Pin'ileŋɔ 38

1Bala ma'an, te Yuda ta bahɛ a sɔɔnrɔ la, ge sige ta kɛn'ɛra Adulam teŋa, la boraa yu'urɛ n de Hira. 2Bilam te Yuda ta nyɛ Kanaan teŋa boraa yu'urɛ n de Sua pɔyɔa di, 3ta nɛ ka soŋen te ka nyɔkɛ poorɛ dɔgɛ bodibila segɛ ka Er. 4Te ka le ta nyɔkɛ poorɛ dɔgɛ bodibila segɛ kaŋa Onan. 5Le ta nyɔkɛ poorɛ le dɔgɛ bodibila segɛ kaŋa me Sela. A dɔgɛ bikaŋa la Kezib teŋa poan. 6Te Yuda ta di pɔka bo a dayɔkeema Er, te ka yu'urɛ dɛna Tamar. 7Ge Yuda dayɔkeema Er wa dela potɔya te Na'ayenɛ ko' en. 8Te Yuda yele Onan yeti, Di ho keema pɔga wa, malom pɔkɔndita malema la ge nɛ ka soŋen dɔgɛ kɔma porɛ ho keema la yu'urɛ. 9Ge Onan n baŋɛ yeti kɔma la kan dɛna enŋa kɔma la, a han ta bɔna la ka soŋɔ poan te balom kena na, a ne bahɛ te ba sige la teŋa, te pɔka la kan nyɔkɛ poorɛ dɔgɛ. 10Toondena wa dela pototoonɛ Na'ayenɛ nɛŋan, te Na'ayenɛ ko' enŋa me. 11Te Yuda nya yele a dayɔa pɔga Tamar wa yeti, Ye nan lebe ho sɔ yire ta bɔna dɛna n pɔ yɔa, gura te n dayɔa Sela ta zo'e seke a di ho. Yuda n yele wana wa la dela dabeem n tare Yuda, te bikaŋa me wan ta ki wo a dayɔɔhe sena la n ki se'em la. Bala, Tamar yehe lebe la a sɔ yire ta bɔna. 12Te la bɔna bɔna te Yuda pɔgɔsɛka n de Sua pɔyɔa la ta ki, te Yuda zin'ire kele a pɔga la te la yuue, te a nya ihege daarɛ deyema yɛ'a sɛba n behere a piihe la zen'an Timna teŋa poan. Te Adulam boraa kayema n de a zɔ te ka yu'urɛ dɛna Hira lagom doohe en te ba yɛ'a. 13Te Tamar ta wom te a sera sɔ ye'ehe Timna teŋa poan ha te a ta behɛ a piihe. 14Te a ihege yɛɛ a pɔkɔɔnrɛ fuo la biŋe, ge tee fuo pin' a mɛŋa wo yiyɛa la ta zin'an nayaŋa sɛka n dole kɛn'ɛra Enaim teŋa poan bɔna sose'ere n dole yɛ'a Timna teŋan la. Se'ere n sɔe la a eŋɛ a potɛn'ɛrɛ poan te Sela zo'e mɛ ge te ba ka dekera enŋa bɔ'ɔra en. 15Yuda n ta paana nyɛ te a zin' la, a tɛn'ɛhɛ te a dela yiyɛa, la en n yɛ yiyɛɛn futo la, 16ge a ka baŋɛ te a dayɔa pɔga la n bala. Te Yuda paɛ a zen'an yele en yeti, Wa'ana te to ta gan'anrɛ. Te enŋa me soke en yeti, Ho wan bo mam la bem? 17Te a lebehe yele en yeti, N wan ta loe boa n makɛ ma'an n boohe poan tare na bo ho. Te a le soke en yeti, Ho wan sakɛ dekɛ ho sɛla biŋe n zen'an te la dɛna ho nɔpɔtɛ gan'an gura te ho ta tare n boa la na bo mam? 18Te Yuda me lebehe soke en yeti, Bem lɔkɔ te ho bɔta te n dekɛ biŋe ho zen'an te ko dɛna n nɔpɔtɛ? Te pɔka la lebehe en yeti, Ho nu'toa wa la ho doore wa te ho zanla wa. Te Yuda seren dekɛ a nu'toa la a doore bo pɔka la, ge te ba gan'anrɛ. Te pɔka la ta yee sea. 19Bilam n ba'ahɛ la, te pɔka la lebe kule ta yɛɛhɛ fuseto te a yɛ ne yehe la biŋe, ge lebehe dekɛ a pɔkɔnfuto la yɛ. 20Te Yuda me paɛ ge dekɛ boa la tom a zɔ la n de Adulam teŋa boraa la te ka tare na ge to'ohe a lɔgɔrɔ la te a dekɛ biŋe yiyɛa la zen'an la na bo en. Te a wa'ana ɛ wuu ka nyɛ ka, 21ge nya soke teŋa la borase'ehe yeti, Yiyɛa la n ne zin'an Enaim sore wa kɛŋkɛleŋa bɔba wa la bɛɛ? Te ba lebehe yele en yeti, Yiyɛa ka tabelɛ pon bɔna ka'lam. 22Te a ɛ koŋe ge lebe Yuda zen'an ta yele en yeti, Mam ka nyɛ yiyɛa la, ge soke teŋa la poan borase'ehe, te se yele mam yeti, yiyɛa ka tabelɛ pon bɔna ka'lam. 23Te Yuda lebehe yeti, La dage yele. Bahɛ ta a tara en tare sɛla la, han dagana bala to wan ta lebege kɛhega lɔkɔ. La han pon dɛna sɛla woo, mam ka pan'ahɛ en. Mam dekɛ boa wa tom hɔ, te ho keŋɛ ta ɛ en ka nyɛ. 24Te la ta paɛ ŋmarehe setan' te nɛreba yele Yuda na yeti, Ho pɔyɔa Tamar la sagom mɛ. Ka tare la poorɛ. Te Yuda tanhɛ yeti, Tare ya en yehe na nyɔ' en ko. 25Ban ta maahom tara pɔka la te ba yehe na la, te ka bo ka sera sɔ la sɔɔleŋa yeti, Nɛre se'em n sɔe lɔgɔrɔ wa la n bo mam poorɛ wa, ge le yele pa'ahɛ yeti, bala to'e lɔgɔrɔ wa behɛ nya ho wan baŋɛ nɛre se'em n sɔe nu'toa wa la doore wa. 26Te Yuda baŋɛ lɔgɔrɔ la yeti, Pɔka la dela tontɔɔ gana mam. Mam n ka dekɛ en bo n dayɔa Sela la n sɔe te pɔka wa eŋɛ mam wana wa. Yehe de daarɛ, Yuda ka le makɛ nɛ pɔka la soŋen. 27Te la ta paɛ ka dɔgom saŋa, te kɔma la dɛna leeba. 28Te n virige la, te bia la kayema tuhe ka nu'o na. Te se'em n dɔgɔhe en la dekɛ gunmɔlɔga lo' a nu'o la ge yeti, Ena n yehe yia na. 29Te bia la le lebehe ve'e a nu'o la lebe ha, te ayema la n bala tee yehe na. Te se'em n dɔgɔhe la yeti, Ho yu'ɛ la ho mea sore yehe na. Bala te ba segɛ en Perez la. 30Pooren te ayema la te ba dekɛ gunmɔlɔga lo' a nu'o la me yehe na, te ba segɛ enŋa yu'urɛ te Zera.

will be added

X\