Ezekiel 45

1Ho han ta tɔnta teŋa la bɔ'ɔra buuri la, ho aan ka zan'an kayema biŋe, te ka dɛna Na'ayenɛ ma'an zan'an, te ka woko dɛna santira tuha pihiyi' la anuu, te ka yaleŋa dɛna santira tuha pihiyi' ka zan'an woo dɛna Na'ayenɛ ma'an denɛ. 2Ya aan zen' kana wa poan zan'an n de mɔkɔ, te ka woko dɛna santira kɔbehe senuu, te ka yaleŋa me dɛna santira kɔbehe senuu, te zen' kana wa dekɛ mɛ Yenɛ Yire la, ge te fole n de santira pihinuu gan'arɛ kae ko loga la woo. 3Zen' sɛka te n wan aan te ka woko dɛna santira tuha pihiyi' la anuu, te ka yeleŋa dɛna santira tuha pia biŋe te ka dɛna Na'ayenɛ ma'an teŋa la poan te ho wan mɛ Yenɛ Yire wa, la ko Saraa la. 4Zen' kana wa n wan dɛna fa'a zen'an teŋa la woo poan ka wan dɛna la malemadoma sɛba n kɛn'ɛre Yenɛ Yire la poan zɛ'ɛta Na'ayenɛ nɛŋan tona bɔ'ɔra en la zen' kaŋa poan te ba wan mɛ malemadoma wa yiya, ge mɛ Yenɛ Yire wa me bilam mea. 5Ge le aan zen'an kayema, te kaŋa me woko dɛna santira tuha pihiyi' la anuu, te ka yaleŋa dɛna santira tuha pia, te zen' kana me dɛna Levidoma la n tone Yenɛ Yire la poan la me teŋa te ba kɛn'ɛra. 6Zen'sɛka n aan biŋe te ka dɛna Na'ayenɛ ma'an teŋa la kɛn' kelehe la zan'an, ho aan zen'enhe lamenɛ ka kae, te ka yaleŋa dɛna santira tuha tuha anuu, te ka woko dɛna santira tuha pihiyi' la anuu, te Israeldoma la wo sɔna zen'sene. 7Ge se'em n behere Israel la n wan sɔna zen'se'ehe woo n gan' Na'ayenɛ ma'an teŋa la, la nɛŋa la dapoore teŋhe la, la teŋse'ehe woo n lamenɛ beene la kae la, a sɔ'ɔlom la wan zona la buuri la sɔ'ɔlom la ze'ele nɛŋa bɔba ta du'ura dapɔya bɔba beene la. 8Teŋkana wa la beene la zen' kana n wan dɛna a denɛ Israel teŋa poan. Te sɛba n de mam nabiihe beha Israel teŋa wa kan le muguha Israeldoma wa, ge ba wan tɔnrɛ teŋa la bo Israel buuri buuri la woo. 9Daana Na'ayenɛ n yele se'em n wana: Israel nadoma wa la sake ya. Bahɛ ya gbirigere, la muguhego tooma wa bala, ge ete ya sɛla n nare, ge dɛna tontɔɔdaana. Na'ayenɛ yele se'em n bala. 10Nananawa, tare ya lɔgɔseko n tare magaha tebehom la, la wanɛ sɛka n tara magara la, la dokɔ sɛka n tare magara la te ba zona wo ban sone te ba zona se'em la magara. 11Wanɛ la dokɔ dela zonɔ boyena. Dokɔ kantɛ pete la dogorɔ pia, dokɔ kantɛ la n de magahe mɛŋka. 12Kpila zone mɛ la barega n pɔ'ɛ pihiyi'. Te kpila pihiyi' pa'ahɛ kpila pihiyi' la anuu, pa'ahɛ kpila pia la anuu, zone me la yologɔ. 13Hom n wan yɛhera sɛla bɔ'ɔra dela ki' wolehe seyoobe la dogokantɛ la poan, ge yɛhera mui la me wolehe seyoobe la dogokantɛ la poan. 14La han le dɛna la kaam me, la yehere la kaam wola dogokantɛ la woo poan. 15La han le dɛna la piihe, Israeldoma la piin sohen kɔbehe seyi' woo poan ho loe pehego, pekoŋo n dole boom bo'olom kaanbegɔ, la nyɔ'an bo'olom, la sunma'ahom bo'olom la wana na te la dɛna be'em duuhego. Daana Na'ayenɛ yele se'em n bala. 16Israel nɛreba zan'an, ne wan lagom la naba la, te ba kaanbɛ kaanbegɔ kona wa. 17La dela naba la tone te a bo nyɔ'an bo'olom, bii boom bo'olom la daam bo'olom, de'eŋɔ poan, bii ŋmarepaalehe de'eŋɔ, Vo'ohogo Dabeha la woo n boe Israel teŋa poan la. A wan bo be'em kaanbegɔ bo'olom, la boom bo'olom, la nyɔ'an bo'olom, la sunma'ahom bo'olom na, te la dɛna Israeldoma be'em duuhego. 18Daana Na'ayenɛ la yeti, Yuunɛ ŋmarega pɔhega daarɛ, ya nyɔkɛ lɔle te sɛsɛla ka tara ka, la ya ko pee Yenɛ Yire la. 19Malemadaana la ne dekɛ be'em duuhego duŋa la ziim boonhɛ Yenɛ Yire la kolehe la, ge boonhɛ kaanbegɔ daka la loga anaahe la, ge boonhɛ koleŋa bɔra n dole kɛn'ɛra Yenɛ Yire la bɔ'nɛŋai na la, 20Ŋmarekaŋa mea dabeha ayopɔe daarɛ, ho kelom doohe wana mea, pee se'em woo n ka baŋɛ ge tom be'em. Hom n wan pɛɛra Yenɛ Yire wa se'em n bala. 21Yuunɛ pɔhega ŋmarega la poan, ka dabeha pia la anaahe daarɛ, ya ne de'eŋ Azootole De'eŋɔ la, ge ɔbera boroboro se'ere n ka tare mi'ihom. 22Daan dena wa woo poan, naba la ne bo lɔlega, te ka dɛna a mɛŋa, la a teŋa la nɛreba la zan'an be'em duuhego duŋa. 23Dabeha ayopɔe de'eŋɔ la, daarɛ woo naba la wan bo lɔlehe seyopɔe la peraahe seyopɔe, te sɛla ka tara se, te la dɛna nyɔ'an bɔ'ɔra Na'ayenɛ, te daarɛ woo a wan bo la botela te la dɛna be'em bo'olom. 24Lɔlega woo la peraa woo, dɔle me la zom somɔ wanɛ, la kaam dugula. 25Dabeha ayopɔe de'eŋɔ la, n pɔhere ŋmarehe seyopɔe poan, dabeha pia la anuu daarɛ, a wan kelom bo la bala mea te la dɛna be'em bo'olom la nyɔ'an bo'olom la boom bo'olom kaanbegɔ la, te kaam la me pa'ahɛ.

will be added

X\