Pin'ileŋɔ 41

1Yuuma ayi' n ta tole, te Faro zaanhom nyɛ te a ze' lɛm la Nile Kolaa la. 2Te nii iyopɔe ze'ele kolaa la ko'om poan dooe na, kanregɛ saalom, nya dɔla kolaa la nɔgbenɛ ɔbera yaama. 3Te a beha te nii iyopɔe ise'e me ze'ele kolaa la ko'om poan me dooe na dɛna nii wɔnɔ, ana wogola wogola, me wa'ana zɛ'a lɛm nii soma la n obere yaama kolaa la nɔgbenɛ la. 4Te nii wɔnɔ la n ane wogola wogola la nyɔgɛ nii kanra iyopɔe la vole. Bilam beene te Faro wa nɛɛ a zaanheŋɔ la poan. 5Le bɔna bɔna te gɔɔm ta zɛɛ en te a le zaanhom nyɛ te keho ze' yagom kizuto kanra toyopɔe, te i nini ana soŋa. 6Te bala tole te a le nyɛ te keho boyema me ze' te warɛ woŋɛ bɔ te bo banlegɛ, ge me yagom ki zuto toyopɔe. 7Te ki zuto toyopɔe la n yagom warɛ keho la zuo la nyɔgɛ ki zuto kanra ayopɔe la en ane soŋa la vole. Bilam beene te Faro le nɛɛ behɛ te la dela zaanheŋɔ. 8Te beere ta yelegɛ te zaanheŋɔ la daam Faro la suunre gaŋɛ, te a tom yi' a tiimdoma, la a nɛresɛba n de yamdoma a teŋa la poan te ba lagahɛ na. Te naba la yele ba a zaanheŋɔ la te a zaanhom se'em. Ge en yele ba ba'ahɛ la, se'em se'em ka boe ba poan wan ta'an pa'alɛ en zaanheŋɔ la vɔnrɛ. 9Bilam te se'em n behere sɛba n bo'ore Faro daam la nya tɛɛn yele naba la yeti, zina te mam tɛɛn toonbe'o seko te mam tom. 10Saŋa kayema ha te hom naba suunre daa ta nyie la ho yamehe, te ho nyɔkɛ mam la boroboro sɛn'ɛreba nɛŋadaana la ta pagɛ mam la enŋa zaba nɛŋadaana la yire poan. 11Te to zan'an daa ta zaanhom yu'uŋɔ koyena bini ha, te to zaanheŋɔ la vɔnrɛ daa bɔna yema yema. 12Lan daa eŋɛ bala la, Hebru bodibila n daa lagom bɔna la tɔ dɛna ho kpɛ'ɛma la yameŋa, te tomam yele en to zaanheŋɔ la. Te a daa pa'alɛ tomam to zaanheŋɔ la vɔnrɛ. A daa pa'alɛ nɛra woo mɛ a zaanheŋɔ vɔnrɛ. 13Te sɛla woo daa seren eŋɛ to wo n daa pa'alɛ to zaanheŋɔ la vɔnrɛ se'em la. Mam lebena bɔna n tooma poan, ge te ba lo' boraa kana la me yule. 14Bala te Faro la tom te ba keŋɛ ta tare Yosef na. Te ba kanbelɛ kalam ta yu'ɛ en paka deo la poan na. Te a keŋɛ ta maalɛ a mɛŋa, koonhɛ a tɛɛŋa, ge tee a lɔgɔrɔ yɛ nya wa'an naba la nɛŋan na. 15Te Faro la yele Yosef yeti, Mam zaanhom la n zaanheŋɔ te nɛra ka bɔna wan pa'alɛ mam n zaanheŋɔ la vɔnrɛ. Ge mam wom te ba yeti, Hom han wom zaanheŋɔ, ho wan ta'an pa'alɛ ko vɔnrɛ. 16Te Yosef lebehe yele naba la yeti, Mam mɛŋa kan ta'an pa'alɛ ho zaanheŋɔ la vɔnrɛ. La dela Yenɛ n wan pa'alɛ hom naba wa ho zaanheŋɔ wa vɔnrɛ n de se'em. 17Te Faro la nya yele Yosef yeti, N zaanheŋɔ la poan la, mam nyɛ te mam ze' la Nile Kolaa la nɔgbenɛ, 18te nii iyopɔe ze'ele ko'om la poan dooe na, kanregɛ ge saalom nya zɛ'a kolaa la nɔgbenɛ ɔbera yaama. 19Te n le nyɛ te nii iyopɔe ise'e me dɛna nii wɔnɔ ana wɔnɔ wɔnɔ me ze'ele ko'om la poan dooe na. Mam nan ka tabelɛ nyɛ nii wɔnɔ iŋi taaba Mizraim teŋa wa poan. 20Te mam yeti n behɛ te nii wɔnɔ iyopɔe la wa'ana nyɔgɛ nii iyopɔe la n kanregɛ ge saalom te n nyɛ n zaanheŋɔ la poan yia la vole. 21Ge nii wɔnɔ mea n pon vole nii kanra la bala la, la pon ka ana wo i obe sɛla. Nii mea kɔ'ɔn kelom tabɛ la bala mea. Bilam te mam nɛɛ. 22Te gɔɔm le zɛɛ mam te n le zaanhom le nyɛ te keho yemɔ yagom kizuto kanra iyopɔe te i ninin ana soŋa. 23Te bala tole, te n le nyɛ te keho ze' te warɛ woŋɛ bɔ, te bo banlegɛ, ge me yagom kizuto toyopɔe. 24Te mam yeti n behɛ, warɛ keho kizuto toyopɔe la nyɔgɛ kizuto kanra iyopɔe la n ane soŋa la vole. Te mam dekɛ yele tiimdoma wa, ge nɛra la ayena me ka boe ba poan wan ta'an pa'alɛ mam n zaanheŋɔ wa vɔnrɛ. 25Te Yosef yele Faro la yeti, Naba, ho zaanheŋɔ la woo dela zaanheŋɔ koyena, te ba vɔnrɛ dɛna boyena. Yenɛ mɛŋa n lilige en yeti a eŋɛ se'em pa'alɛ hɔ wa. 26Nii soma iyopɔe la te ho nyɛ ho zaanheŋɔ la poan yia la dela, yuumsoma ayopɔe. Kisoma zuto toyopɔe la te ho nyɛ la me dela yuumsoma ayopɔe. Bama woo dela boyena, te ba vɔnrɛ dɛna boyena. 27Nii wɔnɔ iyopɔe la te ho nyɛ te i ze'ele ko'om la poan dooe na la me dela yuum be'ero ayopɔe. Warɛ keho la n yagom kizuto toyopɔe te i dɛna kivagala la dela bala mea. La woo pa'alɛ la kom yuuma ayopɔe. 28Mam pon yele hom naba se'em la, Yenɛ mɛŋa n nɛɛ sɛla te a yeti a eŋɛ pa'alɛ hɔ wa. 29Yuuma ayopɔe n kenɛ na wa wan dɛna yuumsoma, te dia maalɛ ho teŋa wa poan. 30Ge yuuma ayopɔe se'a n tagale la wan ta dɛna la kom peelega yuuma. Kom la wan ta sige gaŋɛ, te Mizraimdoma wa tamɛ te putegerɛ tabelɛ bɔna ba teŋa wa poan. 31Mizraim wan tamɛ te a tabelɛ tara. Se'ere n sɔe la, kom la yeti bo sige mɛ te la ka tara makerɛ. 32Se'ere n me sɔe te zaanheŋɔ la wa'an hom naba zen'an sugumnɔɔren boyi' na la dela la pa'alɛ te Yenɛ n maahom dɛ. Bala Yenɛ wan bahɛ te la wa'ana tom. 33Bala, Naba, behɛ nɛre se'em n bɔkere yɛla ge tara yam, dekɛ Mizraim teŋa wa eŋɛ a nu'uhen. 34Behɛ loohe kpɛ'ɛndoma bahɛ Mizraim teŋa wa teŋbibihe wa woo poan, te yuum soma ayopɔe la woo poan, ba han ne kɛ' dia la, ba poregɛ nɛra woo dia sugumnɔɔren bonuu, dekɛ boyena biŋe. Ba eta bala te yuumsoma ayopɔe la ta ba'ahɛ. 35Ba doohe va yuumsoma ayopɔe wa disɛka woo te ba lagahɛ la tare na biŋe teŋkanra la woo poan, hom naba yu'urɛ poan. Te dikaŋa ta dɛna dia bo ho teŋa wa. 36Dikana wa wan gan'an ho teŋa wa poan, te kom yuuma ayopɔe la en yeti a wa'ana la han ta paɛ na, bo da nyaŋɛ sagom Mizraim teŋa wa. 37Te Faro la behɛ te a potɛn'ɛrɛ la ane soŋa bo enŋa la a kpɛ'ɛndoma la zan'an. 38Te Faro la soke a kpɛ'ɛndoma la yeti, To wan nyɛ nɛre ena taaba, nɛre se'em te Yenɛ sea bɔna la en? 39Te a le nya yele Yosef yeti, Yenɛ n deŋɛ lilige wana wa woo pa'alɛ ho wa, nɛra ka le bɔna ka'lam bɔkera yɛla ge tara yam wo hom wa. 40Hom n wan sɔna mam yire wa behɛ bo mam. N sɔ'ɔlom wa nɛreba woo wan maahom ba mɛhe nana hom yeti ho yele ba se'em. Teŋa wa poan na'am la zuo te mam wan gana hɔ fiin wa. 41Te Faro la yele Yosef yeti, Mam mɛŋa n dekɛ Mizraim teŋa wa zan'an eŋɛ ho nu'uhen te ho sɔna ka behera. 42Ge te a nya foe a nu'toa tee pire Yosef nu'o, ge dekɛ lɔgɔkanra bagɛ en, dekɛ sanlema baŋa yɛ a nyugela, 43ge zomehe en yiri toroko zuo, te a dɛna se'em n dole naba la poore, te nɛreba bɔna a nɛŋa ge tanhera te, bo ya fole, naba en eŋɛ en te a dɛna Mizraim wa zan'an kpɛ'ɛma. 44Te Faro wa le ta yele Yosef yeti, Mam n de naba teŋa wa poan. Ge la bala zan'an, nɛra kan zɛnkɛ a na'arɛ bii nu'o eŋɛ sɛla Mizraim teŋa wa poan te hom wa ka ya'ɛ ho nɔɔrɛ yele. 45Te Faro wa nya segɛ Yosef yu'urɛ te Zapenat Panea. Ge to'e Potipera se'em n de keema kaanbera On bagarɛ la pɔyɔa te ka yu'urɛ dɛna Asenat bo Yosef te ka dɛna a pɔga. Te Yosef nya ihege kae Mizraim teŋa la zan'an. 46Yosef dela yuuma pihitan' ge kɛn' Faro tooma wa Mizraim teŋa poan, bɔna naba la yire ge ne yehe kae Mizraim teŋa la. 47Yuumsoma ayopɔe saŋa la poan, Mizraim teŋa dia maalɛ mɛ te makerɛ kana. 48Te Yosef me doohe da' dia la n maalɛ yuumsoma ayopɔe la poan la biŋe teŋkanra la poan. Teŋkantɛ woo poan, Yosef ne da' la disɛka te ba bota ka teŋbibihe la poan tare na biŋe ka poan. 49Yosef doohe da' dia la bala biŋe teŋhe la woo poan kura kura wo zɔya la, te dia la nya ta ba' zo'e gaŋɛ te a ka le goleha kan zone se'em yɛ'ɛha. 50Kom yuuma la nan ka paɛ, ge te Yosef pɔga Asenat se'em sɔ n de Potipera dɛna keema kaanbera On bagarɛ la dɔgɛ bodibinto toyi'. 51Te Yosef segɛ keema la Manase. De vɔnrɛ dela, Yenɛ bahɛ te mam tamɛ n sɔ yire daaŋɔ la mɛ, 52ge segɛ se'em n tagalɛ la me Epraim. De vɔnrɛ dela Yenɛ n bahɛ te mam wi'ɛ buuri teŋa wa poan. 53Te yuumsoma ayopɔe se'a te Mizraim teŋa nyɛ dia la wa'ana tole, 54te kom yuuma ayopɔe la nya pɔhɛ wo Yosef n pa'alɛ naba la zaanheŋɔ la se'em la. Te kom la sige teŋa woo poan, ge te dia bɔna Mizraim teŋa zan'an poan. 55Mizraim teŋa nɛreba n nya ta bɔna bini wona kom la, nya kaahera kom la yele bɔ'ɔra Faro. Te naba la me ne galahɛ ba yeti, Keŋɛ ya Yosef zen'an, te enŋa n wan pa'alɛ sɛla la, ya eŋɛ bala. 56Bala ma'an te kom la to'e Mizraim teŋa zan'an mɛ, te Yosef yu'uhɛ dia deto la, nya tara dia la kɔɔha bɔ'ɔra Mizraim teŋadoma la. Kom la ba' sige Mizraim teŋa la poan mɛ ka gee zen'an. 57Te la gaŋɛ te teŋhe woo nya kena Mizraim teŋa na da'ara dia Yosef zen'an. Se'ere n sɔe la, kom la sige la teŋparɛ wa zuo zen'an woo.

will be added

X\