Ezekiel 40

1Teŋa yuun zɔ loŋe teŋa la yuum pihiyi' la anuu pɔhega daarɛ, teŋa la yuun lu me dekɛ yuum pia la anaahe pɔhega ŋmarega dabeha pia la anaahe daarɛ n bala, daan dena wa daarɛ, te Na'ayenɛ nu'o daa paga n zuo, te a dekɛ mam keŋɛ bini. 2Mam n daa boe Na'ayenɛ liligere la poan la, mam nyɛ te Na'ayenɛ dekɛ mam me keŋɛ Israel teŋa poan, tare mam ta yagelɛ zoore woko zuo, te yiya bɔna zoore la gɔbega nu'o ana wo teŋkantɛ. 3Te a dekɛ mam paɛ bini te mam nyɛ te boraa boe bini kɔ'ɔn ana wo nyɔgom la zɛ'a nayaŋa la nɔɔrɛn yɛ a lɔgɔpeela, ge zanla dibe magahega a nu'en. 4Te boraa la yele mam yeti, Asaala dayɔa wa, dekɛ ho nini behɛ, ge la ho dekɛ ho toba me kelehe, ge la ho behɛ sɛla woo te n wan pa'alɛ ho wa soŋa ban tare ho wa'an kalom na se'ere zuo n bala. Hon nyɛ sɛla woo la, dekɛ la ho yele bo Israel yiredoma wa. 5Mam nyɛ te dangoone n mɛ kae Yenɛ Yire la mum. Dɔɔ la n boe boraa la nu'uhen la dela santira ayoobe woko. Te a makɛ dangoone la, te de yaleŋa dɛna santira ayoobe dɔɔ te de woko dɛna dɔɔ la. 6Te a nya keŋɛ paɛ nayaŋa la zen'an, te a nɛŋa tɔ dapoore bɔba ha. Te a zom nayaŋa la kura la zuo, tagalɛ bala zom nayaŋa la zuin ha makɛ koleŋa la dɔɔseto n se teŋa la, han sɛ tɔ te to sige teŋa se'em, te ba dɛna tabatɛ deyena. 7Ge te guruba gan'an zen'en la me saazuo woko dɛna santira ayoobe, te ko yaleŋa me dɛna santira ayoobe. Ge te lalehe se'ehe n mɛ gu'ureba gan'an zen'enhe la me kantɛ dɛna santira anuu, ge te koleŋa dɔɔrɔ la me to'ohɛ poan lalehe la me daa sɛ sige la santira ayoobe, 8te a nya magahɛ koleŋa nɔɔrɛn la n boe bɔpaka la poan la, 9te la dɛna santira anii, ge te dɔɔseto n sɛ teŋa la me kantɛ dɛna santira ayi'. Koleŋa la daa kɔ'ɔn tɔ Yenɛ Yire la poan na. 10Dapɔya bɔba nayaŋa poan na, sokazen'enhe setan' te ba mɛ go'ole zen'an woo. Sokazen'enhe wa daa zone la taaba, te lalehe se'a n mɛ ba toŋe taaba la me zuna taaba. 11Te a daa wa'ana makɛ nayaŋa sɛka n dole kɛn'ɛra poan koleŋa la na la te ka yaleŋa dɛna santira pia, ge te ka woko me dɛna santira pia la atan'. 12Ba daa mɛ dangoone giriga beŋe sokazen'enhe la woo nɛŋan te dangoone la woko dɛna santire, ge te sokazen'enhe la mɛŋa yaleŋa dɛna santira ayoobe. 13Ge te a daa le magahɛ sokazen'enhe la n zaaɛ la taaba se'em te la daa dɛna santira pihiyi', la anuu ze'ele soka zen'an kayema ta paara kayema. 14Ge a daa kɛn' nayaŋa la poan ha ta magahɛ lalese'ehe woo n toŋe nayaŋa la, te se yaleŋa dɛna santira pihiyoobe. A daa makɛ ba la bala ta paɛ penpanɛ la n gan to zenzaka la. 15Zɛ'ɛta koleŋa la nɔɔrɛn, ta paara bɔpaka la n lame dangoone se'ere la, wogolom daa dela santira pihinuu. 16Soka zen'enhe la lalehe se'ehe woo n daa toŋe taaba poan ha la daa tara la yogoro beha na wo bɔpaka la yogoro la zan'an daa behere la poan na. Ba daa ŋmɛ' la kpa'kpa' tiihe vɔntɔ bɔlombɔlehe eŋɛ la lehe la poan. 17Te a tare mam kɛn' zenzaka la poan. Te mam nyɛ te ba maale bɔ'ɔrɔ la dɔlɔga zen'enhe kae zenzaka la mum bɔ'ɔrɔ la zan'an daa dela bɔ'ɔrɔ pihitan' toŋe taaba. 18Ba daa mɛ to toŋe me la nayaŋa la, te to poan yaleŋa, la poan woko zuna taaba, teŋa nɔɔrɛn bɔna nɔɔrɛn bɔna n an bala. 19Te a le ze'ele teŋa nɔɔrɛn bɔba ha nayaŋa la poan ha, makɛ na paɛ koleŋa sɛka n dole kɛn'ɛra poan zenzaka la poan la pooren na, te pooren bɔba na la dɛna santira kɔbega, te zuɔ me dɛna santira kɔbega. 20Te a makɛ nayaŋa sɛka n boe zuɔ dɔla kɛn'ɛra po'ohegɔ zen'an zenzaka la poan na la woko, la ka yaleŋa zan'an. 21Guruba deto totan' n daa mɛ tabelɛ nayaŋa la nɔɔrɛ la nayaŋa la paka la woko, la ba yaleŋa zone me la nayaŋa sɛka te te paɛ yia la, ka woko daa dela santira pihinuu, ge te ka yaleŋa me dɛna santira pihiyi' la anuu. 22Yogoro seto woo te ba vomehɛ la bɔ paka la te ba eŋɛ nayaŋa la poan la, kpa'kpa' tia bɔrom bɔrehe la te ba ŋmɛ eŋɛ dangoone la poan la, me daa zone me la nayaŋa sɛka n tɔ dapoore bɔba ha bonɔ la, kura ayopɔe te ho ne zom ge kɛn', ge te nayaŋa bɔ paka la, bɔna koleŋa la pooren ha. 23Koleŋa n boe dola kɛn'ɛra zenzaka la poan na tɔ me la yeŋa koleŋa la n lebehe zuɔ nu'o bɔba la, wo yeŋa kole sɛka n boe dapoore te ka sɛka n boe poan dɔla kɛn'ɛra zenzaka la poan tɔ ka se'em na la. Te a ze'ele poan koleŋa la makɛ na paɛ yeŋa koleŋa la, te la zaanrɛ woko dɛna santira kɔbega. 24Te a tare mam keŋɛ gɔbega la, te mam nyɛ te koleŋa boe bini tɔ gɔbega la. Te a magahɛ gure ba deto la te ba mɛ' ta koleŋa la, la ka yogoro la, la bɔ paka la, te ba zuna la koleŋse'ehe seyi' te te magahɛ yia la. 25Koleŋa la tɔleka zen'an la, la yogoro la te ba vomehe la lehe la poan la, daa ane me wo koleŋsena la n ane se'em la, ka woko daa dela santira pihinuu ge te ka yaleŋa dɛna santira pihiyi', la anuu. 26Kura ayopɔe te ho ne zom ge nya kɛn', ge te bɔ paka bɔna koleŋa la pooren ha. Ge te kpa'kpa' vɔntɔ bɔrombɔrehe ŋmɛ gan'an lalese'ehe n toŋe koleŋa la poan. 27Poan zenzaka la me tare koleŋa n dole kɛn'ɛra ka poan me te kaŋa me tɔ gɔbega bɔba yeŋa koleŋa la. Koleŋa la woko dela santira kɔbega. 28Te a dekɛ mam doohe gɔbega bɔba yeŋa koleŋa la poan wa'ana kɛn' zenzaka la poan, ge me magahɛ gɔbega bɔba yeŋa koleŋa la, te kaŋa me zuna la koleŋse'ehe te a pon magahɛ la. 29Guruba deto la n mɛ tabelɛ koleŋa la, la lalehe se'ehe n mɛ toŋe koleŋa la, la ka bɔpaka la zan'an yaleŋa, la woka zone me la bana la. Ge te yogoro vomehɛ bɔna koleŋa la lalehe la poan beha yeŋa ha koleŋa la woko dela santira pihinuu, ge te ka yaleŋa dɛna santira pihiyi' la anuu. 30Bɔpagehe la te ba daa eŋɛ poan kolehe la nɔɔrɛn kae poan zenzaka la yaleŋa dela santira pihiyi' la anuu, ge te ba ko'olom me dɛna santira anuu. 31Koleŋkana wa bɔ paka la daa tɔ la yeŋa zenzaka la na, te ba ŋmɛ kpa'kpa' tiihe bɔrombɔrehe eŋɛ ka lalehe la poan, ge mɛ kura anii te ho ne zom ge nya kɛn'. 32Te a tare mam ta doohe poan zenzaka la koleŋa sɛka n lebehe dapoore bɔba la nya kɛn' poan zenzaka la poan na, ge makɛ koleŋa la nɔɔrɛ la te kaŋa me zona la koleŋse'ehe woo te a pon makɛ la. 33Guruba deto la lalehe se'ehe n mɛ toŋe koleŋa la koleŋa la bɔpaka la woo zone me la sɛba te a pon makɛ yia la. Ge te yogoro vomehɛ bɔna koleŋa la lalehe la poan beha yeŋa ha kolega la woko dele santira pihinuu, ge te ka yaleŋa me dɛna santira pihiyi' la anuu. 34Te koleŋa la bɔpaka la lebehe yeŋa zenzaka la bɔba na, te ba ŋmɛ kpa'kpa' tiihe bɔrombɔrehe eŋɛ ka lalehe la poan, ge mɛ kura anii te ho ne zom ge nya kɛn'. 35Te a nya tare mam doohe dapoore bɔba koleŋa la wa'an zuɔ bɔba koleŋa la poan na, makɛ koleŋkaŋa me. Te kaŋa me zuna la koleŋse'ehe te a pon makɛ yia la. 36Ka guruba deto la ka lalehe la ka bɔpaka la daa zone me woo koleŋse'ehe te a pon makɛ yia la ge te yogorɔ vomehɛ ka lalehe la poan wo koleŋsena la lalehe la n vomehɛ se'em la. Te ka woko dɛna santira pihinuu, ge te ka yaleŋa dɛna santira pihiyi' la anuu. 37Te koleŋa la bɔpaka la lebehe yeŋa zenzaka la bɔna na, te ba ŋmɛ kpa'kpa' tiihe bɔrombɔrehe eŋɛ ka lalehe la poan, ge mɛ kura anii te ho ne zom ge nya kɛn'. 38Deo n boe koleŋa sɛka woo n dole kɛn'ɛra poan zenzaka la poan, kɔ'ɔn lɛm la koleŋa la bɔpaka la, te ba eŋɛ koleŋa kɛn'ɛhe detonɔ taaba la woo poan, detonɔ poan te ba ne pee nyɔ'an bo'olom la. 39Tebola ayi' n zen'koleŋsɛka n dole kɛn'ɛra poan zenzaka la bɔpaka la kenkɛlehe seyi' la poan, Tebole ana zuo te ba kɔrɔna nyɔ'an bo'olom la be'em bo'olom la lebehe yɔ' bo'olom la. 40Tebola ayi' n ze koleŋa sɛka n boe zuɔ bɔba dɔla kɛn'ɛra na la, koleŋa la bɔpaka la yeŋa dangoone lɛm la kura la logerɛ deyema, te tebola ayi' me zɛ'a kura mea logerɛ deyema la me zen'an. 41Bala tebola anaahe n ze' koleŋa logerɛ deyema te tebola anaahe me zɛ'a logorɛ deyema, te ba zan'an dɛna tebola anii. Aŋa zuo te ba kɔrɔna kaanbegɔ dunhe la. 42Kuga tebola anaahe me boe dɛna nyɔ'an bo'olom lɔgɔrɔ la denɛ. Te tebole woo woko dɛna santire girigo, te yaleŋa dɛna santire la girigo te de saazuo woko dɛna santire. Tebola aŋa zuo te ba tara kaanbegɔ lɔgɔrɔ la nyɔ'an bo'olom lɔgɔrɔ la lɔgɔrɔ toseto biŋera. 43Kpa'ahe n tare nɔya ayi', ayema woo nu'dibila n dekɛ kpa' dangoone woo. Tebola la zuo te nɛnɔ man'aha la paga. 44Yeŋa koleŋa la nɔɔrɛn zenzaka la poan te bɔ'ɔrɔ toyi' bɔna bini, te bɔ'ɔ koyema nɔɔrɛ bɔna zuɔ tɔ' gɔbega, te koyema la me bɔna gɔbega tɔ' zuɔ. 45Te a yele mam yeti, Bɔ'seko n tɔ' zuɔ la dela malemadoma la n boe Yenɛ Yire la n sɔe, 46ge te seko n me boe zuɔ la dɛna malemadoma sɛba n tone kaanbegɔ daka la zuo la denɛ. Bana dela Zadok dayɔɔhe dɛna Levi yaahe ma'an la, n sontii ba lɛm bini tona bɔ'ɔra Na'ayenɛ. 47Te a nya makɛ zenzaka la te la dɛna sɛngehe senaahe zuna taaba, te ka woko dɛna santira kɔbega te ka yaleŋa me dɛna santira kɔbega. Te kaanbegɔ daka la zɛ'a Yenɛ Yire la nɛŋan. 48Boraa nya tare mam wa'an Yenɛ Yire bɔpaka, nya makɛ bɔpaka la dɔɔrɔ la te to dɛna santira anuu bɔbɔrɛ anaahe la zan'an. Koleŋa la nɔɔrɛn yaleŋa la dela santira pia la anaahe ge te dangɔɔma la me woko dɛna santira atan' bɔbɔrɛ anaahe la zan'an. 49Bɔpaka wa yaleŋa daa dela santira pihiyi', te pooren la nɛŋa la dɛna santira pia la ayi', kura te ho dɔla zɔna, ge te zen'a zɛ'a bɔbɔrɛ anaahe la zan'an.

will be added

X\