Ezekiel 46

1Daana Na'ayenɛ n yele se'em n wana: Koleŋa sɛka n boe Yenɛ Yire la dapoore bɔba wan yu' dabeha ayoobe la zan'an poan, ge Vo'ohogo Daarɛ la ŋmarepaalega pɔhega daarɛ la te ka wan ne yu'ɛ. 2Te naba wa ne doohe ka poan dapoore la ha kɛn' na, ze'ele a ze'elego zan'an la koleŋa wa nɔɔrɛn. Te malemadoma wa me kaanbɛ a nyɔ'an bo'olom la, la a sunma'ahom bo'olom la, ge te a ze'ele koleŋa la nɔɔrɛn la po'ohɛ, ge yehe, ge te koleŋa la yu'ɛ bala gura zanɔɔrɛ 3Vo'ohogo Daarɛ la ŋmarepaalega daarɛ woo, nɛreba la ne wa'an koleŋa la nɔɔrɛn na, ze'ele bilam po'ohɛ Na'ayenɛ. 4Lɔgɔseto te naba wa wan ne tare na kaanbera Vo'ohogo Daare bɔ'ɔra Na'ayenɛ dela pebibihe seyoobe la peraa te sɛla ka tara se. 5A wan dekɛ boom bo'olom sebo n wan pa'ahɛ peraa la pebibihe seyoobe la dela a mɛŋa n bote a bo se'em nya dekɛ kaam dugula pa'ahɛ en bo zom wanɛ se'em la poan. 6Ŋmarepaalega pɔhega daarɛ la, a ne kaanbɛ lɔle la pebibihe seyoobe la peraa te sɛla ka tara se. 7A me ne bo zom wanɛ pa'ahɛ lɔle la poan, zom wanɛ pa'ahɛ peraa la poan te zom la dɛna a boom bo'olom n bala, ge han dɛna boom bo'olom sebo n wan pa'ahɛ pebibihe seyoobe la n poan la, a ne bo enŋa n bote se'em ge bo kaam dugula pa'ahɛ enŋa n bo zom wanɛ se'em la. 8Naba la han ne yeti a kɛn' na, a ne doohe dapoore koleŋa wa kɛn' na, ge le doohe kaŋa mea poan le yehe. 9Israeldoma wa ne han wa'an Na'ayenɛ nɛŋan de'enɔ wa saŋa woo poan, se'em woo n doohe zuɔ nayaŋa la kɛn' na, po'ohɛ ba'ahɛ ge yeti, a yehe, a keŋɛ ta doohe gɔbega nayaŋa la yehe. Se'em me n doohe gɔbega kɛn' na, a da le doohe kaŋa poan yehe, ge a keŋɛ ta doohe kayema poan yehe. 10Israel nɛreba ne han kɛn'ɛra na, naba la me ne lagom doohe ba kɛn' na. Ba han le ta yɛhera a me le doohe la ba yehe. 11De'enɔ la yuuma saŋa de'enɔ la woo poan, boom bo'olom la wan dɛna la zom wanɛ woo poan n pa'ahere lɔlega poan te zom wanɛ la pa'ahera peraa poan, ge ki se'e n wan pa'ahɛ pebibihe la poan la dela enŋa mɛŋa n bote a bo zom wanɛ se'em nya dekɛ kaam dugula dugula pa'ahɛ zom wanɛ woo poan. 12Naba la han ta yeti a kaanbɛ popeelom bo'olom bii nyɔ'an bo'olom bii sunma'ahom bo'olom bo Na'ayenɛ, ba yu'ɛ koleŋa sɛka n boe Yenɛ Yire la dapoore bɔba la bo en, te a kaanbɛ a nyɔ'an bo'olom la a sunma'ahom bo'olom la wo n ne pon kaanbera Vo'ohogo Daarɛ se'em la. A han pa'ahɛ a yehe, ge te ba lebehe yu' koleŋa la. 13Beere n yelegere woo bolika, naba wa wan tare pebila n de yuunɛ, te sɛla ka tara ka na kaanbɛ nyɔ'an bo'olom kaanbegɔ bo Na'ayenɛ. 14Daarɛ woo bolika a ne tare boom bo'olom n de zom somɔ wolehe seyoobe la kaam wola pa'ahɛ tare na bo' Na'ayenɛ, te la dɛna malema se'a n wan bɔna wuuha. 15Pebila la boom bo'olom la kaam la n wan bɔ'ɔra se'em n bala daarɛ woo bolika nyɔ'an bo'olom kaanbegɔ la poan. 16Daana Na'ayenɛ la yeti, Naba la han yehe sɛla a sɔ'ɔlom la poan bo a dayɔsɛka, la wan dɛna a dayɔa la a yaahe dene. 17Ge naba la han yehe sɛla a sɔ'ɔlom la poan bo la a yameŋa sɛka, la wan dɛna la yameŋa la dɛna lebe naba la nu'uhen. A dayɔɔhe ma'an te a wan dekɛ sɛla a sɔ'ɔlom la poan bo ba te la dɛna ba denɛ yɛ'ɛha. 18Naba la da to'e a nɛreba lɔgɔseko ge bahɛ ba aan a mɛŋa sɔ'ɔlom la poan bo a dayɔɔhe la, te la bahɛ te ba to'e mam nɛreba wa se'em sɔ'ɔlom. 19Te boraa wa nya tare mam doohe koleŋa sɛka n lame nayaŋa la logerɛ la kɛn' malemadoma toolom deto la n tagalɛ taaba la poan na bilam te mam behɛ nɛŋa bɔba na la nyɛ te zan'an kayema boe na. 20Te a yele mam yeti, Kalam te malemadoma la wan dogora lebehe yɔ' bo'olom la be'em kaanbegɔ bo'olom la, ge sɛn' boom bo'olom zom boroboro la, nya tare kɛn' bɔ' pooren la na, te ba dɛna fa'a dia nɛreba la nɛŋan. 21Te a tare mam yehe zenzakai la na, tare mam doohe ka loga anaahe la zan'an poan, te logerɛ woo poan, zenzaka bila n boe bini. 22Zenzaka la loga anaahe la wo zan'an zenzage bibihe te se woko dɛna santira pihinaahe, te se yaleŋa dɛna santira pihitan' n gan' se loga la zan'an zona taaba. 23Ge loga anaahe la me woo poan na, ba mɛ la kuga dangoone girihi kae, ge sɛ dan'andin'iha lamenɛ dangɔɔma girihi wa. 24Te boraa wa yele mam yeti, Dan'ahe sena poan te sɛba n tɔntɛ dia Yenɛ Yire la zuo la wan dogora nɛreba n tare woo wa'ana kaanbɛ la.

will be added

X\