Pin'ileŋɔ 47

1Te Yosef nya keŋɛ ta yele Faro la yeti, Mam sɔ la n keendoma n ze'ele Kanaan teŋa wa'an n zen'an na la ba piihe la ba nii la sɛla woo te ba tara Kanaan teŋa poan zan'an. 2N ye'ehe naba la zen'en la, a doohe mɛ la a keendoma banuu tare ba ta pa'alɛ naba la. 3Te Faro la soke ba yeti, Yamam tone la bene tooma? Te ba lebehe yele naba la yeti, Hom yamehe wa go'ole la dunhe wo to sɔyaabdoma la. 4Tomam dela saama wa'ana te to kɛn' ka'lam dabeha ayi'. Se'ere n sɔe la, yaama ka boe te ho yamehe wa dunhe la wan obe, doohe la kom n ba' sige Kanaan teŋa poan ha. Bala to belone ho mɛ te ho bahɛ te ho yamehe wa zin'ire Gosen teŋa la poan. 5Te Faro la yele Yosef yeti, Ho sɔ la ho sɔɔnrɔ n bala wa'an ho zen'an na. 6Mizraim teŋa wa me zan'an boe la ho nu'uhen. Behɛ zen'an n de zen'soŋa, bahɛ te ho sɔ la la ho keendoma la zin'ire bilam. Bahɛ te ba kɛn'ɛra Gosen poan. Ge ho han mina se'em n boe ba poan tare go'ologɔ yam, ho bahɛ te enŋa daana sɔna mam mɛŋa dunhe la behera bɔ'ɔra mam. 7Te Yosef nya tare a sɔ Yakob wa'ana pa'alɛ naba la. Te Yakob kan' som bahɛ naba la zuo. 8Te Faro la soke en yeti, Hom dela yuuma a lɛ? 9Te Yakob lebehe yele en yeti, Mam kɔ'ɔn ihege na tara tara la zina, la dela yuuma kɔbega, la yuuma pihitan'. Mam yuuma ka zo'e ge a me dɛna yuum kpɛ'ɛma zaŋa. Mam yuuma wa ka yɔe mam sɔyaabdoma yuuma. 10Te Yakob sɔnhɛ la Faro la ba'ahɛ, ge kan' som bahɛ naba la zuo ge te ba nya yehe. 11Yosef n zin'ire a sɔ la a keendoma la Mizraim teŋa poan se'em n bala, bo ba sɔ'ɔlom Mizraim teŋa. A bo ba la zen'sɛka samana n ane soŋa Arameses teŋa poan wo naba la n bo nɔɔrɛ se'em la. 12Yosef n bo'ore a sɔ la a keendoma la a sɔ yiredoma la zan'an dia, dɔla deo woo nɛreba n zone se'em. 13Te dia dia ka le ta bɔna teŋa la poan. Se'ere n sɔe la, kom la ba' sige mɛ te Mizraim la Kanaan teŋhe zan'an pelege, kom la zuo. 14Te Yosef vaɛ ligise'a woo te Mizraim la Kanaan teŋhe nɛreba da' dia la ge yɔ la tare keŋɛ Faro yire. 15Mizraim la Kanaan teŋa nɛreba la ligiri zan'an ta ba'ahɛ mɛ, te nɛreba la zan'an wa'ana gilige Yosef yɛta en yeti, Bo to dia. Wane te ho sina ge beha tɔ te to vibe ho ninin? To ligiri zan'an ba'ahɛ mɛ. 16Te Yosef yele ba yeti, Ya ligiri han ba'ahɛ, ya tara dunhe kena na tɛɛhena dia la. 17Bala te ba seren tara dunhe kena na bɔ'ɔra Yosef, te a bɔ'ɔra ba dia ge tɔ'ɔha ba yiri la piihe la boohe la nii la bonhe la. A eŋɛ la bala to'ohe ba dunhe la zan'an te yuunɛ denɛ ta tole. 18Yuunɛ denɛ ta ba'ahɛ mɛ tulugera yuunɛ, te nɛreba la le gilige en na yele en yeti, To kan ta'an sogɛ yelemɛŋɛrɛ la la hom to daana wa. To ligiri ba'ahɛ mɛ te to dunhe ba'ahɛ. Sɛla ka le bɔna te to wan dekɛ bo ho gana to mɛhe la to samana wa. 19Wane te tomam wan sina ge te to mɛhe la te samana la zan'an ta bahɛ yoo ho ninin? Sɔna tomam la to samana la zan'an, te la dɛna ho da' to mɛ n bala. Ge bo to dia te to dita, te ho ta bo to bonbora te to borɛ, ge te tomam la to samana la zan'an dɛna naba lɔgɔrɔ. Bo' to ki ge te to da vibe zan'an ge bahɛ teŋa la te ka lebege mɔen. 20Bala te Yosef doohe da' Mizraim teŋa zan'an eŋɛ Faro nu'uhen. Te kom la ba' sige ta gaŋɛ, te Mizraim teŋa nɛreba la zan'an koohe ba samana la zan'an, te nɛra yene ka gee samanɛ. Bala te Mizraim teŋa la zan'an nya dɛna naba denɛ. 21Yosef da' nɛra woo n boe Mizraim teŋa poan mɛ te ba dɛna da'aba bo naba la. 22Sɛba n de kema Mizraim teŋa la poan kaanbera la ma'an samana te a ka da'. Se'ere n sɔe la, Faro la yɔɔre bama mɛ saŋa woo te ba dita. Bala zuo la, sɛla yele ka daane ba te ba wan dekɛ ba samana koohe. 23Te Yosef nya yele nɛreba la yeti, Mam n da' yamam la ya samana la zan'an la, bonbora n wana, to'e ya borɛ samana la. 24Ge dia la han ta eŋɛ ba'ahɛ te ya kɛ' ka, ya porɛ ka sugumnɔɔren bonuu, la ya dekɛ boyena bo naba, ge dekɛ bonaahe la n gee la aan biŋe boora ge tara te yamam la ya yiredoma la ya kɔma zan'an dita ge ta dekɛ le bore. 25Te nɛreba la yeti, Ho kɔ'ɔn to'e to bahɛ mɛ. To daana, zɔta to ninbɔn'ɔn bala. Tomam sakɛ ya te to wan dɛna Faro da'aba. 26Yosef eŋɛ la bala te la dɛna kema gan'an bo Mizraim teŋa samana la zina. Ba ne han kɔ, porogerɛ boyena porogerɛ bonuu poan n de Faro denɛ. Kema la n kaanbere la ma'an samana n ka boe naba nu'uhen. 27Te Israeldoma wa nya zin'an teŋa kayema n boe Mizraim teŋa poan te ba yi'ira ka Gosen, nyɛ lɔgɔrɔ ka poan ge wi'ɛ ba kanlɛ poan teŋkaŋa mea poan. 28Yakob kɛn' Mizraim teŋa yuuma pia, la ayopɔe. A vom yuuma teŋa wa zuo dela yuuma kɔbega la yuuma pihinaahe la ayopɔe. 29Te Israel kum saŋa ta paɛ, te a yi' a dayɔa Yosef na yele en yeti, Ho han seren nana mam, dɔnbelɛ teŋa gin' n na'arɛ wa ge pɔ' biŋe te ho wan eŋɛ yele dena wa. Ho wan dɛna birikina bo mam, la ho da pin' mam Mizraim teŋa wa poan. 30Ge n daa han keŋɛ paɛ n sɔdoma daarɛ, ho zi mam lebe ta pin' mam n sɔdoma n pin' zen'an la. Te Yosef lebehe yeti, Ɛɛn, n wan eŋɛ bala. 31Te a yele Yosef yeti, Pɔ' te n wom. Te Yosef pɔ' te a wom. Te Israel yingile a bongan'ala la zuin bɔba na'ahɛ Na'ayenɛ.

will be added

X\