Ezra 1

1Persia teŋa naba Kirus na'am dia yuunɛ poan, la n bote la bahɛ te Na'ayenɛ yelehom la te a tɔgɛ doohe a nɔtɔgɔha Yeremia poan la seren tom la, te Na'ayenɛ kalom Persia teŋa naba Kirus wa suunre, te a bahɛ te ba mɔɔlɛ a sɔ'ɔlom zan'an poan kae, ge golehɛ mɔɔlegɔ la yeti, 2Persia teŋa naba Kirus n yeti se'em n wana, Na'ayenɛ wa, Saazuo Yenɛ wa n dekɛ teŋhe wa n boe teŋparɛ wa zuo wa eŋɛ mam nu'uhen, ge loe mam te n mɛ' Na'ayenɛ Yire Yerusalem teŋa n boe Yuda teŋa poan la bo en. 3A nɛra n boe zen'an woo, Yenɛ wa wan bɔna la a daana, ge bahɛ te a lebe Yerusalem teŋa n boe Yuda teŋa la, lagom malom mɛ Na'ayenɛ n de Israeldoma Yenɛ la, Yenɛ se'ere n boe Yerusalem la Yire la. 4Israel nɛra se'em n kelom vɔna ge kɛn'ɛre zen'sɛka woo te nɛreba bɔna ka poan, ba soŋɛ en la sanlenpeelega, sanlema, lɔgɔrɔ, dunhe, la sunma'ahom bo'olom te a tare ta mɛ Na'ayenɛ Yire la Yerusalem poan. 5Te Yuda la Benyamin yizuto keendoma, malemadoma, la Levi buuri la, la se'em woo te Yenɛ kalom a suunre, maahom te ba keŋɛ ta malom mɛ' Na'ayenɛ Yire la Yerusalem teŋa. 6Te sɛba woo te ba bɔna la ba la kpemehe ba, bo ba sanlenpeelega lɔgɔrɔ la sanlema la lɔgɔrɔ la dunhe la tebehom lɔgɔrɔ, ge nya bo ba popeelom bo'olom pa'ahɛ. 7Te Naba Kirus vaɛ lɔgɔseto n de Na'ayenɛ Yire lɔgɔrɔ te Nebukadnezar yuun vaɛ tɔ Yerusalem na biŋe a baga bɔ'ɔ la poan la na. 8Naba Kirus bahɛ te Mitredat n de lɔgɔ biŋera la n tare tɔ yehe na, kaanlɛ tɔ bo Yuda nabia Sesbazar. 9Lɔgɔrɔ la kanlɛ n wana: Sanlema te ba dekɛ maalɛ laditihe dela, pihitan'. Sanlenpeelega te ba dekɛ maalɛ laditihe dela, tuhure. Sanlema peelega te ba dekɛ maalɛ laakanra dela, pihiyi' la sewae', 10te sanlema te ba dekɛ maalɛ laakanra dɛna laahe pihitan' te sanlenpeelega laahe dɛna, kɔbehe senaahe la laahe pia. Te lɔgɔseto n pa'ahɛ dɛna tuhure. 11Te lɔgɔrɔ la zan'an kanlɛ dɛna tuha anuu la kɔbehe senaahe, te ba dekɛ sanlema la sanlenpeelega maalɛ. Te Sesbazar tara lɔgɔrɔ wa, la nɛreba wa te ba pɛnregɛ loŋe Babilon teŋa wa lebe Yerusalem na.

will be added

X\