Ezra 3

1Ŋmarehe seyopɔe n ta paɛ, te Israeldoma la pon zin'ire ba teŋhe ba teŋhe poan ba'ahɛ la, ba lagahɛ la taaba boyena Yerusalem teŋa poan na. 2Te Yozadak dayɔa Yesua la a sɔɔnrɔ n de malemadoma la Sealtiel dayɔa Zerubabel la a taaba, ihege te ba mɛ' Israel Yenɛ la kaanbegɔ daka la te ba kaanbɛ nyɔ'an bo'olom, te la doohe la Pa'alegɔ la te Yenɛ nɛra Moses daa golehɛ bo ba. 3Dabeem tara ba la nɛresɛba n sɔe teŋa la. Ge te ba maalɛ kaanbegɔ daka la ze'ele ka ɛnberɛ kɛka la zuo te ba nya kaanbɛ nyɔ'an bo'olom ka poan bɔ'ɔra Na'ayenɛ, bolika la zanɔɔrɛ. 4Te ba dɛ'ɛna Pagahe Tin'a De'eŋɔ la wo lan golehɛ se'em gan'an la, ge bɔ'ɔra ba nyɔ'an bo'olom la wo lan sone te bo zona se'em daarɛ woo la. 5Te bala tole, te ba bɔ'ɔra daarɛ woo nyɔ'an bo'olom la ŋmarepaalega bo'olom la de'enɔ seto woo te Na'ayenɛ loe te to dɛna toolom de'enɔ la ge tɔ'ɔha popeelom bo'olom te ba tare na bo Na'ayenɛ. 6Ba pɔhɛ la ŋmarehe seyopɔe pɔhega poan nyɔ'an bo'olom bɔ'ɔra Na'ayenɛ, te nan pon ka ɛɛnbɛ Na'ayenɛ Yire la. 7Te ba bɔ'ɔra mɛteba, la kpa'areba ligiri, ge bɔ'ɔra Sidon la Tire teŋhe doma la dia, daam la kaam te ba tara mɔlɔsonɔ tiihe zɛ'ɛta Lebanon teŋa dɔla ko'kantɛ la poan kena Yoppa teŋa na, wo Persia teŋa naba Kirus n bo ba nɔɔrɛ se'em la. 8Yuuma ayi' poan, ba kenɛ Yenɛ yire la poan Yerusalem poan na, ŋmarehe seyi' poan la, te Sealtiel dayɔa Zerubabel la Yozadak dayɔa Yesua la ba malemadoma taaba basɛba la, Malemadoma, la Levidoma la, la nɛresɛba woo n lebe Yerusalem teŋa la pɔhɛ tooma, ge loohe Levidoma sɛba n de yuuma pihiyi' beene yɛ'ɛha la, te bama behera Na'ayenɛ Yire la mea tooma la. 9Te Yesua la a dayɔɔhe, la a sɔɔnrɔ, naɛ la Kadmiel la a dayɔɔhe la, la Yuda dayɔɔhe, la Henadad la a dayɔɔhe, la a dayɔɔhe la me dayɔɔhe, la ba sɔɔnrɔ n de Levi buuri la zan'an behera Yenɛ yire la tooma la. 10Mɛteba la n biŋe Na'ayenɛ Yire la ɛnberɛ ba'ahɛ la, malemadoma la yɛ la ba futo, tara tentana, te Levidoma, la n de Asap dayɔɔhe la tara lelanhe te ba ze'ele ba ze'elego zen'enhe te ba pɛngɛ Na'ayenɛ, wo Israel naba David n yuun pa'alɛ se'em la. 11Te ba yoona pɛngera ge po'oha Na'ayenɛ yeti, Ho dela som. Ho zo'ohogɔ boe Israel zuo la bala ka tara ba'ahegɔ. Te nɛreba la zan'an voole pɛngɛ Na'ayenɛ, la Na'ayenɛ Yire la n ɛɛnbɛ la. 12Ge malemadoma la Levidoma la kekeko, la yizuto keendoma la basɛba n tabelɛ nyɛ yia Yenɛ yire la, ge nyɛ ɛnberɛ se'ere te ba nan ɛɛnbɛ wa la, taɛ mɛ la kaahega, te basɛba me vɔɔla la popeelom. 13Te nɛra ka ta'an yelege popeere voole la, la kaahega voole la. Se'ere n sɔe la, voole la ba' gaŋɛ mɛ. Te ba voole la wuna zen'an n zaan ha.

will be added

X\