Pin'ileŋɔ 32

1Te Yakob to'e a sore yɛ'a a sɔ teŋa, te Yenɛ soŋoreba dɔla en. 2Yakob n ta baŋa ba la, te a yeti tiiheŋɔ wa dela Yenɛ tiiheŋɔ. Bala te a segɛ zen'an la yu'urɛ te Mahanaim. 3Te Yakob tom nɛreba te ba deŋɛ nɛŋa ta nyɛ a keema Esau n boe Seir teŋa la n boe Edom teŋa poan la 4pa'alɛ ba yeti, Yan wan ta yele n daana Esau se'em n wana, Ho yameŋa Yakob yeti, enŋa ne kɛn'ɛra mɛ la Laban tara tara la saŋkana wa. 5N tare nii la bonhe la piihe la boohe la boraa yamehe la pɔsɔɔrɔ. Mam n dekere sɔɔleŋa kana wa bɔ'ɔra ho na te ho zɔ n ninbɔn'ɔn. 6Te sɛba te a tom la keŋɛ ge lebena yele Yakob yeti, Tomam paɛ ho keema Esau zen'an bo en ho nɔɔrɛ la, te a me maahom kena na te a to'ohe hɔ. A tare la boraa kɔbehe senaahe kena na. 7Te dabeem la ninbɔn'ɔn kɛn' Yakob, te a yelege nɛresɛba n boe la en la sugumnɔɔren boyi', ge yelege piihe, nii, la yogoma la me sugumnɔɔren boyi', 8ge nya yele bo a mɛŋa yeti, Esau han wa'ana nan zabera la wele deyema, wele deyema la wan zɔ peɛn. 9Te Yakob nya sohɛ Na'ayenɛ yeti, N sɔ Abraham la Isaak Yenɛ wa, hom n de Na'ayenɛ se'ere n yele mam te n lebe n sɔ teŋa wa na, n mɛŋa nɛreba zen'an ge ho nu'o wan paga n zuo. 10Mam pɔ'ɛ mɛ ka nare ho zo'ohogɔ la ho birikinte sɛka te ho dekɛ pa'alɛ mam ho yameŋa wa la? Dage doore ma'an te mam dekɛ wa'ana yakɛ Yordan kolaa wa n ma'an, ge nananawa nya panrɛ yelehe n mɛŋa boyi' wa? 11Mam sohore la hom te ho fan' mam n keema Esau nu'uhen bahɛ. Se'ere n sɔe la, mam tare la dabeem la en te a wan wa'ana zabɛ la mam la pɔgɔhe wa la se kɔma wa. 12Hom n daa yele mam yeti, N wan eŋɛ hɔ soŋa, te ho yaahe wi'ɛ wo kolaa tentɔnbin'ihegɔ la, kan ta'an kanlɛ. 13Yakob yee la bilam gan'arɛ yu'uŋɔ la. Ge yehe a lɔgɔrɔ la poan toseto te a dekɛ bo a keema Esau. 14N yehe lɔgɔseto dela, bosa'ara kɔbehe seyi' la botelehe pihiyi' la pesa'ara kɔbehe seyi' la peraahe pihiyi' la 15yogomayan'ahe pihitan' la ba kɔma la nagayan'ahe pihinaahe la lɔlehe pia la bonyan'ahe pihiyi' la bondɔɔrɔ pia. 16A ganhɛ la lɔgɔtona bo a yamehe la, yameŋa woo la ka dunhe. Ge pa'alɛ ba yeti, Pe'e ya dunhe la tole nɛŋa, ge bahɛ ya te fole gan'an dunhe la buuri woo te ya pɛ'ɛra la pooren, da pe'e ya ba te ba lagom taaba. 17Ge a nya pa'alɛ ba se'em n wan pe'e a dunhe bɔna nɛŋa la yeti, N keema Esau han ta to'ohɛ hɔ soke yeti, Hom dela ane nɛra? Ho ye' la bɛ? La ane n sɔe duŋse'ehe n boe ho nɛŋan wa? 18Ho yeti, Se dela Yakob dunhe te a loe te n tare na bo n daana Esau, ge Yakob mɛŋa boe pooren kena na. 19Yakob pa'alɛ se'em n tagalɛ la me bala, pa'alɛ se'em n tagalɛ botan' la, la sɛba woo n tagalɛ la ba dunhe yema yema la zan'an te ba han ta to'ohɛ Esau, ba zan'an yele wo yiadaana la n yele se'em la. 20Ya tɛnra soŋa la ya yele en te, Ho yameŋa Yakob boe pooren kena na. Yakob tɛn'ɛhɛ bo a mɛŋa yeti, N wan bogolɛ a suunre la bo'olom bona wa n deŋere nɛŋa wa. Pooren a nya han ta nyɛ mam, daanse'ere a wan to'e mam. 21Bala zuo te Yakob bahɛ te a bo'olom la deŋɛ nɛŋa ge te a mɛŋa yee gan'arɛ tiiheŋɔ la poan de daarɛ. 22Yu'uŋɔ koŋɔ mea poan te Yakob ihege la a pɔgɔba bayi' la la a pɔgɔba pɔsɔɔrɔ toyi' la, la a kɔma pia la ayena yakɛ Yabok kolaa la teŋa. 23A tare la bama la a lɔgɔrɔ la zan'an yakɛ kolaa la ta bahɛ, 24ge yee yakenɛ deyema la na a ma'an. Te boraa kayema wa'ana meera le en, tara tara te beere ta yelegɛ. 25Boraa la n ta behɛ te a kan nyaŋɛ Yakob la, te a tɛnbɛ Yakob yeo alegɛ. Te Yakob sina ge meera la en. 26Te boraa la tanhɛ en yeti, Bahɛ mam te n keŋɛ ge beere yii ya. Te Yakob me lebehe yele en yeti, Ho han ka kan' som bahɛ mam zuo, mam me kan bahɛ hɔ. 27Te boraa la soke en yeti, Hom yu'urɛ? Te Yakob yeti, Mam yu'urɛ dela Yakob. 28Te boraa la yeti, Ho yu'urɛ kan le dɛna Yakob. Ho yu'urɛ nya wan dɛna la Israel. Se'ere n sɔe la, ho zabɛ mɛ la Yenɛ la saaleba nyaŋɛ. 29Te Yakob soke en yeti, N belone ho mɛ pa'alɛ mam ho yu'urɛ. Te a lebehe soke Yakob yeti, Bene te ho ɛɛra mam yu'urɛ? Ge daa kan' som bahɛ a zuo bilam. 30Bala zuo te Yakob segɛ zen'an la te Peniel. De vɔnrɛ dela, mam nyɛ Yenɛ la n niho ge ka ki. 31Wontɛɛŋa ta gaŋɛ zuo teŋasoka mɛ, ge te a nya du'uhe gaŋɛ Peniel teŋa. Se'ere n sɔe la a yeo n alegɛ. 32Bala zuo te Israel buuri la zina me ka ɔbera duŋa yeo, Na'ayenɛ n alegɛ Yakob yeo la zuo.

will be added

X\