Pin'ileŋɔ 7

1Te Na'ayenɛ yele Noah yeti, Kɛn' daka deo la poan, hom la ho yiredoma la zan'an. Hom ma'an te mam nyɛ saŋkana buuri wa poan te ho dɛna nɛretontɔɔ. 2Pe'e dunhe se'ehe n de toolom dunhe la seyi' seyi', sugumnɔɔren boyopɔe. Duŋdɔɔ la duŋyan'aŋa pa'ahɛ kɛn'ɛhɛ daka la poan, ge dekɛ dunhe se'ehe n dage toolom dunhe la sugumnɔɔren boyi', duŋdɔɔ la duŋyan'aŋa, 3la niihe se'ehe n de bala me sugumnɔɔren boyopɔe, niiŋdɔɔ la niiŋyan'aŋa, te ba buuri la ta kelom bɔna teŋparɛ wa zuo. 4Dabeha ayopɔe daarɛ n wan bahɛ te saa ni teŋparɛ wa zuo dabeha pihinaahe, yu'uŋɔ la wontɛɛŋa zan'an, piie bonvɔa woo n boe teŋparɛ wa te mam naam wa zuo bahɛ. 5Te Noah eŋɛ sɛla woo wo Na'ayenɛ n bo en nɔɔrɛ se'em la. 6Noah dela yuuma kɔbehe seyoobe ge te ko'om wa'ana di teŋparɛ wa zuo. 7Te Noah la a dayɔɔhe la a pɔga la a dayɔɔhe la se pɔgɔba kɛn' daka deo la poan te ko'om la da di ba. 8Te dunhe se'ehe n de toolom dunhe la la dunhe se'ehe n dage toolom dunhe la, se bondɔɔrɔ la se bonyan'ahe la la niihe se'ehe n de toolom niihe, la se'ehe n dage toolom niihe la, se niiŋdɔɔrɔ la se niiŋyan'ahe, la bonvɔa woo n eere teŋparɛ wa zuo, 9bondɔɔ la bonyan'aŋa lagom doohe kɛn' daka deo la poan mɛ, wo Yenɛ n bo Noah a nɔɔrɛ se'em la. 10Dabeha ayopɔe n ta tole, te ko'om surom teŋparɛ wa zuo na. 11Noah yuuma kɔbehe seyoobe la ŋmarehe seyi' la dabeha pia la ayopɔe daarɛ te ko'om sebo n gan' teŋa teŋa ha la tanhɛ yɛhera na, te ko'om sebo n boe saazuo ha me yu'ɛ surena na. 12Te saa ni teŋparɛ wa zuo dabeha pihinaahe, bolika la yu'uŋɔ zan'an. 13Pɔhera daanse'ere daarɛ te Noah la a dayɔɔhe Sem la Ham la Yapet la Noah mɛŋa pɔga la a dayɔɔhe setan' la ba pɔgɔba kɛn' daka deo la poan la. 14Bama la duŋa woo buute lagom bɔna la ba: mɔen dunhe la yiren dunhe zan'an la bonvɔa woo n eere teŋparɛ wa zuo la niihe buuri buuri la sɛla woo n ɛngere. 15Sɛla woo te vo'ohom bɔna la poan bayi' bayi' wa'ana mɛ na kɛn' daka deo la poan la Noah. 16Bonvɔa woo buute n boe teŋpara wa zuo, bondɔɔ la bonyan'aŋa keŋɛ mɛ na kɛn' daka deo la poan wo Yenɛ n bo Noah a nɔɔrɛ se'em la. Te ba kɛn' ba'ahɛ te Na'ayenɛ mɛŋa yu' koleŋa la. 17Te ko'om pɔhɛ surena teŋparɛ wa zuo, tara tara la dabeha pihinaahe, 18malom pa'aha ge zɔna saazuo te daka deo la puga ko'om la zuo. 19Te ko'om la puke ta libe zɔya kanrɛ wɔgɔrɔ bahɛ poan, 20ge kelom pukura, ta bahɛ zɔya la poan poan ha wo santira pia la anuu. 21Te bonvɔa woo n boe teŋparɛ wa zuo ki: niihe la nii la mɔen dunhe la bonvɔa woo n boe teŋparɛ wa zuo ta ta' la nɛresaaleba zan'an n boe teŋparɛ wa zuo ki mɛ. 22Sɛla woo n boe teŋparɛ wa zuo vɔ'ɔha ki mɛ. 23Na'ayenɛ n piihe sɛla woo n tabelɛ tara vom teŋparɛ wa zuo bahɛ se'em n bala: saaleba la dunhe la bonvɔɔhe se'ehe woo n boe ta ta' la niihe n ɛngere saazuo zan'an ki mɛ. Noah ma'an la sɛla woo n boe la en daka deo la poan la ma'an n yee. 24Te ko'om la puke teŋparɛ la zuo gan'an ta paɛ dabeha kɔbega la dabeha pihinuu.

will be added

X\