Galatɩ 5

1Krista fan' to bahɛ te to ka le dɛna da'aba. Bala zuo, ya teregɛ ze'ele wo nɛresɛba te ba fan' ya bahɛ te ya sɔna ya mɛhe, ge da le lebe ya da'aba poan. 2Yo'ɛ ya ya toba soŋa soŋa la ya wom mam Paul n tare se'ere te n yele ya wa. Ya han bahɛ te ba ŋma' ya, la pa'ale me yeti Krista n eŋɛ se'ere bo ya la dela yoo. 3Le bahɛ te n yele ya, yamam se'em han sakɛ te ba ŋma' en a mina te la dela pɛnregerɛ te a dɔla pa'alegɔ la zan'an. 4Yamam sɛba n kpeŋere ya mɛhe te ya dɔla pa'alegɔ la nimi nimi la ya ka tare tuure Yenɛ nɛŋa la, ya bɔkɛ ya mɛhe Krista zen'en. Hom ka bahɛ te Yenɛ zo'ohogɔ boe ya zuo. 5Han dɛna tomam, to doohe la Sea nam Yesu ge to potɛn'ɛra dela Yenɛ mɛŋa n wan yeti te ka tare tuure a zen'an la. 6Ge Krista Yesu poan ho ŋma' ya wo bii ho ka ŋma' wo ka pakɛ. Sɛla n pakɛ dela te to nam Yesu la te te tare nɔŋerɛ bɔ'ɔra nɛra woo. 7Ya sakerɛ la te ya daa sakɛ bo Krista wɔn te zoa te ya zɔta. Ya me daa zote soŋa soŋa. Ge ane n pon parom bahɛ te ya ka le dɔla yelemɛŋɛrɛ wa? 8A eŋɛ la wane pan'ahe ya wa? La dagɛ Yenɛ se'em n yi' ya la. 9Ba makɛ yeti, Mi'ihom wa n bahɛ te boroboro foohe na. 10Mam mi' ya soŋa soŋa te ya kan le tee bahɛ mam nɔɔrɛ la ge dɔla sɔrɔɔ seko. Ge nɛra se'em n daane ya, n pon dɛna se'em woo la, Yenɛ wan pa'ale en yam. 11Ge la han dɛna mam n sɔɔnrɔ, mam han mɔɔla te ŋmaa ane soŋa wane te mam nyɛta namehegɔ wa? La han dɛna la yelemɛŋɛrɛ, mam mɔɔle ne Yesu Krista la a punpuuredɔɔ zuo kan tare ne daaŋɔ. 12Ge nɛresɛba n daane ya wan bahɛ ya ge han bɔta ba lakɛ ba mɛhe. 13Ge han dɛna yamam, n sɔɔnrɔ, Yenɛ yi' te ya bɔna la fai. Ge da bahɛ ya te ya fai bɔŋa wa bo ya sore te ya dɔla ya kɔrɛ n bote se'ere. Bahɛ ya te ya nɔŋerɛ la bahɛ te ya soŋora taaba. 14Pa'alegɔ la zan'an ko' la yele deyena poan: Ge ton nɔŋɛ ho tadaana wo ho mɛŋa se'em la. 15Ge ya han eta taaba wo ya dela mɔɔdunhe la, mini ya te yeti ya sagom la taaba. 16Ge mam n yeti ya se'ere n wana: Te ya bahɛ te Sea la kelom pa'ala ya sore te ya da dɔla ya kɔrɛ n bote se'ere. 17Asaala kɔrɛ n lo' se'ere dagɛ se'ere te Sea la bɔta. Sea la me n bote se'ere la dagɛ se'ere te asaala bɔta. Bana bayi' wa dine mɛ la taaba. Bala ho kan ta'an eta hom bote se'em. 18Ho han dɔla Sea la n pa'ale ho sɔrɔɔ seko la, la ka nare te to dɔla pa'alegɔ la. 19Nɛra woo mi' asaala potɛn'ɛrɛ n de se'ere: se'ere dela dɛngerɔ la yelefɛn'ɛha la toonse'a n ka ane soŋa la 20kaanbera baga la sɔɔntooma la nɛreba n dine la taaba ge zabera la nyuunre la sunsunyiim la bonbɔre ninmɔ'ɔrɛ ge yɛlɛha taaba yema yema 21ga nɛresɛba nini n mɔ'ɛ la ba tadaana bonɔ la nɛresɛba n bugure ge eta yele ana taaba. N yeti ya mɛ wo mam daa pon yele ya se'em la te sɛba n ete yele ana taaba kan kɛn' Yenɛ sɔ'ɔlom la poan. 22Ge Sea la bo'ore la nɔŋere la nyeema la sunma'ahom la sugure la zo'ohogɔ la som la birikintɛ la 23sigehe ho mɛŋa la nyɔkɛ n mɛŋa. Pa'alegɔ ka boe gana yele ana wa. 24Sɛba n dole Krista Yesu la wɔne te ba kpa' ba mɛhe mɛ la ba potɛn'be'ero la sɛla woo te ba potɛn'ɛra bɔta. 25Ge Sea la han bo to vom bona paŋa wa, bahɛ ya te Sea la mɛŋa pa'ala to sɔrɔɔ. 26Da bahɛ ya te to yeti tomam n boe bii te pagara la taaba bii te nini tɛnta la taaba.

will be added

X\