Ezra 8

1Yizuto keendoma la ba tuunhom sɛba n ze'ele Babilon teŋa naba Artasaset saŋa doohe la mam lebe na la wana. 2Pinehas yizuo dɛna Gersom la Itamar yizuo dɛna Daniel la David yizuo dɛna Hatus 3n de Sekania dayɔa la Paros yizuo dɛna Zekaria la boraahe kɔbega la pihinuu te se yu'ura bɔna ba tuunhom la poan la 4Pahat Moab yizuo dɛna Zerahia dayɔa Eliehoenai la boraahe kɔbehe seyi' la 5Zatu yizuo dɛna Yahaziel dayɔa Sekania la boraahe kɔbehe setan' la 6Adin yizuo dɛna Yonatan dayɔa Ebed la boraahe pihinuu la 7Elam yizuo dɛna Ataliah dayɔa Yesaiah la boraahe pihiyopɔe la 8Sepatia yizuo dɛna Mikael dayɔa Zebadia la boraahe pihinii la 9Yoab yizuo dɛna Yehiel dayɔa Obadia la boraahe kɔbehe seyi' la pia la banii la 10Bane yizuo dɛna Yosipia dayɔa Selomit la boraahe kɔbega la pihiyoobe. 11Bebai yizuo dɛna Bebai dayɔa Zekaria la boraahe dɛna pihiyi' la banii, 12Azgad yizuo dɛna Hakatan dayɔa Yohanan la boraahe kɔbega la pia. 13Adonikam yizuo la n wa'an pooren na la poan dɛna Elipelet la Yeuel la Semaiah la boraahe pihiyoobe. 14Bigvai yizuo dɛna Utai la Zakur la boraahe dɛna pihiyopɔe. 15Mam lagahɛ ba kolaa la n zote sigera Ahava teŋa ha la, te to tiihom bilam dabeha atan'. Mam doohe nɛreba la la malemadoma la woo poan behɛ la, mam ka nyɛ Levidoma la ba poan. 16Te mam tom yi' Eliezer la Ariel la Semaiah la Elnatan la Yarib la Elnatan la Natan la Zekaria la Mesulam n de keendoma la, ge yi' Yarib la Elnatan n de pa'aleba la na, 17tom ba Ido n de Kasipia teŋa keema la zen'an, ge yele ba ban wan ta yele Ido la a sɔɔnrɔ la n de Kasipia teŋa Yenɛ yire tontoneba la se'em, te ba bo tontoneba to Yenɛ yire wa poan. 18Doohe la to Yenɛ la etesoŋɔ la n dole to la zuo, ba tare la Serebia n mi', dɛna Israel dayɔa Levi me dayɔa Mali yaaŋa, te a doohe la a dayɔɔhe, la a sɔɔnrɔ, te ba zan'an dɛna nɛreba pia la banii wa'ana, 19dekɛ Merari yizuo la poan Hasabia la Yesaiah la a sɔɔnrɔ la ba dayɔɔhe, te ba boraahe dɛna pihiyi'. 20Ge me tare Yenɛ yire poan tontoneba kɔbehe seyi', la pihiyi' na, nɛresɛba te naba David la a kpɛ'ɛndoma yuum loe ba te ba soŋora Levidoma la. Ba golehɛ ba woo yu'ura mɛ. 21Te mam bo nɔɔrɛ te to zagahɛ to mɛŋa Ahava teŋa kolaa nɔɔrɛn mea, la to sigehe to mɛhe to Yenɛ wa nɛŋan la to sohɛ en te a bahɛ te tomam mɛhe, to kɔma, la to lɔgɔrɔ wa keŋɛ paɛ yɔle yɔle. 22Vi n tare mam la n yele naba la te a bo to pɛɛntɛɛnreba la yiri ban'areba te ba gu'ura tɔ to diŋdoma zen'an sore la zuo. Se'ere n sɔe la, tomam pon yele naba la yeti, Tomam Yenɛ la zo'ohogɔ boe mɛ la se'em woo n dele en, ge te a sunsunyiim tara bahera se'em woo n zagahɛ en. 23Te tomam zagahɛ to mɛhe ge sohɛ Yenɛ yele dena wa zuo, te a kelehe to. 24Te mam yelege malemadoma nɛŋadoma pia la bayi' ze'ele ba tɔka, pa'ahɛ la Serebia la Hasabia la ba sɔɔnrɔ pia, 25nya magɛ sanlenpeelega, sanlema, la lɔgɔseto woo te naba, a kan'aneba, a nabiihe, la Israel nɛresɛba n boe la bo la ba popeelom to Yenɛ yire wa zuo la bo ba. 26Mam magɛ la sanlenpeelega bɔɔrehe kɔbehe seyoobe la pihinuu, la sanlenpeelega tebehom n de bɔɔrehe kɔbega n dekɛ kure lɔgɔseto, sanlema bɔɔrehe kɔbega bo ba, 27la sanlema tebehom n de kpila tuhure n dekɛ kure laahe pihiyi', la nyɔgom n dekɛ kure lɔgɔrɔ toyi', te to tara toolom wo sanlema la pa'ahɛ. 28Te mam yele ba yeti, Yamam mɛhe, la lɔgɔrɔ wa dela Na'ayenɛ toolom bonɔ. Sanlema peelega la, la sanlema la dela popeelom bo'olom te ba bo Na'ayenɛ n de ya sɔdoma Yenɛ la. 29Behere ya ge tara to soŋa, gura te ya ta kaanlɛ to zan'an bo malema nɛŋadoma, Levidoma, la Israel yizuto keendoma la Yerusalem poan, Na'ayenɛ Yire la poan. 30Te malemadoma la, la Levidoma la to'e sanlenpeelega la, sanlema la te ba magɛ bo ba la, la toolom lɔgɔrɔ la te ba wan tare to na paɛ Yerusalem, ta kɛn'ɛhɛ tɔ Yenɛ yire la poan. 31Yuunɛ pɔhega ŋmarega dabeha pia la ayi' daarɛ, te to bahɛ Ahava teŋa kolaa la nɔɔrɛn yɛ'a Yerusalem. Te to Yenɛ la paŋa bɔna la tɔ, te a gu'ura tɔ to diŋdoma la la sɛba n sogɛ gura tɔ sore zuo la. 32Te to wa'ana paɛ Yerusalem, vo'ohe dabeha atan'. 33Dabeha anaahe daarɛ Yenɛ yire la poan, te to le magɛ sanlenpeelega la la sanlema la, la toolom lɔgɔrɔ la zan'an dekɛ eŋɛ Uria dayɔa Meremot n de malemadaana, la Pinehas dayɔa Eleazar nu'uhen, la Levidoma n de Yesua dayɔa Yozabad, la Binui dayɔa Noadia. 34Te ba kaanlɛ lɔgɔrɔ la zan'an, ge magɛ sɛla woo te la paɛ to nɔɔrɛ, te ba golehɛ to nɔɔrɛ saŋkaŋa la biŋe. 35Te nɛresɛba te ba pɛnregɛ loŋe teŋa te ba lebe na wa kaanbɛ nyɔ'an bo'olom bo Israel Yenɛ la. Lɔletala pia la seyi' Israel buuri la zan'an zuo, piihe pihiwae' la seyoobe, pedibihe pihiyopɔe la seyopɔe, botelehe pia la seyi', te bama dɛna tuure bo'olom. Bana woo dela nyɔ'an bo'olom bo Na'ayenɛ. 36Ge dekɛ naba sɔɔleŋa la bo naba gɔŋgoloheba la, la teŋbehegadoma la n boe Euprates Yakenɛ la, te ba soŋora Israeldoma wa Yenɛ yire wa mea poan.

will be added

X\