Ezekiel 7

1Te Na'ayenɛ tɔgɛ bo mam yeti, 2Asaala dayɔa wa, Daana Na'ayenɛ la n yeti Israel teŋa wa se'ere n wana: Sagaŋɔ dabaherɛ! Teŋa la zan'an sagaŋɔ la paɛ ya. 3Sagaŋɔ dabaherɛ la n nya yage ho zuo. N wan pa'alɛ hɔ n sunsunyiim n ane se'em. N wan gankɛ ho doohe la ho etegɔ n ane se'em, ge yɔ hɔ ho toonfɛn'ɛha la. 4N kan beha ho te ho tara mam ninbɔn'ɔn, bii n bahɛ hɔ. N wan seren lebehe yɔ ho etegɔ la ho toonfɛn'ɛha la te ho tona la me la ninmɔ'ɔrɛ. Bala te ho nya wan baŋɛ te mam n de Na'ayenɛ. 5Daana Na'ayenɛ la n yele se'em n wana: Namehegɔ! Namehegɔ! Namehe seko te ya nan ka wom ko yele n ye' na. 6Sagaŋɔ la paɛ ka'lam! Sagaŋɔ la paɛ ka'lam! Ko paɛ na, sagaŋɔ la ma'an n tare ho. Ko paɛ na! 7Yamam sɛba n kɛn'ɛre teŋa wa poan wa, lika n pin ya. Saŋa la paɛ ya, dabaherɛ la pɔnre. La wan bɔna ya pun'hegɔ zɔya la zuto ge dagɛ nyeema. 8N boe bini maahena te n dekɛ n sunsunyiim ka'ɛ bahɛ ya zuo na. N wan dekɛ n sunsunyiim la bahɛ ya zuo na, n wan gankɛ hɔ, doohe la ho etegɔ la ge yɔ hɔ ho toonfɛn'ɛha te ho sina ge tooma la yɔɔrɛ. 9N kan beha hɔ te ho tara mam ninbɔn'ɔn, bii n bahɛ hɔ yoo n wan yɔ hɔ doohe ho etegɔ la ho toonfɛn'ɛha la zan'an te ho eta la. Bala te ho wan baŋɛ te la dela mam Na'ayenɛ n mɛŋa n damɛ hɔ. 10Dabaherɛ la n wana de paɛ na! Koŋere paɛ na pa'alɛ n mea ma'an n ton malom pa'aha. 11Pa'ale mea la nya lebege la kpa'aherɛ te de namehɛ be'emtooma la, nɛra la n yena me kan pɛɛn. Nɛra bii ba lɔgɔrɔ bii lɔgɔseko n de lɔge tebehegɔ ka boe wan pɛɛn. 12Saŋa la paɛ ya, Dabaherɛ la paɛ na. Nyeema kan bɔna la hom se'em n da'are bii sunsagaŋɔ bɔna la hom se'em n koohe. Se'ere n sɔe la sagaŋɔ n ye' nɛra woo zuo na. 13Kɔɔha la n koohe a samanɛ la kan le to'e de da'ara la zen'en te bayi' la nan vɔna. Se'ere n sɔe la liligere wa boe bɔ'ɔra la nɛra kooŋɔ wa, dena wa ka lukure. Ba be'em la zuo, ba ayena me kan vo'e. 14Ba wan peebe tentanɛ la, lagahɛ taaba na, ge se'em ka boe ba poan wan ta'an terigɛ ze'ele zabɛ. Se'ere zuo, Yenɛ sunsunyiim n sige ba woo zuo. 15So'a n ze yeŋa gura ba, te namehegɔ la kom me bɔna poan ha dila ba. So'a n wan kɔrom sɛba n kɛn'ɛre teŋa la teŋbibihe poan la, te kom la namehegɔ me ko sɛba n boe teŋa la teŋkanra poan la. 16Sɛba woo n zɔ pɛɛn la wan zɔ ta bɔna la zɔya zuo ha fabela wo baahe te kom tara ba la, ba toonbe'ero la zuo. 17Nɛra kan bɔna bini te a kpenkpaŋ yaga saazuo. Nɛra woo duma wan kɔ'ɔhɛ tɛlema. 18Ba wan yɛ sunsagaŋɔ futo. Dabeem me nyɔkɛ ba. Nyanɛ wan kɛn' ba, te ba sura teŋa kan ta'an gorege zuo. 19Ba wan va ba ligiri la lobe bahɛ sore zuo, ge te sanlema la me lebege dɛngerɔ bonɔ. Ba ligiri la ba sanlema la kan nyaŋɛ fan' ba bahɛ Na'ayenɛ sunsunyiim dabeherɛ la poan bahɛ. Ba kan ta'an dekɛ ba da dia te la seke ba. Se'ere zuo bama n bahɛ te ba ganlom. 20Ba pa'ale la ba mɛhe la ba sanlema banhe la te ba yɛɛra ba nyugelehe poan la, ge tare ba maala bagayooro. Bala zuo la, n wan bahɛ te ba ligiri la ba sanlema la lebege lɔgɔdɛngerɔ bo ba. 21N wan bahɛ te saama fan' ba, ge te potɔpa me zun ba, ge ganlom ba. 22N wan ŋmɛregɛ n nɛŋa yehe ba zen'an, ge te ba sagom mam toolom zen'an la. Faanreba wan kɛn' sagom dɛ. 23Maahom ya. Se'ere zuo teŋbibihe la kɔ'ɔn perɛ me la ziim ka'ahegɔ ma'an, ge te teŋkanra la poan me kɔ'ɔn perɛ la gbirigere ma'an. 24N wan tare teŋse'ehe nɛreba puya n ba' tɔna wa'ana, te ba fan' ba yiya. N wan gu' paŋadoma la pa'ale n mɛŋa la bahɛ, ge bahɛ te ba sagom ba kaanbegɔ zen'enhe la bahɛ. 25Dabeem la han ta kɛn' ba, ba nya wan ɛɛra sugure, ge ba kan le nyɛ. 26Namehegɔ la wan tagalɛ taaba la bala kena na, daarɛ woo yele n lute, yele n tagele. Ba wan zegera te nɔtɔgɔha pa'ale ba liligere. Ge malemadaana ka pa'alɛ ba pa'alegɔ, te nɛŋadoma me kan ta'an kan'ana. 27Naba wan ta kɛla, te nabiihe la yam bɔregɛ te nɛra woo n boe teŋa la poan la nu'uhe gbe'era. N yeti n eŋɛ ba me wo ba tooma la n ane se'em la, ge gankɛ ba wo ban ze se'em la. Bala te ba wan baŋɛ te mam n de Na'ayenɛ.

will be added

X\