Ezekiel 39

1Hom, asaala dayɔa wa, porɛ bahɛ Gog zuo yeti, Daana Na'ayenɛ la n yele se'em n wana: Mam zaberɛ me la hom Gog naba se'em n de nabiihe naba sɔna Mesek la Tubal teŋhe wa. 2N wan bahɛ ho te ho kaalom a kaakaalulu, te n fe'e ho na. N wan tare ho ze'ele zuo beene la zuo na, la n bahɛ ho paɛ Israel zɔya wa. 3N wan kɔ ho gɔbega nu'o te ho kan ta'an zanle tanhɔ la, ge kɔ ho zuɔ nu'o te ho kan ta'an ve'e tanhɔ la tɛn. 4Ho wan lu Israel zɔya la zuo, hom, la ho pɛɛntɛɛnreba la, la teŋse'ehe woo pɛɛntɛɛnreba n boe la ho la zan'an wan ki Israel zoore la zuo. Ho wan lebege dia bo niihe la mɔen dunhe woo. 5Mam Daana Na'ayenɛ la n tɔgɛ. Ya wan lu ki' ya zan'an paberɛ la zuo. 6N wan mɔ'ɛ bugum bahɛ Magog la teŋse'ehe woo n boe zen'man'aherɛ poan la te ba di, bala te ba wan baŋɛ te mam n de Na'ayenɛ. 7N wan nɛɛ n fa'a yu'urɛ la pa'ale Israeldoma wa. Ba kan le tara vi kɛn'ɛha mam yu'urɛ wa, ge te teŋhe me baŋɛ te mam n seren de Na'ayenɛ Israel Fa'a Daana. 8La kene na la wan seren wa'ana eŋɛ. Daana Na'ayenɛ la n yele. Dabaherɛ la te n tɔgɛ de yele la n wana. 9Te Israel nɛreba nya wan yɛhera vaara zaba lɔgɔrɔ la, tɛ'ɛlehe kanra la bonbibihe zan'an toota ba bugum, tiini la pɛɛma la zaba gulumagu'uro la kana la zan'an. Ba wan va ba toorɛ bugum bala ta paɛ yuuma ayopɔe. 10Ba kan le nameha ba mɛhe ɛɛra samana zuto ɛɛra bontoola, bii ba kena mɔɔ poan ɛɛra dɔɔrɔ, ba wan tara la nɛreba la zaba lɔgɔrɔ ma'an toota ba bugum. Ba me wan lebehe gan sɛba n yuun fan' ba la, ge to'ohe sɛba me n yuun pon to'ohe ba lɔgɔrɔ la me lɔgɔrɔ. Daana Na'ayenɛ la n yele. 11De daarɛ n wan bahɛ te ba pin' Gog Israel poan lebehe bɔn'ɔn seko n boe sɛba n de eereba bɔna mɔgɔrɛ la dapɔya bɔba ha la. La wan gu' eereba sore. Se'ere n sɔe la, bo wan pin Gog, la a pɛɛntɛɛnreba la zan'an, la bilam. Bala ba wan yi'ira zen'an la yu'urɛ la Hamon Gog. 12Israel nɛreba wa wan dekɛ la ŋmarehe seyopɔe pin'ira nɛreba, ge te ba teŋa nya nyɛ ka mɛŋa. 13Israel nɛreba zan'an wan yehe na pin nɛreba wa, ge tɛnra dabaherɛ wa te mam nɛɛ n mɛŋa wa, te de dɛna Fa'a dabaherɛ bo ba, Daana Na'ayenɛ n yele. 14Ba wan degehɛ boraahe tooma, te ba duuhe Israel teŋa la. Sɛba wan dɔla teŋa la loga la sɛngehe poan zan'an, ge te sɛba me kɔ'ɔn pin'ira nɛresɛba n kelom ka pin la ŋmarehe seyopɔe la han ta ba'ahɛ, ba nya wan pɔhɛ ɛɛra teŋa la poan zan'an kae. 15Ban eere kaara teŋa la behera la, ba se'em han ta nyɛ nɛresaala konberɛ, a wan dekɛ sɛla daanlɛ bilam gura te yɔ tu'ureba la ta dekɛ tare ta pin' de teŋa Hamon Gog teŋa poan. 16Teŋa me wan ta bona bini te yi'ira ka Hamona. Ba wan ta piihe teŋa wa poan me bala. 17Asaala dayɔa wa, Daana Na'ayenɛ la n yele se'em n wana: Yi niihe se'ehe woo n ɛngere wa, la mɔen dunhe zan'an. Te ba ze'ele bɔbɔrɛ woo lagahɛ kaanbe kantɛ wa te n maahena te n bo ho wa poan na, kaanbe kantɛ wa n yeti ko kaanbɛ Israel zɔya wa zuto wa. Bilam te ya wan obe nɛnɔ, ge nyu ziim. 18Ya wan obe nɛresɛba n de panhedoma nɛnɔ, ge nyu teŋa wa zuo nabiihe ziim wo bo dela pesa'ara, la peraahe, la boohe, la lɔlehe ziim, te ba zan'an ze'ele Basan teŋa poan na kanregɛ se'em la. 19Kaanbe seko te n maahena te n kaanbɛ bo ya wa, ya wan vole kaam la bala ta sin', ge nyu' ziim me bala ta buge. 20Mam dia tebole la zuo, ya wan obe yiri la i ban'areba nɛnɔ, la panhedoma la pɛɛntɛɛnreba buuri buuri ta tegɛ. Daana Na'ayenɛ la n yele. 21N wan nɛɛ n paŋa teŋhe wa poan, teŋhe wa woo wan nyɛ namehe seko te mam dekɛ kɛn'ɛha ba, la nu'tebehe seko te mam dekɛ pagelɛ ba zuo. 22Daanden daarɛ yɛ'ɛha, Israel yire soma wan baŋɛ te mam n de ba Na'ayenɛ, la ba Yenɛ. 23Ge te teŋhe wa nɛreba me baŋɛ yeti Israel be'em zuo te ba zɔ loŋe ta dɛna da'aba teŋyoo poan la, la ban daa ka tare sakerɛ sera la mam la, bala zuo te mam daa sogɛ n nɛŋa la ba, ge dekɛ ba diŋdoma nu'uhen, te ba ko ba zan'an la so'a. 24Ba dɛngerɔ tooma la, la ba tuure la zuo te mam daa sogɛ n nɛŋa la ba, ge yɔ ba wo lan sone se'em la. 25Bala zuo la, Daana Na'ayenɛ n yeti se'em n wana: N nya wan tare Yakob ze'ele a da'aberɛ la poan lebena, ge la n zɔ Israel nɛreba wa ninbɔn'ɔn, ge mɔ'ɛ nini la n Fa'a yu'urɛ wa. 26Ba wan tamɛ ba fagehom la, la ban daa pa'ale mam te ba dagɛ birikindoma se'em, saŋsɛka te ba daa ne bɔna ba mɛŋa teŋa poan fai te sɛsɛla daa ka bɔna wan bahɛ ta ba paleŋa ɛngera la. 27N han tare ba ze'ele zen'enhe, la ba diŋdoma teŋse'ehe woo te ba yeregɛ ta bɔna se poan la lebe na, n wan doohe bama poan nɛɛ n fa'a naanɛ la teŋhe woo ninin. 28Bala te ba wan baŋɛ te mam de Na'ayenɛ ba Yenɛ, mam n daa yeregɛ ba te ba zɔ lomehe teŋhe. N me wan le kelom doohe lagahɛ ba zan'an lebe ba mɛŋa teŋa wa poan na, te ayena me kan yee yeŋa. 29N kan le malom dekɛ n nɛŋa sogɛ ba le yɛ'ɛha, n wan ka'ɛ n sea bahɛ Israel yiredoma wa zuo. Daana Na'ayenɛ la n yele.

will be added

X\