Pin'ileŋɔ 23

1Sarah vom yuuma zan'an dela yuum kɔbega la yuuma pihiyi' la ayopɔe, ge te a ki. 2A ki la Kiriat Arba teŋa n boe Kanaan teŋa poan se'em n de Hebron teŋa, te Abraham kele koonɔ a zuo, 3ge nya ihege ze'ele a pɔga la zuin tɔgɛ bo Hitidoma la yeti, 4Mam dela saana bɔna la ya. Bala koohe ya zen'an bo mam te n pin'ira n kum. 5Te Hitidoma la lerege Abraham yeti, 6To daana wa, kelehe, ho dela nabia bɔna la tɔ. Hom yeem bɔta yɔɔrɔ seto ho mɛŋa loe pin'ira ho kum. Se'em ka boe to poan wan mɔŋɛ hɔ a yɔɔ te ho da pin' kum. 7Te Abraham ihege saazuo dɔnbelɛ teŋa bo Hitidoma sɛba n sɔe teŋa la, 8ge yele ba yeti, Ya han wan sakɛ bo mam te n pin'ira n kum ka'lam, ya ye kelehe mam la ya belom Zohar dayɔa Epron bo mam, 9te a dekɛ Makpela taŋa yoko la n de a denɛ bɔna a va'am la fehegan ha la bo mam. Yele ya en te a koohe en bote ko se'em bo mam te n ze'ele ye nɛŋan yɔ' te ko dɛna mam kum pin'an zen'an. 10Bala ma'an te Epron wa n de Hiti boraa wa zin' mɛ la nɛreba la, nya yele Abraham nɛreba la n lagahɛ na zɛ'a teŋa la nayaŋa nɔɔrɛn la nɛŋan yeti, 11Aai n daana, kelehe mam yeti n yele sɛla wa. Mam yeti va'am la la taŋa la n tare yoko kantɛ ka poan la, mam ze'ele la nɛreba wa nɛŋan zina dekɛ zen'an wa bo ho te ho tara pin'ira ho kum. 12Te Abraham le dɔnbelɛ teŋa bo teŋa la doma la, 13ge yele Epron nɛreba la tobain yeti, Ho han wan seren dekɛ zen'an la bo mam, mam wan yɔ zen'an la lan sone te n yɔ ka se'em. Sakɛ bala te n yɔ ge tara zen'an la pin'ira n kum bini. 14Te Epron lebehe yele Abraham yeti, 15Kelehe mam n daana, zen'an la dela sanlenpeelega kpila kɔbehe senaahe. Ge bama dela bem mam la hom teŋasoka? Tara la ho pin'ira ho kum bini. 16Te Abraham sakɛ Epron n yi' sanlema la nɔɔrɛ se'em la, seren tare sanlema la te Epron yi' se'em te nɛra woo wom la, sanlenpeelega kpila kɔbehe senaahe la, te a zɔna wo da'areba n magare se'em la na. 17Lan eŋɛ se'em te Epron samanɛ la n boe Makpela poan lebehe Mamre teŋa dapɔya bɔba la taŋa yoko n boe samanɛ la de tiihe la n ze' de beene zuo la zan'an lebege Abraham sɔ'ɔlom n bala. 18Hitidoma la n lagahɛ teŋa la nayaŋa nɔɔrɛn na la zan'an nini nyɛ mɛ. 19Te ba nya ba'ahɛ bala te Abraham nya zi a pɔga Sarah ta pin' taŋa yoko la n boe Makpela teŋa, lɛm la Mamre bɔna Kanaan teŋa poan la, zen'sɛka te ba yi'ira Hebron la. 20Bala te taŋa la te yoko bɔna ka poan la la samanɛ la zan'an doohe kɛn' Abraham nu'uhen n bala.

will be added

X\