Ezra 9

1Yele ana woo n tom ba'ahɛ la, te nabiihe la wa'an mam zen'an na yeti, Israel nɛreba la malemadoma la Levidoma la ka yelege ba mɛhe toonfɛn'ɛha se'a te teŋhe wa nɛreba la n de Kanaan la Hiti la Perizi la Yebus la Ammon la Moab la Mizraim la Amori doma tona la poan. 2Ba di la ba pɔyɔɔhe bo ba mɛhe la ba dayɔɔhe, nya gaam toolom nɛreba wa la nɛresɛba n lɛm to la. Keendoma la kpɛ'ɛndoma la n boe nɛŋa toonfɛn'ɛherɛ dena wa poan. 3Mam wom yele dena wa la, mam aanhom la n fuseko n yɛ poan la, la seko n yɛ pagalɛ la, ge vɔnhɛ n zuo zonto, la n tɛɛŋa kɔnberɔ, ge zin'an teŋa digi digi. 4Te se'em woo n zote Israel Yenɛ wa yelehom, lagahɛ mam zen'an na doohe la Israel nɛreba wa n lebe na wa tuure wa zuo, te mam zin'an bala digi digi ta paɛ zanɔɔrɛ kaanbegɔ saŋa. 5Zaanɔɔrɛ kaanbegɔ saŋa la te mam ihege n sigehe n mɛŋa zin'irego la poan la n fu'anhena la, kpa' n duma tɛɛn n nu'uhe bo n Yenɛ la, 6sohɛ yeti, Mam Yenɛ wa, nyanɛ n ba' di mam, vi n ba' tara mam te mam gorege n nɛŋa tɔ hɔ. N Yenɛ wa. Se'ere n sɔe la, tomam be'em la wɔgɛ gana to mɛ, to tuure la paɛ saazuo mɛ. 7Ze'ele to sɔdoma beeren na paɛ zina, tomam tuure la kanregɛ mɛ. To be'em wa zuo te tomam la to naba, la to malemadoma bɔna so'a nɔɔrɛn, bɔna yamenɛ poan, te ba faanra tɔ, te to nyɛta namehegɔ teŋhe sese'ehe nadoma nu'uhen wo lan ane se'em zina wa. 8Ge nananawa, hom Na'ayenɛ to Yenɛ wa zo'ohɛ to mɛ fiin wa, bahɛ te to sɛba n yee fiin wa peɛn yamenɛ poan te to ta bɔna fai hom toolom zen'an la poan. Hom to Yenɛ wa n pekɛ to nini ge bo vo'ohogo to yamenɛ wa poan. 9Tomam pon dɛna la yamehe, ge to bobore mea poan, to Yenɛ la ka zagahɛ tɔ. A pa'alɛ tomam a zo'ohogɔ mɛ Persia teŋa nadoma la nɛŋan, te naba wa bo to sore te to lebe na malom mɛ to Yenɛ la yire la, ge maalɛ de daboto la, ge mɛ dangoone kae Yuda la Yerusalem teŋhe. 10Ge to Yenɛ wa, to wan ta'an yeti bo yele dena wa poan? Tomam zagahɛ ho nɔɔrɛ la te ho bo la mɛ, 11ho nɔse'ere te bo doohe ho nɔtɔgɔheba poan yeti, teŋsɛka te ya kɛn'ɛra te ya ta to'e ka sɔna wa dela dɛngerɔ teŋa, te ka nɛreba dɛna dɛngerɔdoma, tom dɛngerɔ tooma pere ka zen'an woo. 12Bala zuo, da ta tara ya pɔyɔɔhe ɛleha ba dayɔɔhe, bii ya tɔ'ɔha ba pɔyɔɔhe bɔ'ɔra ya dayɔɔhe te ba dita ba. Da malom eŋɛ ya sunma'ahom la ba bii ya ɛɛra ba som. Bala te ya wan kpe'em, ge dita ka poan lɔgɔsonɔ la, ta dekɛ ka bahɛ bo ya kɔma te ka dɛna ba sɔ'ɔlom ka tara ba'ahegɔ. 13Sɛla n sige tomam zuo to be'em la zuo la, te tomam be'em la kanregɛ ge te hom to daana wa ka namehɛ to paɛ to be'em la namehegɔ n dene se'em la, ge bahɛ te to zona wana peɛn wa, 14to le kɔ' ho nɔɔrɛ la ge dita nɛresɛba n tone toonfɛn'ɛha ana wa la? La ka seke la daam ho gaŋɛ te ho sagom tɔ kan le gee to fiin wa, bii te pon kan le peɛn? 15Na'ayenɛ wa n de Israel Yenɛ wa, hom dela tontɔɔ, la hom bahɛ te to yee fiin wa wo lan ane se'em zina wa. Behɛ tomam wana zɛ'a ho nɛŋan la to be'em wa. Nɛra ka boe wan ta'an ze'ele ho nɛŋan, yele dena wa zuo.

will be added

X\