Pin'ileŋɔ 22

1Saŋa kayema te Yenɛ ta yeti a makɛ Abraham behɛ, nya yi' Abraham yeti, Abraham, te Abraham sakɛ yeti, Naa, n daana mam wana. 2Te Yenɛ yele en yeti, Tare ho dayɔa la, ho dayɔa kayena Isaak la, ho dayɔsɛka n de ho tile la keŋɛ Moria teŋa poan ta dekɛ ka kaanbɛ zoore zuo te n yeti n pa'alɛ hɔ bo mam. 3Yiimbeere bolika te Abraham ihege bagɛ a boŋa, loe a yamehe seyi' pa'ahɛ a dayɔa Isaak poan te ba keŋɛ ta ŋma dɔɔrɔ seto n wan seke nyɔ'an bo'olom kaanbegɔ la. Ban ŋma dɔɔrɔ la maahom ba'ahɛ la, te a nya to'e sore te ba yɛ'a zen'an te Yenɛ yele en la. 4Dabeha atan' daarɛ, te Abraham gorege zuo behɛ a nɛŋa tontɔɔ ha, te zen'an te a yɛ'a la nyɛte na. 5Te a yele a yamehe la yeti, Yee ya ka'lam la boŋa wa ge te mam la bia wa paɛ keha ta na'ahɛ Yenɛ ge lebe na. 6Te Abraham dekɛ dɔɔrɔ seto n wan ta nyɔ' bo'olom kaanbegɔ la ziile a dayɔa Isaak, ge zanla bugum la so'a te ba bayi' la lagom kena. 7Te Isaak tɔgɛ bo a sɔ Abraham yeti, N sɔ, te Abraham yeti, Ɛɛn n dayɔa, te Isaak yeti, Bugum la dɔɔrɔ la n wana, ge pebila la bɛɛ te ho wan ta dekɛ kaanbɛ nyɔ'an bo'olom kaanbegɔ la? 8Te Abraham lebehe yeti, N dayɔa, Yenɛ mɛŋa wan bo pehego la. Te ba kena. 9Ban ta paɛ zen'an te Yenɛ pa'alɛ la, te Abraham maalɛ bimbine ba'ahɛ, maalɛ dɔɔrɔ la pagalɛ ba'ahɛ, ge nya lo' a dayɔa la pagalɛ dɔɔrɔ la zuo, 10ge dekɛ so'a te a kɔrɔgɛ a dayɔa la. 11Te Na'ayenɛ soŋora ze'ele saazuo ha ge yi' Abraham yeti, Abraham, Abraham. Te Abraham sakɛ yeti, Naa n daana, mam wana. 12Te a yeti, da dekɛ ho nu'o kalom bia la. Nananawa mam mi' te ho zote Yenɛ, la hom seren sakɛ te ho dekɛ ho biyeŋa wa kaanbɛ bo Yenɛ wa. 13Te Abraham gorege a zuo te gɛnra yɔrɛ pehego iila te ko zɛ'a bilam, te a paɛ nyɔkɛ pehego la tee kaanbɛ ge bahɛ a bia la. 14Bala te Abraham segɛ zen'an la yu'urɛ yeti, Na'ayenɛ Wan Bo'. Tara tara la zina, ba kelom tara de magaha me yeti Na'ayenɛ zoore la zuo, Na'ayenɛ wan bo. 15Te Na'ayenɛ soŋora la le ze'ele saazuo ha yi' Abraham yele en yeti, Na'ayenɛ n yele se'em n wana, 16N pɔ' n mɛŋa, te hom n eŋɛ se'em wa, seren sakɛ dekɛ ho dayɔa kayena wa te ho kaanbɛ bo mam la. 17N wan kan' som bahɛ ho yaahe zuo te ba wi'ɛ zo'e wo ŋmarebibihe n boe saŋgbana poan la bii kolaa kantɛ tentɔnbin'ihegɔ n zone se'em la. N wan bahɛ te ho yaahe sɔe ho diŋdoma teŋhe sɔna. 18La wan doohe la hom buuri wa poan, te kan'somɔ wan paara teŋa wa zan'an, hom nam mam se'em wa zuo. 19Te Abraham nya ze'ele bilam lebe a yamehe la zen'an te ba zan'an le to'e sore lɛbera Beerseba teŋa poan na. Te Abraham nya ta kɛn'ɛra bilam. 20Yele ana pooren te nɛra ta wa'ana yele Abraham yeti a sɔɔn Nahor pɔga Milka dɔgɛ la dayɔɔhe bo en. 21Uz n de a dayɔkeema te Buz tagalɛ te Kemuel se'em de Aram sɔ la me tagalɛ, 22nya bɔ'ɔra Kesed tagala Hazo tagala Pildas tagala Yidlap nya bo Betuel. Te Betuel me dɔgɛ Arebeka. 23Milka dɔgɛ la bodibinto tonii bo Abraham sɔɔn Nahor. 24A pɔgɔbɔ'ɔreŋa me boe te a yu'urɛ dɛna Areumah. Enŋa me dɔgɛ bodibinto te ba yu'ura dɛna Teba la Gaham la Tahas la Maaka.

will be added

X\