Pin'ileŋɔ 4

1Te Adam nɛ a pɔga Eve soŋen te a yee sea ta dɔgɛ bia segɛ ka Kain. Pɔka la yeti, Na'ayenɛ n soŋɛ enŋa te a dɔgɛ boraa. 2Pooren te a dɔgɛ a yebega Abel. Te Abel dɛna go'ola te a keema Kain dɛna kaara. 3Te la wa'ana na paɛ saŋa kayema te Kain tare a samanɛ zuo dia bo'olom na te a bo Na'ayenɛ. 4Te Abel gaŋɛ a go'olom la poan duŋsɛka te ba dɔgɛ yia a dunhe la poan la na kaanbɛ, dekɛ ka kaam la nyɔ' bo Na'ayenɛ. Te Na'ayenɛ nini tegɛ la Abel bo'olom la, 5ge ka to'e Kain bo'olom la. Te Kain suunre nyie te a nɛŋa zuŋe. 6Te Na'ayenɛ soke Kain yeti, Bene te ho suunre nyie te ho nɛŋa zuŋe bala? 7Ho han eŋɛ ne sɛla n ane soŋa n kan to'e ne? Ge ho ka eŋɛ sɛla n ane soŋa. Bala behɛ soŋa ge be'em n bala gan'an ho koleŋa nɔɔrɛn te bo zɛ hɔ la. Bo bote bo sɔna ho mɛ, ge da sakɛ bo bo. Teregɛ nyaŋɛ bɔ. 8Te Kain ta yele a yebega Abel yeti, Bahɛ te to sige bɔn'en ha. Ban ta bɔna bɔn'ɔn la poan ha la, te Kain kɔ' zaberɛ la a yebega Abel ko' en. 9Te Na'ayenɛ soke Kain yeti, Ho yebega Abel la bɛɛ? Te a yeti, Mam ka mi'. Mam de n yebega la gura? 10Te Na'ayenɛ yeti, Ho eŋɛ la bene wa? Kɛleha, ho yebega la ziim n bala gan'an teŋa kɛla bɔ'ɔra mam na wa. 11Nananawa sagaŋɔ dole ho, ge me wan sa'ɛ hɔ teŋsɛka n ya'ɛ ka nɔɔrɛ nyu' ho yebega ziim la ho nu'uhen la bahɛ. 12Ho han kɔ, teŋa wa kan le maalɛ dia bo ho. Ho yeti ho yaanra mɛ teŋparɛ wa zuo kan malom nyɛ vo'ohogo. 13Te Kain yele Na'ayenɛ yeti, Namehegɔ seko te ho dekɛ bo mam la tebegɛ gaŋɛ mam mɛ. N kan ta'an zi ko. 14Zina ho sa'ahe mam teŋa wa poan mɛ n bala. Mam ka le bɔna ho nɛŋan, n wan le dɛna yaanra teŋparɛ wa zuo kan malom nyɛ vo'ohogo, te se'em woo n nyɛ mam a ko. 15Te Na'ayenɛ yele en yeti, La dage bala. Se'em woo n nyɛ hɔ ko, a wan nyɛ leregere sugumnɔɔren boyopɔe. Te Na'ayenɛ dekɛ danlehom daanlɛ en. Bala te se'em woo n nyɛ en kan ko en. 16Te Kain yehe Na'ayenɛ nɛŋan keŋɛ ta kɛn'ɛra Nod teŋa n boe Eden dapɔya bɔba ha la poan. 17Te Kain nɛ a pɔga soŋen te ka yee sea dɔgɛ Enok. Bala ma'an te Kain boe bini mɛta la teŋkantɛ, nya dekɛ teŋa la segɛ a dayɔa Enok. 18Te Enok ta di pɔga dɔgɛ a dayɔa Irad, te Irad dɔgɛ Mehuyael, te Mehuyael dɔgɛ Metusael, te Metusael dɔgɛ Lamek. 19Te Lamek di pɔgɔba bayi', te kayema yu'urɛ dɛna Adah, te kayema me yu'urɛ dɛna Zila. 20Te Adah dɔgɛ bodibila segɛ ka Yabal. Yabal buuri n de sɛba n eere tin'ira sogora kɛn'ɛra ge go'ola dunhe la sɔyaaba. 21Te a tara yebega te ka yu'urɛ dɛna Yubal. Enŋa n de buuri se'a n ŋmɛ'ɛre kɔnlɔ, ge pɛɛbera yiihe la sɔyaaba. 22Te Zila me dɔgɛ bodibila segɛ ka Tubal Kain. Enŋa me dela kuta, tara nyɔgom la kuto maala tooma lɔgɔrɔ yema yema. Tubal Kain tanya n de Naama. 23Te Lamek yele a pɔgɔba la yeti, Adah la Zila, kelehe ya mam. Kelehe ya n yetɔgom wa. Nɛra n pɔgɔlom mam te mam ko' en. 24Ba han wan lerege se'em n ko Kain sugumnɔɔren boyopɔe, ba lerege se'em n ko' mam Lamek wa sugumnɔɔren pihiyopɔe la boyopɔe. 25Te Adam le nɛ a pɔga soŋen te ka yee sea dɔgɛ bodibila, segɛ ka Set, ge yeti, Yenɛ tee bo mam la bodibila tee ze'ele Abel na'arɛ, Kain n ko en la zuo. 26Te Set ta di pɔga dɔgɛ a bia, segɛ ka Enos. Saŋkaŋa poan te nɛreba pɔhɛ tara Yenɛ yu'urɛ se'ere n yi'ire Na'ayenɛ wa la na'aha Yenɛ.

will be added

X\