Ezra 4

1Yuda la Benyamindoma diŋdoma n ta wom te Israeldoma sɛba n lebe na la mɛte la Yire te ba bo Na'ayenɛ Israel Yenɛ la, 2te ba wa'an Zerubabel, la yizuto keendoma la zen'an na yeti, Bahɛ te to lagom soŋɛ ya te ya mɛ'. Se'ere n sɔe la, tomam me ane wo yamam la. Tomam me sohore la ya Yenɛ wa, na'ahere la enŋa, pɔhɛ saŋsɛka te Asiria teŋa naba Esarhadon tare to wa'an ka'lam na la. 3Ge Zerubabel la Yesua la Israel yizuto keendoma la zan'an lerege ba yeti, Ya ka lagom bɔna Yenɛ yire wa mea poan. Tomam ma'an wan mɛ dɛ bo Na'ayenɛ Israel Yenɛ la, wo Persia teŋa naba Kirus n bo to nɔɔrɛ se'em la. 4Te nɛreba n boe teŋa la poan la yehe na te ba kɔ'ɔhɛ Yudadoma wa giinla, ge vuunha ba te ba bahɛ mea la. 5Ba yɔɔre la kan'aneba, pɔhɛ Persia teŋa naba Kirus saŋa la poan ha na paɛ Persia te naba Darius, te ba doohe Israeldoma wa na'ma, sagom ban tɛn'ɛhe te ba eŋɛ sɛla woo la. 6Naba Ahasurus na'am pɔhega saŋa poan, te ba wa'ana tɔgɛ yele bahɛ Yuda la Yerusalem nɛreba wa zuo. 7Persia teŋa Naba Artasaset saŋa la me poan, te Bislam, Mitredat, Tabeel, la ba tadaandoma golehɛ gɔŋɔ bo Naba Artasaset. Ba golehɛ gɔŋɔ la la Aramaik yetɔgom poan te ba lebege ko. 8Arehum n de zaba nɛŋadaana la, la Simsai n de gɔŋɔ goleha la n golehɛ Yerusalemdoma yele se'em bo Naba Artasaset n wana: 9Arehum n de zaba nɛŋadaana la, la Simsai n de gɔŋgoloha la, la ba taaba zan'an, gankereba, la kpɛ'ɛndoma n behere Erek teŋa, Babilon, la Susa teŋa la n de Elam sɔ'ɔlom la nɛreba n golehe gɔŋɔ wa, 10la nɛresɛba te zuodaana Asurbanipal yehe ba na kɛn'ɛhɛ Samaria teŋa poan la, la Euprates yakenɛ woo poan la. 11Ban bo naba la gɔŋɔ seko n wana. Gɔŋɔ wa paɛ Naba Artasaset. Gɔŋɔ wa ze'ele la ho yamehe se'ehe woo n boe Euprates yakenɛ woo poan la zen'an na. 12Te bote hom naba mina te Yudadoma sɛba n ze'ele ho zen'an wa'an tomam zen'an la keŋɛ la Yerusalem teŋa, ta malom mɛta tobekperega la toonfɛn'ɛha teŋa wa. Ba malom mɛ ka dangɔɔma la ba'ahɛ mɛ, ge malom maala ka ɛnberɛ la. 13Te bote hom naba mina te ba han mɛ teŋa la ba'ahɛ, te ka dangɔɔma la malom mɛ ba'ahɛ, koberɛ yɔɔa kan le bɔna, bii ba yɔɔra sɛla le bɔ'ɔra hɔ. Bala me wan bahɛ te naba ligiri to'ohego la lu. 14Tomam n boe naba yire nu'uhen tona la zuo, la ka ana soŋa te to sina ge te ba pɔ'ɔra naba la zuo te tomam bɔ'ɔra hom naba gɔŋɔ wa na te to yele ho, 15te ho bahɛ te ba ɛ ho sɔdoma beeren na yɛla la poan behɛ. Ho wan nyɛ yɛla la poan te teŋkana wa dela tobekperega teŋa, daam nadoma la ba teŋhe deemen deemen ha. Bala n sɔe te ba teŋa la yuum sagom la. 16Tomam yeti hom naba te, ba han mɛ teŋkana, malom mɛ ka dangɔɔma la ba'ahɛ, ho kan le sɔna sɛla Euprates yakenɛ wa na. 17Te naba la tom lebehegɔ yeti, Hom Arehum n de zaba nɛŋadaana la, Simsai n de gɔŋgoloha la, la ba tadaandoma la zan'an n kɛn'ɛre Samaria teŋa, la Euprates Kolaa yakenɛ la yeti ya farafara. 18Gɔŋɔ la te ya tom bo to na la, ba lebege ko wa'an to yetɔgom poan mɛ na, kaanlɛ ko yelehom la mam nɛŋan. 19Mam bo nɔɔrɛ mɛ te ba vɛɛnhe nyɛ baŋɛ te teŋa wa ihege na zabɛ mɛ la nadoma deemen deemen ha, te tobekperega la gbirigere bɔna ka poan. 20Ge nyɛ te nakanreba tabelɛ sɔe Yerusalem teŋa wa mɛ zan'an behera, ta ta' la Euprates Kolaa la yakenɛ ha, te se yɔɔra koba, la koohego koba bɔ'ɔra nadoma wa. 21Bala, bo ba nɔɔrɛ yeti, ba go'e mea la han dagana mam n ta bo nɔɔrɛ na. 22Behɛ ho mɛŋa soŋa la ho da zagahɛ yele wa. Wane te to wan sina te yele dena ta ihege zabera la naba yire? 23Ban kaanlɛ Naba Artasaset gɔŋɔ la bo Arehum, la Simsai n de gɔŋɔ goleha la, la ba tadaandoma la te ba wom ba'ahɛ la, ba ihege la bilam bilam keŋɛ Yudadoma la n boe Yerusalem teŋa la, ta gu' ba la pɛnregerɛ te ba bahɛ mea la. 24Yenɛ yire la n boe Yerusalem teŋa la tooma n gu' ze'ele se'em n bala, tara tara la Persia teŋa naba Darius na'am dia yuuma ayi' poan.

will be added

X\