Galatɩ 2

1La eŋɛ la yuum pia la anaahe te mam lebe Yerusalem yɛ'ɛha. Lebega la poan, Barnabas la Titus n doohe mam. 2Mam lebe la, la dela Yenɛ n yele mam te n keŋɛ. Mam n paɛ la mam la ba keendoma la ma'an zin'ire, te n tɔgɛ pa'alɛ ba Yelesoma la yelese'a te mam mɔɔlɛ pa'alɛ sɛba n dagɛ Yudoma la. Mam eŋɛ wana dela n ka bote mam n tom se'em, bii mam wan kelom tom sɛla la dɛna yoo. 3Ge kelehe ya, basɛba ka ne de, ge ba yele Titus sɛba n dɔla mam la ayema la de Greek nɛra la te a ŋma' wo Yudoma etegɔ la. 4Sɛba n bote Titus ŋma' la parom mɛ te ba dela sɛba n dole Krista sore la, ge ba dagɛ. Ba le'ehɛ mɛ kɛn' tomam lagaŋɔ la poan te ba vɛɛnhɛ baŋɛ tomam n tare fai bɔŋa sɛka taaba Krista poan la. Ba bote ne te ba dekɛ tomam te to eŋɛ la ba yamehe, 5ge to ka sakɛ bo ba la fiin me, te to gu yelemɛŋɛrɛ se'ere n boe Yesu Krista Yelesoma la poan bo ya. 6sɛba te ba dekɛ te bama n de Yerusalem lagaŋɔ la zuodoma la, ka yele mam te n tee yelese'ere Yelesoma la te n mɔɔla la poan. La ka pakɛ mam, ban de sɛba: Yenɛ ka behɛ la woko bii kantɛ. 7Ge ba sakɛ ya te Yenɛ n bo mam la toonɛ te n mɔɔla Yelesoma pa'ala sɛba n dagɛ Yudoma, wo n bo Peter toonɛ te enŋa mɛ mɔɔla Yelesoma pa'ala Yudoma. 8Yenɛ paŋa n eŋɛ Peter a tontona te a mɔɔlɛ a Yelesoma la pa'ala Yudoma, Yenɛ dene mea n eŋɛ mam a tontona sɛba n dagɛ Yudoma la zen'an. 9Sɛba n de Yerusalem lagaŋɔ keendoma, Yames, la Peter, la Yon nyɛ' ya te Yenɛ n bo mam toondena te n tom. Bala zuo, ba gin' mam la Barnabas nu'o ge sohɛ bo to, te ba pa'alɛ yeti toonɛ te to zan'an tona la dela toonyenɛ. Bilam, te to zin'ire ko' nɔɔrɛ te mam la Barnabas tona la sɛba n dagɛ Yudoma la poan, te bama me tona Yudoma la poan. 10Sɛla ma'an te ba yele to dela te to tɛnra nahadoma la n boe ba lagaŋɔ poan la. Ge han dɛna yele dena, de dela yelese'ere te mam kpeŋera n mea te n eŋɛ. 11Se'em ma'an te Peter wa'an Antiok teŋa na la, a daa tom toonɛ te de daa ka nara te n yele en a nɛŋan te n eŋɛ se'em la ka nare. 12Peter n paɛ Antiok na, a lagom naa la sɛba n dole Krista sore la dita. Ba dagɛ Yudoma, bala zuo ba ka ŋma'. Ge Yames n tom nɛreba te ba paɛ Antiok na bahɛ, Peter ke le naa la sɛba n dole Krista sore la n dagɛ Yudoma di'. Bene zuo, a zɔ' la nɛresɛba te Yames tom na la dabeem, te ba wan tare en te bene zuo te a naa la sɛba n ka ŋma' dita. 13Peter n zɔ' dabeem ge tom toondena wa la, Yudoma la basɛba me tɔgɔhe en mɛ. Bala zuo, Barnabas me lagom tɔgɔhe ba me ba dabeem tooma mea zuo. 14Mam n nyɛ' te ba ka dole yelemɛŋɛrɛ la wo Yelesoma n yele se'em la, n yele Peter ba zan'an nini yeti, Hom dela Yuda nɛra ge bɔna wo sɛba n dagɛ Yudoma. Ho nya wan eŋɛ la wane ta'an yele sɛba n dagɛ Yudoma la te ba bɔna wo Yudoma? 15Tomam n dela Yudoma buuri, ge dagɛ sɛba n dagɛ tomam buuri, 16mi te nɛra han ka tare tuure, la dagɛ te a dole pa'alegɔ la. La de te a nam ge dekɛ a mɛŋa bo Yesu Krista. Tomam me nam bo Yesu Krista te Yenɛ bahɛ tɔ te to ka tare tuure a nɛŋa. La dagɛ te to dole pa'alegɔ. Se'ere n sɔe nɛnɛra ka tare tuure pa'alegɔ dɔla la zuo. 17Tomam han kpeŋere to mɛhe te Yenɛ bahɛ tɔ te to ka tare tuure, te tomam la enŋa naɛ taaba la Krista la zuo, ge te Yenɛ nyɛ to te to dela be'emdoma. Wana ka pa'ale mɛ te Yesu Krista soŋore te be'em malom pa'ahɛ mɛ. 18Mam han lebe pooren yɛta te Yenɛ bahɛ nɛra te a ka tara tuure la n dole pa'alegɔ se'em, mam dela ponpɔrɔma, n ka bote yelemɛŋɛrɛ. 19Han dɛna te n dɔla pa'alegɔ la, mam ka tɛn'ɛhɛ mam wan nyaŋɛ. La wone te pa'alegɔ la ko' mam mɛ te n wan dekɛ n vom bɔ'ɔra Yenɛ. 20La ane wo ba kpa' mam la punpuuredɔɔ te n ki' la Krista la, te mam ka le vɔna ge Krista vɔna mam poan. Te bala zuo, vom wa te mam vɔna wa dagɛ la mam mɛŋa wa n vɔe, ge vom bona wa te mam vɔna mam vɔe bo mam nam Krista se'em n nɔŋɛ mam ge ki bo mam la. 21Mam ka zagahe Yenɛ zo'ohogɔ la. Ge se'em han bɔna te Yenɛ bahɛ en te a ka tare tuure, te enŋa la Yenɛ naa taaba, te a dole pa'alegɔ la zuo, Krista kum la dela yoo.

will be added

X\