Ezekiel 41

1A nya la tare mam yehe Yenɛ Yire la zenzakan na, wa makɛ kolehe dɔɔrɔ la, te koleŋa woo yaleŋa dɛna santira ayoobe. 2Te kɛn'a zen'en la yaleŋa dɛna santira pia, te dangɔɔma la n tare ba woo la yaleŋa dɛna santira anuu. A le makɛ Yenɛ Yire zenzaka la, te la woko dɛna santira pihinaahe, te yaleŋa la dɛna pihiyi'. 3A nya makɛ Yenɛ Yire la poan kolehe la nɔ'a la woo yaleŋa dɛna santira ayi'. Te kɛn'a zen'en la yaleŋa dɛna santira ayoobe, ge te dangoone se'a n tare ba woo yaleŋa dɛna santira ayopɔe. 4A makɛ Yenɛ Yire la poan, te la woko dɛna santira pihiyi', te yaleŋa dɛna santira pihiyi', te la yehera yeŋa na. A yele mam yeti, Saraa la n wana. 5A makɛ Yenɛ Yire la dangɔɔma la, te to dɛna santira ayoobe, te deto la n kae Yenɛ Yire la yaleŋa dɛna santira anaahe. 6Kenkɛlehe deto la boe dela sugumnɔɔren botan' ge togolom la taaba pihitan'. Ba mɛ la taatɛ kae Yenɛ Yire deto la ɛnberɛ la te la tara paŋa, ge ka mɛ taatɛ kae Yenɛ Yire la mea dangɔɔma. 7Deto la n kae Yenɛ Yire la yalege gana taaba mɛ. Sɛla n mɛ kae Yenɛ Yire la togolom la taaba, ton togolom se'em la to yaleŋa gane taaba la bala. Te kura ze'ele teŋa dɔla teŋasoka deto zɔna zuin la ha. 8Mam nyɛ taatɛ te dɛ mɛ kae Yenɛ Yire deto la zan'an. De woko dela kure seko te ba tara magara la boyoobe. 9Te deto la woo yeŋa dangɔɔma la yaleŋa dɛna santira anuu. Te fologo bɔna deto la, la Yenɛ Yire la teŋasoka, 10la malemadoma la deto dɛna santira pihiyi' kae Yenɛ Yire la zan'an. 11Deto la woo tare kolehe mɛ, kayema n boe zuɔ te kayema gɔbega, te ka yaleŋa zan'an kaara dɛna santira anuu. 12Deto la n tɔ Yenɛ Yire zenzaka la nɛŋan la yaleŋa dela santira pihiyopɔe. Te dangɔɔma zan'an kae la yaleŋa dɛna santira anuu, te dɛ woko dɛna santira pihiwae'. 13Te a makɛ Yenɛ Yire la, te dɛ woko dɛna santira kɔbega, ge te yire la zenzaka me yaleŋa dɛna santira kɔbega. 14Zenzaka la yaleŋa ze'ele dapɔya kaara yire la nɛŋan na dela santira kɔbega. 15A nya makɛ Yire la n tɔ zenzaka la, ze'ele dapoore la na, ta la gɔhɔrɔ bɔ'ɔrɔ la n boe a loga la, te la woko dɛna santira kɔbega. Poan la yeŋa la bɔpaka la n tɔ zenzaka la Yenɛ Yire la poan la, 16la koleŋa nɔɔrɛ la, la takole pegehe la, la gɔhɔrɔ bɔ'ɔrɔ la n kae bɔ'ɔrɔ totan' la sɛla woo ta pa'ahɛ la kolehe nɔɔrɛ la zan'an pin' mɛ la dɔɔrɔ. Zenzaka la, la dangoone la kɔ'ɔn zɔna takɔla la ha pin mɛ la dɔɔrɔ. 17Fole se'ere n gan' yeŋa nɔɔrɛn la Yenɛ Yire la poan teŋasoka la, la dangɔɔma la kɔ'ɔn kae la, 18dela kelompagehedoma la karekɔhe tiihe te ba yagom ze'ele. Karekɔhe tiihe wa la kelompagehedoma wa te ba ze'ele ba yagelɛ la taaba. Kelompagehedoma wa woo ayema tare la nɛhe seyi', 19te nɛŋa kayema dɛna nɛra nɛŋa tɔ. Karekɔŋa tia wa bɔbɔre deyema, te nɛŋa kayema me dɛna gbegenɛ nɛŋa tɔ karekɔŋa wa bɔbɔre deyema. Te ba yagom ba bala kɔ'ɔn kae Yenɛ Yire wa mum. 20Kɔ'ɔn ze'ele zenzakan la zɔna nɔɔrɛn la bɔba, kelompagehedoma la karekɔhe te ba yagom ze'ele Yenɛ Yire dangoone la zuo. 21Yenɛ Yire koleŋa dɔɔrɔ la dela mɔkɔ, te Saraa la me dɛna bala mea. 22Te dɔɔrɔ kaanbegɔ daka ze'a te ka woko dɛna santira atan', te santira ayi' me ana mɔkɔ ka kenkɛlehe la ka teŋa bɔbɔrɛ woo dela dɔɔrɔ. Te boraa la yele mam yeti, tebole la n bala ze'a Na'ayenɛ nɛŋan 23Yenɛ Yire la Saraa la zan'an tare la kolehe seyi' seyi'. 24Koleŋa woo tare la gotehe seyi' seyi' te la pagera. 25Te zenzaka wa tare kelompagehedoma la karekohe tiihe wa te se ze'a dangɔɔma zuo. Te dɔɔ puue bɔ'paka la. 26Bɔ'paka la dangɔɔma la loga tare la takole pegehe, te ba yagom karekɔhe tiihe ze'a ke la ke. Te Yenɛ Yire la deto la me tara sɛla n puue.

will be added

X\