Pin'ileŋɔ 16

1Abram pɔga Sarai ziim ka makɛ tɔkɛ teŋa. Te Sarai tare Mizraim teŋa pugula na te ka dɛna a pɔsɔɔ te ka yu'urɛ dɛna Hagar. 2Bala te Sarai yele a sera Abram yeti, Na'ayenɛ n gu' mam dɔgom. Bala kɛn' paɛ n pɔsɔɔ wa, daanse'ere n ta'an doohe enŋa poan nyɛ buuri. Te Abram sakɛ Sarai nɔɔrɛ la. 3Abram kɛn' Kanaan teŋa poan la yuuma pia, ge te a pɔga Sarai dekɛ a pɔsɔɔ Hagar n de Mizraim teŋa pugula la bo a sera wa te a dɛna a pɔga. 4Te Abram nɛ Hagar soŋen, te a nyɔkɛ poorɛ. Hagar n ta baŋɛ te enŋa tare la poorɛ la, te a pɔhɛ ka nana Sarai. 5Te Sarai yele Abram yeti, Hom n sɔe tuure se'ere te mam bɔna de poan namehera wa. Mam n dekɛ n pɔsɔɔ wa bo ho. Nananawa te ko baŋɛ te ko tare la poorɛ la, a ka le nana mam. Na'ayenɛ wa ma'an n wan gankɛ mam la hom teŋasoka. 6Te Abram yele Sarai yeti, Ho pɔsɔɔ la kelom bɔna la ho nu'uhen. Hom bote en se'em la eŋɛ en. Te Sarai pɔhɛ eta Hagar vɛngela vɛngela, te la woŋɛ en te a yehe zɔta. 7Te Na'ayenɛ soŋora ta nyɛ en te a zin' ko'nini n boe la pɔgɔtia la. Ko'nini la lɛm sose'ere n dole yɛ'a Sur teŋa poan la. 8Te a yele Hagar yeti, Sarai pɔsɔɔ wa, ho ze'ele la bɛ yɛ'a bɛ? Te a lerege yeti, N zote le'eha la n kpɛ'ɛma Sarai. 9Te Na'ayenɛ soŋora la yele en yeti, Lebe ho kpɛ'ɛma la zen'an la ho ta sigehe ho mɛŋa bo en. 10Ge le yele en yeti, N wan bahɛ te ho buuri wi'ɛ teŋparɛ wa zuo ka tara kanlɛ. 11Na'ayenɛ soŋora la yele en pa'ahɛ yeti, Ho tare la poorɛ wa, ho wan dɔgɛ bodibila. Ho han ta dɔgɛ ka, ho segɛ ka yu'urɛ Ismael. Se'ere n sɔe la, Na'ayenɛ nyɛ hom di ninbɔn'ɔn se'em. 12Ka yeti ka bɔna mɛ wo mɔen buŋa la. Ka yeti ka zabera mɛ la nɛra woo, te nɛra woo me zabera la ka. Ka yeti ka ta bɔna la ka ma'an kan lɛna ka sɔɔnrɔ. 13Te Hagar segɛ Na'ayenɛ se'ere n tɔgɛ bo en la yu'urɛ yeti, Hon de Yenɛ n yɛta mam. Se'ere n sɔe la, a yeti, Mam nyɛ Na'ayenɛ n nyɛta mam. 14Bala n sɔe te ba yi'ira kolega la Beer Lahai Aroi la. Ka kelom bɔna bini zɛ'a Kades la Bered teŋhe teŋasoka. 15Te Hagar wa'ana dɔgɛ dayɔa bo Abram te Abram segɛ ka yu'urɛ Ismael. 16Abram dela yuum pihinii la ayoobe, ge te Hagar dɔgɛ a dayɔa Ismael bo en.

will be added

X\