Pin'ileŋɔ 12

1Na'ayenɛ yele Abram yeti, Bahɛ ho teŋa wa la ho sɔɔnrɔ la ho sɔ yire nɛreba wa, ge keŋɛ teŋa kayema te n wan pa'alɛ hɔ. 2N wan eŋɛ hɔ te ho lebege teŋkantɛ, ge kan' som bahɛ ho zuo. N wan eŋɛ te ho yu'urɛ dɛna yu'urɛ kantɛ, te ho dɛna kan'somɔ. 3N wan kan' som bo sɛba n kan' som bo ho, ge pɔ' bo sɛba n pɔ' bo ho. Hom zuo te kan'somɔ wan sige nɛreba woo n boe teŋparɛ wa zuo. 4Te Abram bahɛ a teŋa la wo Na'ayenɛ n yele en se'em la, te Lot doohe en. Abram dela yuuma pihiyopɔe la anuu ge ze'ele a mɛŋa teŋa Haran poan yehe. 5A tare la a pɔga Sarai la a yebega dayɔa Lot la a lɔgɔseto woo te a nyɛ, la nɛresɛba woo n de a mɛŋa nɛreba Haran teŋa poan la, te ba yehe yɛ'a Kanaan teŋa, ta paɛ bini. 6Te Abram doohe kae teŋa la poan ta paɛ Moreh tikantɛ n boe Sekem la. Bala ma'an te Kanaandoma la nan kɛn'ɛre ka poan mɛ. 7Te Na'ayenɛ nɛɛ a mɛŋa bo Abram ge yele en yeti, Ho yaahe te n wan dekɛ teŋa wa bo. Bala te Abram mɛ' bimbine bo Na'ayenɛ wa n nɛɛ de mɛŋa pa'alɛ en la. 8Abram ze'ele la bilam keŋɛ a nɛŋa tontɔɔ tɔɔra zɔya n boe Betel teŋa dapɔya bɔba ha la, ta tin' a sogorɛ. Te Betel teŋa bɔna a nɛŋa bɔba, te Ai teŋa bɔna a pooren. Te a mɛ' bimbine bilam bo Na'ayenɛ, ge po'oha Na'ayenɛ bilam. 9Te Abram ze'ele bilam keŋɛ ta paɛ Negev pɔgɔtia poan. 10Kom n wa sige teŋa la poan, te Abram ihege ka poan keŋɛ Mizraim, ta bɔna bilam dabeha ayi', kom la n ba' gaŋɛ la zuo. 11N ta pɔnra te a kɛn' Mizraim teŋa la, te a yele a pɔga Sarai yeti, Mam mɛŋa nyɛ ho soŋa n nɛɛ se'em. 12Bala, Mizraimdoma wa han ta nyɛ hɔ, ba wan yeti nɛra wa pɔga n bala. Ba wan ko mam ge di ho te hom vɔna. 13Bala, ta yeti ho dela n tanya. Bala te ba wan eta mam soŋa hom zuo, ge kan ko mam. 14Abram n ta kɛn' Mizraim teŋa poan la, te teŋa la doma pon nyɛ Sarai te a ba' som mɛ. 15Te Mizraim teŋa naba Faro kpɛ'ɛndoma ta nyɛ en wa'ana tɔgɛ a yele, ge tare en keŋɛ Mizraim teŋa naba Faro yire. 16Te a eta Abram soŋa Sarai zuo. Te Abram nyɛ piihe la nii la bondɔɔrɔ la bonyan'ahe la boraahe tontoneba la pɔsɔɔrɔ la yogoma. 17Te Na'ayenɛ dekɛ ban'an kantɛ kɛn'ɛhɛ Mizraim teŋa naba Faro la a yiredoma, Abram pɔga Sarai la zuo. 18Te Mizraim teŋa naba Faro ihege bahɛ te ba yi' Abram na. Te a soke Abram yeti, Bene te ho eŋɛ mam wa? Bene zuo te ho ka yele mam yeti ka dela ho pɔga? 19Bene zuo te ho yeti ka dela ho tanya te mam me to'e en te a dɛna n pɔga? Bala, ho pɔga n wana. To'e la ho tare ho pɔga yehe. 20Ge te a nya yele kpɛ'ɛndoma la ban wan eŋɛ Abram se'em. Te ba nya tare Abram la a pɔga la la sɛla woo te a nyɛ Mizraim teŋa poan la ta bahɛ sore te a keŋɛ.

will be added

X\