Pin'ileŋɔ 14

1Saŋkana poan te Sinar teŋa naba Amrapel la Elasar teŋa naba Ariok la Elam teŋa naba Kedolamer la Goiim teŋa naba Tidal, 2ihege pɛɛntɛɛnrɛ la Sodom teŋa naba Bera la Gomora teŋa naba Birsa la Adma teŋa naba Sinab la Zeboiim teŋa naba Semeber la Bela teŋa, teŋsɛka te ba yi'ira Zoar la, me naba. 3Nadoma sɛba yu'ura n wa'an pooren na wa lagom la taaba la ba pɛɛntɛɛnreba, to'ohɛ nadoma bana la Sidim paberɛ poan. Yaarom Mɔgɔrɛ la n bala. 4Yuuma pia la ayi' te ba bɔna naba Kedolamer nu'uhen yuuma pia la atan' poan te ba zagahɛ te ba kan le bɔna a nu'uhen. 5Yuuma pia la anaahe poan te naba Kedolamer la nadoma sɛba woo n boe a nu'uhen la yehe pɛɛntɛɛnrɛ la Arepadoma la n boe Asterot Karnaim teŋa poan la Zuzidoma n boe Ham teŋa poan la Emdoma n boe Save Kiriataim teŋa poan la 6Horidoma n boe teŋsɛka n yage Seir Zoore zuo la, ta paɛ El Paran n lɛm pɔgɔtia la ha la poan. 7Te ba ze'ele bilam ŋmɛregɛ keŋɛ En Mispat teŋa, Kades n bala, ta zabɛ nyaŋɛ Amalekdoma sɔ'ɔlom la zan'an la Amoridoma la n kɛn'ɛre Hazazon Tamar teŋa poan la zan'an. 8Te Sodom teŋa naba la Gomora teŋa naba la Adma teŋa naba la Zeboiim teŋa naba la Bela n de Zoar teŋa naba, kan'ahɛ ba mɛŋa to'ohɛ Sidim paberɛ poan, 9te ba tɛn' la Elam teŋa naba Kedolamer la Goiim teŋa naba Tidal la Sinar teŋa naba Amrapel la Elasar teŋa naba Ariok. Nadoma banaahe n to'ohe nadoma banuu. 10Sidim paberɛ la perɛ mɛ la bolombɔgɔrɔ, te zaberɛ la ta mɔ'ɛ te Sodom la Gomora doma nya zɔta, te ba borase'ehe lu' bɔgɔrɔ la poan, te sɛba n gee la zɔ zom teŋsɛka n yage zoore zuo ha la zuo. 11Te nadoma banaahe la fan' Sodom la Gomora nadoma wa nɛreba la dia tare keŋɛ. 12Ge lagom pe'e Abram yebega dayɔa Lot la a lɔgɔrɔ zan'an tare keŋɛ. Lot kɛn'ɛre la Sodom teŋa la poan. 13Te ba ayema zɔ peɛn wa'ana yele Abram n de Hebru nɛra la. Abram kɛn'ɛre lɛm la tikanra la te Mamre n de Amori nɛra, dɛna Eskol la Aner sɔɔn, dekɛ ba mɛhe eŋɛ Abram nu'uhe la. 14Abram n wom sɔnhega la te ba nyɔkɛ a dayɔa la me la, te a yi' a pɛɛntɛɛnreba, te ba zan'an dɛna nɛreba kɔbehe setan' la nɛre pia la banii, dɛna a mɛŋa yire poan nɛreba. Te ba yehe dige ba bala ta paɛ Dan teŋa poan. 15Te yu'uŋɔ ta paɛ te Abram ihege yelehe a pɛɛntɛɛnreba la ze'ele kae diŋdoma la, zabɛ sa'ɛ ba, dige ba ta paɛ Hoba n boe Damaskus teŋa zuɔ bɔba ha la, 16nyaŋɛ fan' ba lɔgɔrɔ la zan'an la a dayɔa la la a lɔgɔrɔ la a pɔgɔba la a nɛreba la zan'an lebe na. 17Abram n keŋɛ ta zabɛ nyaŋɛ lɛbera na la, te Kedolamer la a nadoma la zan'an dekɛ ba mɛhe eŋɛ Abram nu'uhen. Te a kena na te Sodom teŋa naba yehe na to'ohɛ en Save Bɔn'en, naba bɔn'ɔn. 18Te Salem naba Melkizedek tare boroboro la daam yehe na. A dela Saazuo Daana malemadaana, 19nya kan' som bahɛ Abram zuo yeti, Na'ayenɛ Se'ere N Gane Zan'an, naam saazuo la teŋparɛ wa wan kan' som bahɛ hom Abram wa zuo. 20Na'ayenɛ se'ere n yehe ho diŋdoma nu'uhen bahɛ wa dela som ma'an Na'ayenɛ. Te Abram nya yehe lɔgɔseto woo te a fan' la, bo en a pia porogerɛ bo'olom. 21Te Sodom naba yele Abram yeti, Dekɛ nɛreba la bo mam ge tara lɔgɔrɔ la. 22Te Abram yeti, Mam deŋɛ ŋmɛ' la n nu'o teŋa yele Na'ayenɛ wa, Yenɛ se'ere n de saazuo la teŋparɛ wa zan'an naba wa, ge pɔ' nɔɔrɛ, 23te mam kan bɔta ho sɛsɛla, la guŋo me bii tagatɛ mi'an. N ka bote ho beere ta ta'an yeti hom bahɛ te Abram panrɛ. 24N ka bote ho sɛsɛla han dagana sɛla te mam nɛreba wa deŋɛ di la, la n nɛreba Aner la Eskol la Mamre, sɛba n doohe mam keŋɛ la tɔntɛ ma'an.

will be added

X\