Galatɩ 1

1Mam Paul n golehere gɔŋkona wa. La dagɛ la asaala n bahɛ te mam dɛna Yesu tontona. Ge la dela Yesu Krista la to Sɔ Yenɛ n vo'e Yesu la n yi mam te n dɛna Yesu tontona. 2Mam la sɛba woo n dole Yesu sore po'ohe yamam Galatia teŋa lagaŋɔ la woo na. 3To Sɔ Yenɛ la to Daana Yesu Krista zo'ohogɔ la sunma'ahom bɔna la ya. 4Krista sakɛ tom to Yenɛ la to Sɔ n bote se'em la, ki bo to te a fan' to be'em saŋa wa poan bahɛ. 5Pɛnka dɛna Yenɛ denɛ wuuha! Taarɛ. 6Mam ya' la nɔɔrɛ beha ya. Yamam te la ka yuue ge te ya ta'an tamɛ ge zagaha se'em n yi' ya doohe Krista zo'ohogɔ la, ge tɔ'ɔha Yelesoma deyema? 7Dagɛ la yelese'ere n boe ha dɛna Yelesoma yɛ'ɛha, ge mam yele bala zuo la nɛresɛba n pan'ahe ya, bɔta te ba tee Krista Yelesonɛ lebege ponpɔrɔŋɔ la. 8Ge Tomam mea bii soŋora han ze'ele saazuo ha na mɔɔla Yelesoma yɛla pa'ala ya te dene la tomam n mɔɔle se'ere pa'ale ya la dagɛ na boyena, bahɛ ya te a keŋɛ namehegɔ zen'an. 9To daa yele ya dena wa, ge te n le yɛta ya wa, te se'em han wa'ana mɔɔla Yelesoma la pa'ala ya te dene la yelesoma se'ere te ya sakɛ ge to'e han dagɛ na boyena, bahɛ ya te a keŋɛ namehegɔ zen'an. 10Mam ka zegere mɛ te mam la nɛreba nɔɔrɛ dɛna boyena. Mam n bote se'ere dela Yenɛ yen sakɛ te mam n ete se'ere la n de ma'an. Mam han kelom zegera te nɛreba yeti mam n boe, mam kan dene Krista yameŋa. 11Bahɛ ya te n yele ya, n sɔɔnrɔ, te Yelesonɛ la te mam mɔɔla la dagɛ la asaala potɛn'ɛrɛ. 12Yɛ'ɛha, dagɛ la se'em n dekɛ Yelesonɛ la bo mam, bii se'em n pa'alɛ mam dɛ. Yesu Krista mɛŋa n pa'ale mam dɛ. 13Ya wom mam n daa ane se'em, se'em ma'an te mam daa dɔla Yenɛ sore wo Yudoma n dole Yenɛ sore se'em la. Mam n daa mɔ'ɛ nini koora sɛba n dole Yesu sore se'em, ge kpeŋera n mɛŋa te n ba'ahɛ ba ge ka zɔta ninbɔn'ɔn. 14Mam daa kpeŋe n mɛŋa gana n Yudoma tadaandoma, te mam la bama yuuma lagom zɔna, te Yudoma po'ohegɔ sore la poan. N daa le dɔla to yaabdoma kiha la, la n paŋa zan'an. 15Ge wana zan'an poan, Yenɛ la a zo'ohogɔ zuo, a loe mam mɛ, te ba nan ka dɔgɛ mam ge yi' mam te n wa'ana tom bo en. Te se'em ma'an te a eŋɛ a potɛn'ɛrɛ, 16te a bahɛ te mam nyɛ' a Dayɔa Yesu Krista wo n seren de se'em la, te n ta'an keŋɛ ta mɔɔlɛ Yelesoma la n tɔgɔre a yele la pa'alɛ sɛba n dagɛ Yudoma, mam ka keŋɛ se'em zen'en ta to'e kan'aŋɔ. 17N me ka keŋɛ Yerusalem te n ta baŋɛ ge po'ohe sɛba te Yenɛ yi' yia te ba wa dɛna a tontoneba mam yia, wo la nare se'em. Teŋa n yi'ire Arabia te mam keŋɛ yia, ge nya lebe Damaskus teŋa na. 18Mam n yuun sakɛ bo Krista la, la yuun eŋɛ la yuuma atan' ge te mam nya baŋɛ keŋɛ Yerusalem te mam la Peter ta sɔnhɛ te n wom a nɔɔrɛn. N yuun gan'anrɛ a zen'en la dabeha pia la anaahe ma'an. 19Ge dabeha pia la anaahe wa poan mam ka nyɛ sɛba te Yenɛ yi te ba wan dena a tontoneba la ayema me, han dagana to Daana yebega Yames. 20Sɛla te mam yɛta ya wa dela yelemɛŋɛrɛ. Yenɛ n de se'em n ze'ele n pooren, n ka parone. 21Mam ze'ele Yerusalem, n keŋɛ la teŋhe n boe Siria la Silisia sɔ'ɔlomen. 22Bala ma'an la, te lagaŋɔ seko n boe Yudea teŋa poan la ka mi mam. 23Ba wom la basɛba n yeti, Boraa sɛka n daa dole to koora la, a mɛŋa nya mɔɔle mɛ pa'ala nɛreba te ba won sakɛ bo Yesu Krista sose'ere te a daa wa zegera te a sagom la. 24Bala, te ba pɛngɛ Yenɛ mam zuo.

will be added

X\