Pin'ileŋɔ 25

1Te Abraham malom di pɔka kayema te ka yu'urɛ dɛna Ketura. 2Te kaŋa me dɔgɛ Zimran la Yoksan la Medan la Midian la Isbak la Suah bo en. 3Te Yoksan me dɔgɛ Sheba la Dedan. Dedan yaahe n de Assurdoma la Letusdoma la Leumdoma. 4Midian dayɔɔhe n de Epah la Eper la Hanok la Abida la Eldaa. Ketura yaahe n bala. 5Te Abraham dekɛ sɛla woo n de a lɔkɔ eŋɛ Isaak nu'uhen. 6Ge bo a pɔgɔbɔ'ɔrenhe kɔma la me lɔgɔrɔ ge bahɛ te ba yehe a yire la poan, fɔnregɛ a dayɔa Isaak zen'an lebe dapɔya bɔba teŋa la poan ha. Bala ma'an te Abraham nan vɔe. 7Abraham vom yuuma zan'an teŋa wa zuo dela yuuma kɔbega la yuum pihiyopɔe la anuu. 8Abraham korogɛ paɛ mɛ ge nya ki. A dela boraa n di yuuma te la ka tare makerɛ ge nya ki. Te a nɛreba lagahɛ na kele en. 9Te a dayɔɔhe Isaak la Ismael laɛ en Makpela taŋa yoko la n lɛm Mamre teŋa dɛna Zohar n de Hiti boraa dayɔa Epron samanɛ 10te a da' dɛ Het boraa la zen'an la. Bilam te ba laɛ Abraham pa'ahɛ a pɔga Sarah poan. 11Abraham n ki ba'ahɛ la, te Yenɛ kan' som bahɛ a dayɔa Isaak zuo. Bala ma'an te Isaak kɛn'ɛre la Beer Lahai Aroi teŋa poan. 12Abraham dayɔa Ismael la te Sarah pɔsɔɔ Hagar n de Mizraim teŋa pugula la dɔgɛ bo Abraham la yaahe yɛla n wana. 13Ismael dayɔɔhe yu'ura n wa'ana golehɛ tagalɛ taaba wo ban dɔgɛ ba se'em la. Nebaiot n de Ismael dayɔkeema, tagala Kedar tagala Adbeel tagala Mibsam tagala 14Misma tagala Duma tagala Massa tagala 15Hadad tagala Tema tagala Yetur tagala Napis nya ba'ahera Kedema. 16Ismael dayɔɔhe yu'ura n bala. Bama n de sɛba n de nadoma teŋse'ehe te ba zin'an se poan. Sɛla woo n ne yeti la eŋɛ ba zen'enhe la woo poan, bama ne dɛna nɛŋadoma. 17Ismael vom yuuma teŋa wa zuo dela yuum kɔbega la yuum pihitan' la ayopɔe, ge te a nya ki'. Te a nɛreba lagahɛ na kele en. 18Ismael yaahe n sɔe zen'sɛka n ze'ele Havila teŋa ta paɛ Sur teŋa, lɛm la Mizraim teŋa beene la, wo hom kenɛ tɔɔra Assur teŋa poan ha la. Bama la ba sɔɔnrɔ la ka nyɛte taaba niho. 19Abraham dayɔa Isaak yɛla n wana. Abraham n dɔgɛ Isaak. 20Te Isaak ta paɛ yuum pihinaahe, di a pɔga Arebeka n de Betuel n de Aram teŋa n boe Padan Aram teŋa poan boraa la pɔyɔa. Laban la Aram tanya n bala. 21Te Isaak sohɛ Na'ayenɛ a pɔga la zuo. Se'ere n sɔe la ka dela kondɔgɔrɛ. Te Na'ayenɛ lerege a sohoga la te a pɔga Arebeka nyɔkɛ poorɛ. 22Te kɔma la bɔna a pooren la ha gbita taaba. Te a soke yeti, Bene te wana eta mam wa? Nya keŋɛ te a ta soke Na'ayenɛ behɛ. 23Te Na'ayenɛ lerege en yeti, Teŋhe seyi' n boe ho pooren wa. Nɛreba bayi' n boe ho pooren wa wan sige na yelehe taaba. Ba ayema wan kpe'em gana ayema la. Keema la wan tee dɛna yebega la taroma. 24Lan ta paɛ a dɔgom la, a dɔgɛ la leeba te ba dɛna bodibinto. 25Se'em n yehe yia na la kɔ'ɔn dɛna la mɔlega, te a iŋa zan'an pin' la kɔnberɔ wo a yɛ la kɔnberɔ fuo la. Bala te ba segɛ enŋa yu'urɛ te Esau. 26Enŋa n sigere na la, te yebega la me kɔ'ɔn taaba na, ge gin' Esau la kaleŋkan'arɛ. Bala te ba segɛ enŋa me te Yakob. Isaak dela yuuma pihiyoobe ge dɔgɛ leeba la. 27Te kɔma la zo'e na te Esau dɛna mɔkɛn'ɛra, kɔ'ɔn nɔŋɛ mɔen ɛɛa, te Yakob me dɛna nɛra n ane baanlam bɔna yire. 28Isaak n nɔŋɛ mɔen nɛnɔ la zuo, a nɔŋɛ la Esau, te Arebeka me nɔŋɛ Yakob. 29Daarɛ deyema te Yakob bɔna bini kiina a zɛɛnrɔ te Esau ze'ele a mɔen eere la kɛn' na, te kom peelega tu'ura en. 30Te a yele Yakob yeti, Fan' mam bahɛ la ho zɛnmɔlɔgɔ wa ge kom n tu'ure mam. Bala te ba yi'ira en Edom la. 31Te Yakob yele en yeti, Koohe ho kenɔ la bo mam ge te n bo ho. 32Te Esau yele en yeti, Behɛ mam kiiri ge te ho tɔgɔra sɛla. Bene yɔɔnɔ n boe kenɔ poan? 33Te Yakob sina ge le yele en yeti pɔ' yia. Te a seren pɔ' nɔɔrɛ dekɛ a kenɔ la koohe bo Yakob. 34Te Yakob nya kanbegɛ zɛnmɔlɔgɔ la, dekɛ boroboro pa'ahɛ bini bo en. Te a obe ge nyu' ge ihege yehe. Sose'ere te Esau doohe zagahe a kenɔ la n bala.

will be added

X\