Pin'ileŋɔ 6

1Nɛreba kanlɛ n ta pɔhɛ zɔ'ɔra teŋparɛ wa zuo la, te nɛreba dɔgɔra pugunto la, 2te Yenɛ dayɔɔhe behɛ te asaaleba pɔyɔɔhe la ane soŋa, te ba loohe ba di te ba dɛna ba pɔgɔba. 3Te Na'ayenɛ yeti, Mam vo'ohom kan le bɔna asaala poan yuue. A dela asaala. A vom dabeha wan dɛna la yuuma kɔbega la yuuma pihiyi'. 4Nepildoma la boe teŋparɛ wa zuo mɛ saŋkaŋa poan ha la. Yenɛ dayɔɔhe la n di asaaleba pɔyɔɔhe la dɔgɛ kɔma sɛba la ba la n de panhedoma saŋkaŋa poan, te nɛra woo mina ba yele. 5Te Na'ayenɛ nyɛ asaala toonfɛn'ɛha la n ane se'em teŋparɛ wa zuo, ge le nyɛ asaala suunre tɛn'ɛhegɔ zan'an n de be'em ma'an saŋa woo se'em. 6Te Na'ayenɛ suunre sagom la enŋa n naam asaala bahɛ teŋparɛ zuo la. Te la daam Na'ayenɛ suunre. 7Te Na'ayenɛ yeti, N wan piie asaala se'em te mam mɛŋa nu'o naam wa teŋparɛ wa zuo bahɛ, nɛreba la dunhe la bonvɔɔhe woo n eere teŋa wa zuo la niihe n ɛngere saazuo wa zan'an. La daam mam suunre mɛ la mam n maalɛ ba la. 8Ge Noah ma'an n nyɛ ninbɔn'zɔrɛ Na'ayenɛ nɛŋan. 9Noah yɛla n wana. Noah dela tontɔɔ nɛra ka tara gbelegere a nɛreba teŋasoka a saŋa la poan, kena la Yenɛ. 10Noah tare la dayɔɔhe setan': Sem la Ham la Yapet. 11Bala ma'an la te teŋparɛ wa zuo sagom mɛ Yenɛ nɛŋan, perɛ la gbirigere. 12Te Yenɛ nyɛ teŋparɛ wa n ba' sagom se'em. Se'ere n sɔe la, nɛre buute woo n boe teŋparɛ wa zuo ton la be'em. 13Bala te Yenɛ yele Noah yeti, N yeti n sagom asaala mɛ. Se'ere n sɔe la asaala n bahɛ te teŋparɛ wa perɛ la gbirigere wa. N yeti n sagom asaala mɛ la ninmɔ'ɔrɛ. Enŋa la sɛla woo n boe teŋparɛ wa zuo zan'an. 14Bala dekɛ dɔkpɛ'ɛma kpa' daka deo kantɛ bemehe bɔ'ɔrɔ ko poan, ge takɛ kɔ la sin'iro poan la yeŋa zan'an. 15Hom n wan kpa' ka se'em n wana. Daka deo la teŋa woko dɛna santira kɔbehe setan', te ka yaleŋa dɛna santira pihinuu, te ka saazuo woko dɛna santira pihitan'. 16Kpa' liŋa vugule ka, ge bahɛ fologo te ko dɛna wo santire, bɔna liŋa la la daka la teŋasoka. Eŋɛ koleŋa kɛn'ɛhɛ daka la logorɛ, ge eŋɛ deto la te toseto bɔna teŋa te toseto bɔna teŋasoka te toseto bɔna saazuo. 17N yeti n bahɛ te ko'om n wa'an teŋparɛ wa zuo na di sagom sɛla woo n boe saŋgbanɛ wa teŋa na wa. Bonvɔa woo n tare vo'ohom vɔ'ɔha wan ki. 18Ge mam wan biŋe n nɔɔrɛ la hɔ. Hom n wan kɛn' daka deo la poan la ho dayɔɔhe la ho pɔga la ho dayɔɔhe pɔgɔba la zan'an. 19Tare bonvɔa woo buute, bondɔɔ la bonyan'aŋa na kɛn'ɛhɛ daka deo la poan te ba bɔna bini la hɔ, 20niihe buute woo bayi' bayi', dunhe buute woo bayi' bayi' la sɛla woo n vuure. 21Lagahɛ disɛka te ya wan dita eŋɛ bini te ka bɔna bo hom la sɛla woo n boe daka deo la poan la ho la. 22Te Noah eŋɛ sɛla woo wo Yenɛ n bo en nɔɔrɛ se'em la.

will be added

X\