Pin'ileŋɔ 2

1Saazuo la teŋparɛ la sɛla woo n boe ba poan n naam ba'ahɛ se'em n bala. 2Dabeha ayopɔe daarɛ la te Yenɛ pon ba'ahɛ sɛla woo te a tona la mɛ. Bala dabeha ayopɔe daarɛ la, a vo'ohe a tooma la woo poan mɛ. 3Te Yenɛ kan' bahɛ dabeha ayopɔe daarɛ la ge loe de te de dɛna toolom daarɛ. Se'ere n sɔe la, denɛ poan te a vo'ohe a naaŋɔ tooma la woo te a tom la poan. 4Saazuo la teŋparɛ la te Na'ayenɛ n de Yenɛ la naam ba ba'ahɛ te ba ana se'em n wana. 5Bonbule buute nan ka bule yehe teŋparɛ la zuo bii tia buute bule yehe na. Se'ere n sɔe la, Na'ayenɛ n de Yenɛ la nan ka bahɛ te saa ni bahɛ teŋkɛ'ɛŋa la zuo, te asaala me nan pon ka bɔna ka zuo wan tona. 6Ko'nini n ne tanhɛ na ɔkɛ teŋa la zen'an woo mɛrema. 7Te Na'ayenɛ n de Yenɛ la vaɛ teŋa wa tentɔnɔ yagom boraa, vo'ohe vom eŋɛ a nyɔya poan, te a ihege dɛna asaala. 8Te Na'ayenɛ n de Yenɛ la aan bɔbɔrɛ deyema n boe dapɔya bɔba dɛna Eden, maalɛ va'am bini tare boraa la te a yagom la ta bahɛ va'am la poan. 9Te Na'ayenɛ n de Yenɛ la bahɛ te tiihe yema yema yehe va'am la poan na. Tiise'ehe n tare ninpeelom, ge dɛna dia. Te tisɛka n wone vom la tisɛka wɔla n bo'ore som la be'em yam la zɛ'a va'am la teŋasoka. 10Te kolaa ze'ele Eden poan zɔta te ka ko'om bahera va'am la. Ka pɔhɛ la Eden poan mea yagom na'ma anaahe, te na'ma la dɛna kolaahe kanra. 11Yia kolaa yu'urɛ la dela Pison. Kaŋa zote dɔla Havila teŋa la poan zan'an. Teŋsɛka te sanlema bɔna ka poan la. 12Sanlema se'a n boe teŋkaŋa poan la dela salensoma ma'an, la digilom la kuga ponpɔnrɔsabelega me bɔna. 13Kolaa sɛka n pa'ahɛ seyi' la dela Gihon Kolaa. Kaŋa zote dɔla la Kus teŋa la poan zan'an. 14Kolaa sɛka n pa'ahɛ setan' la dela Tigris Kolaa. Kaŋa zote dɔla la Assur teŋa dapɔya la poan zan'an. Kolaa sɛka n pa'ahɛ senaahe la dela Euprates Kolaa. 15Te Na'ayenɛ n de Yenɛ la tare boraa la ta bahɛ Eden va'am wa poan, te ka bɔna bo poan ge maala bɔ. 16Te Na'ayenɛ n de Yenɛ la bo boraa la nɔɔrɛ yeti, Dita tiise'ehe woo n boe va'am wa poan la wɔla. 17Ge da makɛ di tisɛka n woni wɔla se'a n tare som la be'em yam la wɔla la. Daanse'ere daarɛ te ho di tikana wa wɔla la, ho wan ki. 18Te Na'ayenɛ n de Yenɛ yeti, La ka ane soŋa te boraa wa bɔna ka ma'an. N wan maalɛ soŋora se'em n wan makɛ la n bo en. 19Tentɔnɔ te Na'ayenɛ n de Yenɛ dekɛ yagom dunhe la woo n boe teŋparɛ zuo la, la niihe woo n ɛngere saazuo, nya tare ba wa'an boraa la zen'an na, te a behɛ n wan yi' ba yu'ura se'em. Yu'urɛ se'ere te boraa la dekɛ yi' sɛla woo la, la yu'urɛ n bala. 20Te boraa la segɛ dunhe la woo la niihe n ɛngere saazuo, la sɛla woo n boe mɔen yu'ura. Ge soŋora ka boe ba poan bo boraa la. 21Bala te Na'ayenɛ n de Yenɛ la bahɛ te gɔɔm kantɛ sige boraa la zuo te ka ginha, te foe ka sapiriga kayena. 22Ge te Na'ayenɛ n de Yenɛ dekɛ sapiriga la yagom pɔka tare ka wa'an boraa la zen'an na. 23Te boraa la yeti, Mam kɔnberɛ n wana, mam iŋganɛ n wana, a yu'urɛ dela pɔka. Se'ere n sɔe la, ba yehe en la mam poan. 24Yele dena wa zuo, boraa wan bahɛ ka sɔ la ka ma, ge dekɛ ka mɛŋa naɛ boyena la ka pɔga, te ba bayi' la lebege bonyenɛ. 25Boraa la, la ka pɔga la zan'an eere la beela ge ka mina valom.

will be added

X\