Pin'ileŋɔ 42

1Yakob n ta wom te dia boe Mizraim teŋa la, te a soke a dayɔɔhe la yeti, Bene te zin'an limiha taaba? 2Mam wom te dia boe Mizraim teŋa poan. Keŋɛ ya bilam ta da' ya dia tare na te to di vo'e ge da vibe. 3Te Yosef keendoma pia la maahom keŋɛ Mizraim teŋa te ba ta da' dia. 4Ge Yakob ka sakɛ bahɛ te Benyamin n de Yosef yebega la doohe ba. Se'ere n sɔe la, dabeem n tare en te sɛla wan ta eŋɛ bia la. 5Lan eŋɛ se'em te Israel dayɔɔhe la lagom doohe la Kanaan teŋa nɛresɛba n ye'ehe sigera Mizraim teŋa te ba da' dia kom saŋa la poan la n bala. 6Bala ma'an te Yosef n behere teŋa la. Enŋa n koohore dia bɔ'ɔra ka nɛreba la zan'an. Te Yosef keendoma la wa'ana paɛ, paɛ pɔnrɛ na'ma Yosef nɛŋan. 7Yosef n nyɛ a keendoma la, a baŋɛ ba mɛ ge mina ge eŋɛ a mɛŋa wo a ka mi' ba mɛ la, ge tanhera ba, soke ba yeti, Yamam ze'ele la bɛha na? Te ba lebehe yele en yeti, Tomam ze'ele la Kanaan teŋa poan na te to da' dia. 8Yosef baŋɛ a keendoma la ge bama n ka baŋɛ en. 9Te Yosef tɛɛn enŋa n yuum zaanhom ba yele se'em la, ge mina ge yele ba yeti, Ya dela vɛɛhereba. Ya wa'ana te ya veehe baŋɛ la to teŋa wa zen'an en ka gu' soŋa. 10Te ba lebehe yeti, To daana, la dage bala. Ho yamehe wa wa'ana te ba da' la dia. 11Tomam woo dela boraa kayena kɔma. Ho yamehe wa dela birikindoma ge dage vɛɛhereba. 12Te Yosef lebehe yele ba yeti, Aai, ya dela vɛɛhereba n wa'ana te ya veehe baŋɛ teŋa wa zen'an n ka gu' soŋa. 13Te ba lebehe yeti, La dage bala. Tomam sɔ zin' la Kanaan teŋa poan. A dɔgɛ tomam la bodibinto pia la toyi', ge nu'uhe kanrɛ la yee la to sɔ zen'an ha. Mina me n gee bo enŋa la ka boe. 14Te Yosef lebehe yele ba yeti, Mam n yele ya se'em la, ya dela vɛɛhereba. 15Tomam n wan magahɛ ya se'em behɛ dela, mam pɔ' teŋa wa naba Faro, te ya yebega la han ka wa'an ka'lam na, ya kan malom yehe teŋa wa poan kule. 16Tom ya ya ayema te a kule ta tare ya yebega la wa'ana. Ge yamam sɛba woo n yee la, ba wan tare ya ta pagɛ. Tomam n wan eŋɛ se'em baŋɛ yeti yamam yele se'em la dela yelemɛŋɛrɛ bii ponpɔrɔŋɔ n bala. Han dagana bala, mam pɔ' teŋa wa naba n vɔe wa te ya dela vɛɛhereba. 17Ge nya tare ba zan'an ta yu' dabeha atan'. 18Dabeha atan' daarɛ la te Yosef yele ba yeti, Eŋɛ ya yele dena wa te la fan' ya bahɛ. Se'ere n sɔe la, mam dela se'em n zote Yenɛ. 19Ya han seren dɛna la birikindoma, bahɛ ya te ya ayema yee paka deo wa poan ka'lam, ge te ya zan'an keŋɛ ta tare dia la kule ta bo ya yiredoma la n vibere la. 20Ge la dela pɛnregerɛ te ya tare ya yebega la na, te n baŋɛ ya yelemɛŋɛrɛ, ge da ko' ya. Te ba sakɛ bala, 21ge nya yɛta taaba yeti, To yebega wa zuo te namehegɔ kona wa nameha to wa. Se'em ma'an te to daa dekɛ en kɔɔha te la wuna en te a bɛlena tɔ te to bahɛ en la, to daa le' la to toba ka kɛleha yele bama. Bala n sɔe te namahe kona wa sigera to zuo wa. 22Te Areuben lebehe ba yeti, N daa ka yele ya te ya da tom bia la be'em? Ge mam n daa yeti ya la, ya daa ka kelehe mam. Nananawa, la dela pɛnregerɛ te to yɔ bia la ziim. 23Ban sɔnhere la, ba ka mi' te Yosef wone ba yetɔgom la. Se'ere n sɔe la, Yosef han ne yeti a tɔgɛ bo ba, a ne tɔgɛ la Mizraim teŋa yetɔgom te ba tɔ'ɔha bɔ'ɔra ba. 24Te Yosef ze'ele bire a poore bahɛ ba, te a nintam ka'ɛ, ge te a le ŋmɛregɛ na tɔgɛ bo ba, nya bahɛ te ba nyɔkɛ Simeon lo' en la mi'inhe ba ninin. 25Te Yosef nya bo nɔɔrɛ te ba perɛ ba bɔra la la dia, ge lebehe ba zan'an ligiri eŋɛ ba bɔra la poan, ge bo ba sɛla n wan tare ba lebe ba teŋa la poan. Te ba eŋɛ wana woo ba'ahɛ bo ba. 26Te ba me dekɛ ba lɔgɔrɔ pagalɛ ba bonhe zuto yɛ'a. 27Nya ta paɛ zen'an kayema te yenɛ lu, te ba ze'ele bilam te ba vo'ohe, te ba ayema lorege a botere te a tɔnbegɛ ki bo a boŋa te ka obe, a nyɛ te a ligiri la boe ki la zuin na botere la poan. 28Te a yele a sɔɔnrɔ la yeti, Ba dekɛ mam ligiri la lebehe eŋɛ la mam botere la poan. Iŋi n wana n botere wa poan. Te ba zan'an poorɛ zɔ ma'ɛn bilam, te ba beha taaba te dabeem kɛn' ba. Te ba nya sɔkera taaba yeti, Bene n bala te Yenɛ dekɛ eta to wa? 29Ban ta paɛ ba sɔ Yakob yire Kanaan teŋa poan, ba yele en sɛla woo n eŋɛ ba. Ba yele en yeti, 30Boraa sɛka n de daana behere Mizraim teŋa la kɔ'ɔn nyabera tomam mɛ te to dela vɛɛhereba wa'ana te to doohe veehe a teŋa la behɛ la. 31Te tomam yele en yeti, Tomam dela birikindoma ge to dage vɛɛhereba. 32Tomam dela bodibinto pia la toyi' dɛna boraa yeŋa kɔma. Ayema la ka boe. Nu'uhe kanrɛ la me yee la to sɔ la zen'an Kanaan teŋa ha. 33Te kpɛ'ɛma la yele tomam yeti, Mam n wan eŋɛ se'em baŋɛ te ya dela birikindoma dela, bahɛ ya sɔɔn koyema ka'lam la mam, ge tare dia la lebe ta bo ya yire nɛreba la n vibere ha la. 34Ge ya han yɛ'a na, ya tare ya nu'uhun kanrɛ la na te n baŋɛ yeti, Ya seren dage vɛɛhereba ge ya dela birikindoma. Ya han eŋɛ bala, n wan yehe ya sɔɔn la bo ya te ya nya kena teŋa wa poan kɔɔhera ge da'ara fai. 35Ban sɔnhɛ bo ba sɔ la ba'ahɛ ge ka'aha ba ki la bɔra la poan la, ba nyɛ la nɛra woo ligiri n lo' a bɔɔrega poan bɔna ba bɔra la poan. Ba sɔ la la bama mɛhe n nyɛ te ba ki la ligiri lo' i bɔɔrehe poan bɔna ba bɔra la poan la, dabeem kɛn' ba mɛ. 36Te ba sɔ Yakob yele ba yeti, Ya pon sagom mam kɔma mɛ. Yosef ka boe, Simeon me ka boe, ge te ya le yeti ya tare Benyamin me keŋɛ. Sɛla woo nya yaɛ mam mɛ. 37Te Areuben yele ba sɔ la yeti, Mam han ka tare Benyamin lebe na, ho ko' mam kɔma wa zan'an. Yeen dekɛ en eŋɛ mam nu'uhen, ge n wan tare en lebena. 38Te Yakob ka sakɛ ge yeti, Aai mam dayɔa kan doohe la ho keŋɛ. A keema ki ya, te enŋa ma'an n nya dɛna a ma bia n yee. Sɛla han ta eŋɛ en ho sore wa te ho yeti ho keŋɛ wa poan, ho yeti ho bahɛ te mam tare n zupeelego wa sige n yɔɔ poan la ninbɔn'ɔn.

will be added

X\