Pin'ileŋɔ 33

1Te Yakob gorege a zuo behɛ a nɛŋa tontɔɔ ha te Esau n bala kena na la a boraa kɔbehe senaahe la. Te a yelehe a kɔma la bo a pɔgɔba Lea la Arakel ge bo pɔsɔɔrɔ toyi' la me, 2nya bahɛ te pɔsɔɔrɔ toyi' la la ba kɔma sɛba ta a yelege bo ba la tole nɛŋa, te Lea la a kɔma sɛba te a yelege bo n la tagalɛ te Arakel la Yosef yee pooren 3ge te a mɛŋa nya tole nɛŋa ha. N ta pɔnra Esau la, a dɔnbelɛ teŋa la sugumnɔɔren boyopɔe bo Esau. 4Te Esau zɔ to'ohɛ en, kɔkɛ en, te ba zan'an lagom kɛla. 5Te Esau nyɛ te pɔgɔhe la la se kɔma la kene na. Te a soke yeti, Bane n bala lagom dɔla hɔ wa? Te Yakob yele en yeti, Yenɛ n pee poorɛ bo ho yameŋa la nɛresɛba n bala. 6Te pɔsɔɔrɔ la la to kɔma la paɛ na dɔnbelɛ teŋa bo Esau. 7Te Lea me tagalɛ la a kɔma, me paɛ na dɔnbelɛ teŋa bo Esau. Te Yosef la a ma Arakel me paɛ pooren na dɔnbelɛ teŋa bo Esau. 8Te Esau le soke yeti, Ge dunhe kekeko la te n to'ohɛ se sore la me? Te Yakob lebehe en yeti, Duŋse'ehe dela hom n daana wa to'e bogolɛ ho suunre. 9Te Esau yele en yeti, N yebega wa, mam n pon tara sɛla la gaŋɛ mɛ. Bala tara soŋɛ ho mea. 10Te Yakob me zagahɛ ge yeti, Ho han seren wan eŋɛ mam som, to'e bo'olom wa. Se'ere n sɔe la, mam n pon nyɛ ho nɛŋa wa, la ane wo n nyɛ la Yenɛ nɛŋa la. Ho nya han to'e mam bo'olom wa, la wan pee mam poorɛ gaŋɛ. 11Bala n belone ho mɛ te ho to'e bo'olom sebo te ba tare na bo ho la. Se'ere n sɔe la, Yenɛ poorɛ pee la mam mɛ te a bahɛ te n nyɛ sɛla woo te n bɔta. Yakob pɛnregɛ la bala tara tara te Esau ta to'e a bo'olom la. 12Ge Esau nya yele Yakob yeti, Bahɛ te n kɔlegɛ hɔ te to keŋɛ. 13Te Yakob lebehe en yeti, N daana, ho mi' te kɔma wa ba' pɔ'ɛ mɛ. Te la me sona te n beha pebibihe wa, la nii se'e n tare nagabibihe te se mɔgɔra la soŋa. Bala, to han yeti to pe'e ba zan'an kanbelɛ keŋɛ daanyenɛ, dunhe la zan'an wan ki. 14Bala n daana, deŋɛ nɛŋa kena ge te n me bɔna pooren kena na la dunhe la la se kɔma la la kɔmbibihe wa finfiinhe na paɛ hɔ Seir teŋa poan na. 15Te Esau yeti, La ye han dɛna bala, bahɛ te n loe n nɛreba wa basɛba bahɛ ho zen'an te ba lagom soŋɛ ho na. Te Yakob lebehe soke en yeti, Bene te ho nɔŋɛ bala? Hom n daana wa n pon eŋɛ mam som sebo la seke ya. 16Daanden daarɛ mea te Esau ze'ele Yakob zen'an lebe kule a teŋa Seir poan na, 17te Yakob me keŋɛ Sukot teŋa poan, ta mɛ yire bilam kɛn'ɛra a mɛŋɛ, ge tin' zen'enhe bo a dunhe la me. Bala te ba yi'ira zen'an la Sukot la. 18Yakob ze'ele Padan Aram teŋa keŋɛ la yɔle yɔle na paɛ Sekem teŋa n boe Kanaan teŋa poan, nya tin' a sogorɛ teŋa la bɔn'ɔn poan. 19A da' zen'an la la Hamor n de Sekem sɔ la zen'an sanlema kpila kɔbega, nya tin' a sogorɛ ka poan kɛn'ɛra. 20Bilam te a mɛ' bimbine segɛ ka te Israel Yenɛ n de Yenɛ.

will be added

X\