, man'aherɛ la tuluga, seɔn la oonɛ, beyiine la yu'uŋɔ kan malom koŋe ka zuo.

will be added

X\