Galatɩ 4

1Ge bahɛ te to yele bisɛka te a sɔ loe te enŋa n wan vaɛ a lɔgɔrɔ, kaŋa bonbilome ka tare paŋa te ka eŋɛ se'ere. Bala zuo, bikaŋa wɔne mɛ la da'aberɛ. Ge wana zan'an poan la, bikaŋa n sɔe lɔgɔrɔ la. 2A bonbilome la, nɛreba n wan behɛ en ge pa'ale n se'ere la se'ere n nare te a eŋɛ ge gura se'em ma'an te a mɛŋa zo'e nya wan dekɛ a mɛŋa potɛn'ɛrɛ tom toonɛ. 3Bala mea te tomam me daa dɛna kɔma bɔna teŋa wa zuo panhe nu'uhen, ge nya zo'e na wa. 4Ge daanse'ere te Yenɛ mɛŋa n daa loe la n paɛ la, a tom a mɛŋa Bia teŋa wa zuo na, te pɔka dɔgɛ en te a lagom dɔla pa'alegɔ se'em la. 5A ton en te a fan' sɛba te pa'alegɔ wɔna te a lo' ba biŋe mɛ, ge bahɛ te to nyɛ' sore wa te to dɛna Yenɛ kɔma. 6Yenɛ n bote a pa'ale te to dela a kɔma la zuo te a tom a Bia Sea tomam sunya poan. La dela Sea kaŋa n bahɛ te to ta'an yi'ira Yenɛ te to sunya poan ha te, To Sɔ, to Sɔ. 7Bala zuo, ho le dagana teŋa wa zuo panhe da'aberɛ, ge ho nya dela Yenɛ bia. Hon me n de Yenɛ bia la, Yenɛ wan bo ho sɛla woo te a tara bɔ'ɔra a kɔma. 8Se'em ma'an te ya daa nan ka nam Yesu la, ya daa ka mi' Yenɛ. Bala zuo, ya daa dole baga n ka tare paŋa wa eŋɛ se'ere. 9Ge nananawa te ya mina Yenɛ. Bii n yeti, nananawa te Yenɛ mina ya wa. La eŋɛ la wane te yamam le lebe ya pooren te ya dekɛ ya mɛhe bo baga wa, baga n ka tare paŋa te a eŋɛ se'ere wa? Bene n sɔe te yamam le bɔta te ya le lebe ta dɛna baga wa da'aba wa le yɛ'ɛha? 10Ya dekɛ ya mɛhe bo kiha, dɔla la dabahese'a la ŋmarehe la saŋa la yuuma kiha. 11Ya tooma wa bo mam sunsagaŋɔ, la ane wo toonse'a zan'an te mam wa tom ya zen'en la yeti a bahɛ la yoo. 12Mam bene ya mɛ, n sɔɔnrɔ, te ya ane wo mam la. Se'ere n sɔe la, mam daa ana wo yamam la. Ya ka tue mam. 13Ya mi' te la daa dela mam ban'an la zuo n sɔe te mam daa nyɛ' sore tɔgɛ Yesu Krista yɛla la pa'alɛ ya yia la. 14Mam ban'an la daa dela namehe seko bo ya, ge daa to'e mam mɛ wo mam dela Yenɛ soŋora la. Ya daa to'e mam ge eŋɛ mam saanɛ wo ya wan eŋɛ Krista Yesu se'em la. 15Mam n daa boe ya zen'en la ya poore daa pee mɛ. Bene te ya poore ka le pee? Mam wan ta'an yete ya daa ka gagɛ ya kpege ya nini bo ne mam. 16Mam n yele ya yelemɛŋɛrɛ la zuo, ya nya dekɛ mam te n lebege la ya diŋdaana? 17Ge nɛresɛba te mam yɛta wa, ba nini tɛnte mɛ te ba bote ne te yamam la mam nɔyenɛ la sagom ge te yamam la bama sɔna taaba wo yamam la mam n son taaba se'em la. Ge ba nini n mɔ'ɛ se'ere zuo la dagɛ la yamam som zuo. 18Da tɛn'ɛhɛ ya te mam nyuune mɛ, ge nɛreba nini han tɛnte ne mɛ la ya yelesonɛ zuo, lan dela yelesonɛ. Ge ba da gura se'em ma'an te mam bɔna ya zen'en. 19N kɔma wa, wo pɔka n ne yeti a dɔgɛ ge wola se'em la, mam wole bala bɔ'ɔra ya gura te ya ta ana wo Krista la ya yɛla woo poan. 20Mam bote ne te la ana se'em n wana, n bote ne te boe ne la ya zen'en te n mina mam n wan tɔgɛ se'ere pa'ale ya. Ge mam n ze' zen'sɛka wa, mam ka mi' mam n wa eŋɛ se'em. 21Bahɛ ya te n yele yamam sɛba n bote ya dɔla pa'alegɔ la. Yamam ka wom pa'alegɔ mea n yele se'em? 22Pa'alegɔ la mea n yele se'em n wana. Te Abraham yuun tare la dayɔɔhe seyi'. A dayɔa la kayema yuun dela a pɔga pɔsɔɔ n de da'aberɛ bia, ge te a dayɔa kana la me dɛna a pɔgɔkeema bia. 23A pɔge da'aberɛ la dɔgɛ a bia la doohe la ban dɔgɔre kɔma se'em, ge pɔgɔkeema la dɔgɛ a bia la doohe la Yenɛ nɔbiŋere la. 24Abraham dayɔɔhe seyi' la makerɛ te to dekɛ makɛ: Abraham pɔgɔhe seyi' la ze' dena la nɔya ayi'. Pɔgɔsɛka n de da'aberɛ dɔgɛ da'aba la dela Hagar. A ze'ele bo la nɔɔrɛ la te Na'ayenɛ daa biŋe la Sinai Zoore la zuo la. 25Hagar la n ze'ele bo Sinai Zoore n boe Arabia teŋa la, ze'ele bo Yerusalem teŋa la ka nɛreba zan'an. Yerusalem teŋa la ka nɛreba zan'an dela da'aba. 26Ge saazuo Yerusalem la boe la fai, kaŋa n de tomam ma'. 27La golehɛ te, Kondɔgɔrɛ wa, bahɛ te ho poorɛ pee te ho yoona vɔɔla, la hom nan pon ka dɔgɛ wa, hom kondɔgɔrɛ wa kɔma wan zo'e gana se'em pon dɔgɔra te la yuue. 28Nananawa, yamam, n sɔɔnrɔ, ya dela Yenɛ kɔma a nɔɔrɛ la te a biŋe la zuo, wo Isaak n daa de se'em la. 29Wo saŋkaŋa ha bisɛka te Hagar dɔgɛ la namehe bisɛka te ba dɔgɛ ka doohe Yenɛ nɔbiŋere la se'em bala mea te ana bo tomam me nananawa. 30Ge gɔŋɔ la yeti, Pɔhɛ zina yɛ'ɛha, sa'ɛ pɔsɔɔ wa la ko bia wa te ba yehe. Pɔsɔɔ wa bia wa kan tara tɔntɛ la pɔgɔsɛka n boe fai bia wa. 31Bala zuo, n sɔɔnrɔ, tomam dagɛ pɔge da'aberɛ la kɔma. To dela pɔgɔsɛka n fai wa kɔma.

will be added

X\