Ezra 7

1Yele ana wa ta tole mɛ, Persia teŋa naba Artasaset na'am gɔŋɔ zuo saŋa poan, te Ezra n de Seraiah dayɔa, se'em sɔ n de Azaria se'em me sɔ n de Hilkia, 2te Hilkia sɔ dɛna Salum, te Salum sɔ dɛna Zadok, te Zadok sɔ dɛna Ahitub, 3te Ahitub sɔ dɛna Amaria, 4te Amaria sɔ dɛna Azaria, te Azaria sɔ dɛna Meraiot, te Meraiot sɔ dɛna Zerahia, te Zerahia sɔ dɛna Uzzi, te Uzzi sɔ dɛna Buki, 5te Buki sɔ dɛna Abisua, te Abisua sɔ dɛna Pinehas, te Pinehas sɔ dɛna Eleazar, te Eleazar sɔ dɛna Aron n de malema nɛŋadaana la. 6Ezra wa ze'ele la Babilon teŋa lebe na, dɛna gɔŋɔ goleha, mina Moses pa'alegɔ yɛla la te Na'ayenɛ Israel Yenɛ bo la soŋa. Sɛla woo te a ne soke bɔta, naba la bo'ore en mɛ. Se'ere n sɔe la, a Yenɛ la nu'o n page a zuo. 7Te Israel buuri wa basɛba la malemadoma la Levidoma la yoonyooneba la nayahe guruba la Yenɛ yire la tontoneba basɛba doohe en lebe Yerusalem teŋa na, Naba Artasaset na'am dia yuuma ayopɔe poan. 8Ezra paɛ Yerusalem teŋa la naba na'am gɔŋɔ zuo yuuma ayopɔe poan, yuunɛ denɛ mea ŋmarehe senuu poan. 9A pɔhɛ a kenɛ wa Babilon teŋa la yuunɛ ŋmarega pɔhega daarɛ, wa'ana paɛ Yerusalem ŋmarehe senuu pɔhega daarɛ, a Yenɛ la n boe la en la zuo. 10Se'ere n sɔe la Ezra lo' mɛ te a zamehɛ Na'ayenɛ pa'alegɔ la ge nana kɔ ge pa'ala ko malema la ko nɔze'elego la Israel teŋa. 11Gɔŋɔ seko te Naba Artasaset golehɛ bo Ezra wa n de malemadaana, la nɔɔrɛ, ge dɛna nɛra n zamehɛ malema se'a la pa'ale seko te Na'ayenɛ bo Israeldoma la n wana: 12Mam Naba Artasaset n de nadoma woo naba n golehɛ gɔŋɔ wa bɔ'ɔra Ezra n de malemadaana, ge dɛna saazuo ha Yenɛ wa nɔze'elego la pa'ala. Farafara. 13Mam n bo sore te Israel buuri woo n boe mam sɔ'ɔlom wa poan, ta' la ba malemadoma, Levi buuri la, se'em woo n bote a doohe ho lebe Yerusalem ta'an doohe ho keŋɛ. 14Mam naba la n kan'aneba bayopɔe la n tom hɔ, te ho keŋɛ ta kae Yuda la Yerusalem, la ho ɛ ya Yenɛ la nɔze'elego yɛla la n boe ho nu'uhen wa. 15Ge tare sanlenpeelega, la sanlema la te mam naba la n kan'aneba la pee ba puurɛ dekɛ bo Israel Yenɛ la bɔŋa zen'an n de Yerusalem la, 16la sanlenpeelega, la sanlema se'a te ho nyɛ Babilon teŋa wa, ta pa'ahɛ la popeelom bo'olom sebo woo te nɛreba la malemadoma la bo ba Yenɛ yire la n boe Yerusalem la. 17Tare ligi'ena wa ta da' lɔletala, piihe, pebibihe, la ba boom la daam bo'olom, kaanbɛ ya Yenɛ yire la nyɔ'an daka la poan Yerusalem teŋan. 18Sanlema peelega la sanlema se'a n gee la, hom la ho sɔɔnrɔ behɛ yamam bote ya dekɛ ba eŋɛ se'em, te la doohe ya Yenɛ la potɛn'ɛrɛ. 19Lɔgɔseto woo n dekɛ bo ho te ya tara tona ya Yenɛ la yire tooma la, ta dekɛ ya to zan'an ze'ele ya Yenɛ yire la poan Yerusalem poan. 20Sɛla han ta bɔna te ho bɔta pa'ahɛ ho Yenɛ yire la poan, to'e hom bote sɛla la naba yire lɔgɔrɔ la poan. 21Mam mɛŋa, mam Naba Artasaset mɛŋa n bo'ore yamam sɛba n behere n lɔgɔrɔ Euprates Yakenɛ teŋhe wa nɔɔrɛ yeti, Ezra wa n de malemadaana, dɛna saazuo Yenɛ wa nɔze'elego la pa'ala la n bote sɛla woo, ya mɔ'ɛ nini eŋɛ bo en. 22Bo'ore ya en paara sanlenpeelega bɔɔrehe kɔbega, la ki' dogorɔ kɔbega, la daam dogorɔ kɔbega, la kaam dogorɔ kɔbega, la yaarom n bote se'em. 23Saazuo Yenɛ wa n bo nɔse'ere woo, eŋɛ ya dɛ la ninmɔ'ɔrɛ bo saazuo Yenɛ wa yire wa, te Yenɛ sunsunyiim da taɛ bahɛ sɔ'ɔlom wa, la naba la a dayɔɔhe wa zuo. 24Ya me mina te sore ka boe te ya pɛnregɛ malemadoma, Levi buuri, yoonyooneba, nayahe guruba la, bii se'em woo n tone Yenɛ yire la poan te ba yɔɔra koberɛ. 25Ge hom Ezra, dekɛ yam sebo te ho Yenɛ bo ho la loohe keendoma, la gankereba te ba gankera nɛreba la zan'an, ta ta' la sɛba woo n boe Euprates, la sɛba woo n pon mina ho Yenɛ la nɔze'elego la, ge te ho me pa'alɛ sɛba woo n ka mi' nɔze'elego la. 26Se'em woo n ka nam ho Yenɛ nɔze'elego la, la naba nɔze'elego la, a daana namehegɔ dela a ki, bii a bɔna a ma'an, bii ya to'e a lɔgɔrɔ, bii ya pagɛ en. Mam nɔɔrɛ n bala. 27Te Ezra pɛngɛ Yenɛ yeti, Ho dela Na'ayenɛ n de to sɔdoma Yenɛ la denɛ, Yenɛ se'ere n dekɛ yele dena wa eŋɛ naba wa suunren, te a doohe wana tare na'ahegɔ wa'an Na'ayenɛ Yire la n boe Yerusalem poan la, 28ge me bahɛ te a zo'ohogɔ bɔna la mam, te mam nyaŋɛ ze'ele naba, a kan'aneba, a nadoma, la a kpɛ'ɛn kanreba la nɛŋan. Na'ayenɛ n de Yenɛ la paŋa n boe la mam la zuo, te mam nyaŋɛ lagahɛ Israeldoma te ba doohe mam lebe Yerusalem na.

will be added

X\