Pin'ileŋɔ 40

1Saŋa kayema te Mizraim teŋa naba tontoneba bayi', se'em n bo'ore naba daam la se'em n sɛn'ɛre naba boroboro la ta tue ba daana naba wa. 2Te Faro la sunsunya nyie la a kpɛ'ɛndoma bayi' wa, sɛba n bo'ore naba daam nɛŋadaana la, la sɛba n sɛn'ɛre naba boroboro nɛŋadaana la. 3Te naba la bahɛ te ba tare ba ta yu' zaba nɛŋadaana yire, zen'sɛka te ba pagara kpɛ'ɛndoma nɛreba la. Zen'an te ba pon pagɛ Yosef la. 4Te paka deo kpɛ'ɛma la dekɛ ba eŋɛ Yosef nu'uhen te a behera ba. Te ba bɔna paka deo la poan te la eŋɛ dabeha fiin wa. 5Te nɛreba bayi' wa, se'em n bo'ore naba daam la la se'em n sɛn'ɛre naba boroboro la te ba tare ba ta paga la ta lagom zaanhom yu'uŋɔ koyena poan, te ba zaanheŋɔ la vɔnrɛ bɔna yema yema. 6Te Yosef ihege bolika paɛ ba zen'an na, behɛ bama bayi' la te ba nɛhe n zuŋe. 7Te Yosef soke Faro kpɛ'ɛndoma bayi' wa n boe la en paka deon a daana yire poan la yeti, Bene te ya nɛhe zuŋe bala zina? 8Te ba yele en yeti, To zan'an n zaanhom, te nɛra ka bɔna wan pa'alɛ to zaanheŋɔ la vɔnrɛ. Te Yosef soke ba yeti, Liligere ka ze'ete la Yenɛ zen'an na? Yele ya mam ya zaanheŋɔ la. 9Te se'em n de naba daam bɔ'ɔreba la nɛŋadaana la yeti, Mam zaanheŋɔ la poan, mam nyɛ la tia n ze' n nɛŋan, 10yagom yila atan' te yila la ta puura, te wɔla la yehe na wom bi'e. 11Te mam nyɛ te Faro daam wanɛ n boe mam nu'uhen, te mam go'ohe tia wɔla la ŋmɛkɛ daam ta bo en. 12Te Yosef yele en yeti, Ho zaanheŋɔ la vɔnrɛ n wana. Yila atan' la dela dabeha atan'. 13Dabeha atan' poan, Faro wan zɛnkɛ ho zuo, ge bahɛ te ho le tona ho tooma wo hom daa pon tona se'em la. Ho wan le ta zanla Faro daam wanɛ la zɛ'a a nɛŋan bɔ'ɔra en daam wo hom daa de a daam bɔ'ɔra ne bɔ'ɔra en se'em la. 14Ge mam yele ho sɛla wa han seren ta tom bala, da tamɛ n yele. Ton yelesonɛ dena wa bo mam na. Tɔgɛ mam eŋɛ sɛla bo ho wa bo Faro la, te la bahɛ te a yehe mam me paka deo wa poan bahɛ. 15Han dɛna sera, ba zun' mam mɛ ze'ele Hebru teŋa wa'an ka'lam na. Mam le wa'ana bɔna paka deo wa poan wa, n ka tom toonse'ere n sone te n bɔna ka'lam. 16Te se'em me n sɛn'ɛre naba boroboro la nɛŋadaana la n nyɛ Yosef n pa'alɛ ena la zaanheŋɔ la te la ana soŋa la, te a me yele Yosef yeti, Mam me zaanhom mɛ zi boroboro pitɔ totan', 17Te pi'seko n boe zuin ha la dɛna dia yema yema te to sɛn' tare yɛ'a te to bo Faro, te niihe ɛngera zɛɛra disɛka te n ziira pi'ɔ la poan yɛ'a la. 18Te Yosef yele en yeti, Ho zaanheŋɔ la vɔnrɛ n wana. Pitɔ totan' la dela dabeha atan'. 19Dabeha atan' la poan, Faro wan yehe ho na dekɛ ho lo' yule tia zuo te niihe wa'ana di ho. 20Te dabeha atan' daarɛ la seren wa'ana lu Faro la dɔgom daarɛ, te a nya eŋɛ de'eŋɔ bo a kpɛ'ɛndoma la zan'an, ge nya yehe sɛba n bo'ore naba daam la nɛŋadaana la, la sɛba n sɛn'ɛre naba boroboro la nɛŋadaana la na ze'ele a kpɛ'ɛndoma la woo nɛŋan pɛngɛ ba, 21ge bahɛ te sɛba n bo'ore Faro daam la kpɛ'ɛma la lebe a tooma poan kelom bɔ'ɔra naba daam, 22ge lo' sɛba n sɛn'ɛre naba boroboro la kpɛ'ɛma la yule wo Yosef n pa'alɛ en a zaanheŋɔ la vɔnrɛ se'em la. 23Ge bala n ta eŋɛ ba'ahɛ la, se'em n bo'ore naba daam la tamɛ Yosef yele mɛ.

will be added

X\