Ezekiel 43

1A nya tare mam paɛ nayaŋa sɛka n tɔ dapoore bɔba la nɔɔrɛn na. 2Bilam te Israel Yenɛ la soŋa ze'ele dapɔya bɔba la nɛɛ kena na, te la damena wo ko'kantɛ ko'mi'inhe n ŋmɛ'ɛre la, ge te teŋa nyagera la a soŋa la. 3Liligere se'ere te mam nyɛ ane mɛ wo liligere se'ere te n daa nyɛ en te a ye'ehe na te a sagom teŋa la, ge me la ana wo liligere se'ere te n daa bɔna Kebar Kolaa la zen'en ge nyɛ la. Te mam lu aliko. 4Na'ayenɛ soŋa la dapoore nayaŋa la wa'ana kɛn' Yenɛ Yire la poan la. 5Te Na'ayenɛ sea la zɛnkɛ mam na kɛn' zenzaka sɛka n boe poan la, te Na'ayenɛ soŋa nɛɛ Yenɛ Yire la poan zan'an. 6Boraa la n ze' la mam la, mam wom la nɛra ayema me n tɔgɔre Yenɛ Yire la poan ha bɔ'ɔra mam na. 7Yɛta mam yeti, Asaala bia wa, mam na'am koka la mam na'ma vo'ohogo zan'an n wana zan' sɛka te mam wan bɔna la n nɛreba Israeldoma wa kɔ'ɔn yɛ'ɛha n wana Israeldoma wa. Ba nadoma kan le kaanbera baga bii mɛteba nadoma sɛba n ki la zɛ'ɛta ganlona mam fa'a yu'urɛ wa. 8Ba mɛ ba yiya lɛm la mam yire wa, te dangoone ma'an beŋe mam yire wa la ba yiya la. Te ba ganlona mam fa'a yu'urɛ wa la ba toonfɛn'ɛha la te ba tona la, bala zuo te mam bahɛ te n sunsunyiim la di ba. 9Nananawa, ba han bahɛ baga la la ba nadoma la n ki te ba mɛ ba la, ge mam wan bɔna la ba bala yɛ'ɛha. 10Han dɛna hom, asaala bia wa, pa'alɛ Israeldoma wa hom n nyɛ Yenɛ Yire wa te de ana se'em la, te ba magahɛ dɛ, te la bo ba nyanɛ ba be'em la zuo. 11Nyanɛ han tare ba ba be'em la zuo, ho nya pa'alɛ ba Yenɛ Yire la n ane se'em, Yire la n wan gumehɛ se'em de deto la de nayahe la de sɛla woo n wan ana se'em la de malema la pa'alegɔ. Golegɛ yele ana bo ba te ba dɔla a ge doohe Yire la sɛla woo la de malema la zan'an. 12Yenɛ Yire la pa'alegɔ n wana: zoore la zuo wan dɛna toolom zen'en. Yenɛ Yire la pa'alegɔ n bala. 13Kaanbegɔ daka la n wan magahɛ se'em n dela santire woo wan dɛna la santire la nu'dibila la de teŋa wan dɛna la santire, te de yaleŋa dɛna santire, te baŋa n de tabatɛ kɔkɛ ka nɔɔrɛ kaanbegɔ daka wa n wan zona se'em n bala. 14Daka wan suga la zɛ'ɛlega n kagɛ sugumnɔɔren botan' zuo, te zɛ'ɛlega wa fehega la woko wan dɛna santire, te ka yaleŋa dɛna santira ayi', ge zɛ'ɛta zan'an n kanregɛ la ta paara kakere la zan'an n pɔ'ɛ la, la woko wan dɛna la santira anaahe, te yaleŋa la me dɛna santire. 15Te daka la mɛŋa woko dɛna santira anaahe, te iila anaahe sɛ daka la nɔya anaahe la zuo, zɛ'a saazuo. 16Daka wa dɛna mɔkɔ, te ka woko dɛna santira pia la ayi' te ka yaleŋa dɛna santira pia la ayi'. 17Te zɛ'ɛlega la kagɛ la me dɛna mɔkɔ, te ka woko dɛna santira pia la ayi', te ka yaleŋa me dɛna santira pia la ayi', te baŋa yaleŋa n de santire girigo kure forɛ ka, ge kure baŋa yeleŋa n de santira forɛ ka fehega la kae, te kura se'a n wan doohe zom ta paɛ daka wa la tɔ dapoore bɔba ha. 18Boraa wa yele mam yeti, Asaala bia wa, Daana Na'ayenɛ la yeti, Kaanbegɔ daka wa malema dela, daanse'ere daarɛ te ka wan maalɛ zɛ'a nya dɛna ba kaanbera nyɔ'an bo'olom, ka poan, ge ka'aha ziim yɛɛla ka la, 19Ya wan tara lɔlega na bo malemadoma la n de Zadok yizuo la, n yehe Levidoma la poan na la, n tone bɔ'ɔra mam la te ba kaanbera yelebe'ero sugurom kaanbegɔ. Daana Na'ayenɛ la n yele. 20Te ho ne poregɛ ka ziim la yeele daka la iila anaahe la, la zɛ'ɛlega la loga anaahe la, ge yeele baŋa la n kure kpamehɛ ka nɔɔrɛ la me zuo. Hom n wa pee ka se'em n bala, te ka nara ho kaanbera kaanbegɔ bini bɔ'ɔra mam. 21Ge ho ne tare yelebe'ero suguru kaanbegɔ lɔlega te ho ne ko la, yehe Yenɛ Yire la zen'an kayema, to nyɔ'. 22Dabeha ayi' daarɛ ho dekɛ botela te sɛsɛla ka tara ka, wa'ana kaanbɛ te ka dɛna yelebe'ero sugurom kaanbegɔ, te kaanbegɔ kona wa, wan pee kaanbegɔ daka wa, wo lɔlega la kaanbegɔ n wan pee ne ka se'em la. 23Ho han ne pee ka wana ba'ahɛ, ho nya kaanbɛ lɔlega, la peraa te sɛsɛla ka tara ba, 24nya tare ba nɛnɔ la na biŋe Na'ayenɛ nɛŋan, te malema nɛŋadoma eŋɛ yaarom yeele to poan, nyɔ' tɔ bo Na'ayenɛ. 25Dabeha ayopɔe poan, ba ne tara botela daarɛ woo na, te kaŋa dɛna yelebe'ero sugurom kaanbegɔ, ge tare lɔlega, la peraa te sɛsɛla ka tara ba wa'ana kaanbɛ. 26Dabeha ayopɔe la zan'an dela ba kaanbɛ kaanbegɔ daka la, te la pee ka, te ka tara toolom bonɔ. 27Ge dabeha ana wa ne han tole, dabeha anii la yɛ'ɛha la, malemadoma la nya ne wan tɔ'ɔha ya nyɔ'an bo'olom, la ya sunma'ahom bo'olom kaanbera kaanbegɔ daka wa zuo, te la ana mam nyɛlom. Daana Na'ayenɛ yele se'em n bala.

will be added

X\