Ezekiel 38

1Te Na'ayenɛ tɔgɛ bo mam yeti, 2Asaala dayɔa wa, dekɛ ho nɛŋa tɔgelɛ Gog n boe Magog teŋa wa, la se'em n de nabia keema sɔna Mesek la Tubal la, la ho porɛ bahɛ a zuo, 3yeti, Daana Na'ayenɛ la n yele se'em n wana: Mam, Na'ayenɛ zabere mɛ la hom Gog wa, hom se'em n de nabia sɔna Mesek, la Tubal beha wa. 4N wan bahɛ te ho kaalom akaakaaluulu, te n dekɛ zim baŋa tuhe ho nɔɔrɛn la n ve'e ho ho pɛɛntɛɛnreba kooŋɔ la, la ho zaba yiri la, la ho zaba yiri ban'areba la n maahom ba zaba lɔgɔrɔ ze'a la ho pɛɛntɛɛnreba la n ka tare kantɛ maahom ba mɛhe ze'a, ge te ba zan'an so'ahe nyagera la poan yehe na. 5Persia la Kus la Put wan lagom bɔna la ba, zanla ba zaba tɛ'ɛlehe la ba zaba zuwama. 6Gomer me la a zabzabereba la Bet Togarma n bo zuo nu'o ha la a pɛɛntɛɛnreba, la teŋse'ehe woo n boe la ho la. 7Maahom ho mea, maahom, hom la pɛɛntɛɛnreba sɛba woo n boe la, te ho tole ba nɛŋa dɛna ba nɔ bɔ'ɔra. 8La kene na, ba wan yi ho te ho wa'ana zabɛ yuuma kene na, te ho wan keŋɛ ta gbirige teŋa te zaba tabelɛ sagom ka ge te ka nan bɔna bini tirihena, te sɛka nɛreba nɛre n yuun yeregɛ zan'an te ba doohe teŋhe poan lagahɛ ba na kɛn'ɛhe Israel zɔya la zuto n yuun lebege daboto la. Ba lagahe ba ze'ele teŋhe zo'e zo'e poan na, te ba nya kɛn'ɛra ba mɛhe teŋa poan te sɛsɛla ka daana ba. 9Hom, la ho pɛɛntɛɛnreba la, la teŋse'ehe woo pɛɛntɛɛnreba la n lagom bɔna la ho la, wan ihege damena bala wo sabeeo la, ya sobege bala wo saŋgbanɛ la, la ya zom ta pin teŋkana wa, la ka nɛreba la. 10Daana Na'ayenɛ la n yele se'em n wana: De daarɛ potɛn'ɛre se'ere wan wa'an ho poan na, te ho pan'ahɛ ho mea te nyanɛ kantɛ ta di ho. 11Ho wan yele ho mɛŋa yeti, ba teŋa la poan ka tare dangoone kae ka, bala n wan gbirige ba. Ba gbirigere dela naana, ba dela nɛresɛba n boe te sɛsɛla ka daana ba, ba dela nɛre n ka tɛn'ɛhe te zaberɛ wan sige ba zuo na, ba ka mɛ dangoone nayahe gu ba nehe. 12N wan fan' ge to'ohe ba lɔgɔrɔ la, n wan zabɛ la daboto seto te ba nan ka lebehe mɛ, ge te nɛreba la me daa yerom, te ba doohe lagahe ba teŋhe zo'e zo'e poan na, te ba tara dunhe, la lɔgɔrɔ kɛn'ɛra teŋa la teŋasoka. 13Sheba la Dedan la Tarsis koohereba la ba teŋbibihe la han ta nyɛ hɔ, ba wan sokera ho yeti, Ho ye'na te ho fan' to me bii? Ho lagahɛ ho pɛɛntɛɛnreba la, te ya fan' la to sanlenpeelega la to sanlema la ya pe'e te dunhe la pa'ahɛ tara ge la ya fan' te lɔgɔrɔ zo'e zo'e pa'ahɛ keŋɛ bii? 14Bala zuo la, asaala dayɔa wa, porɛ bahɛ Gog zuo yeti, Daana Na'ayenɛ la n yele se'em n wana: Dabeha aŋa poan la, ho kan tɛn'ɛhe yeti mam nɛreba Israeldoma wa nya boe la fai? 15Ho wan ze'ele zuɔ nu'o la zaan zanrɛ ha wa'ana, te teŋhe zo'e zo'e pɛɛntɛɛnreba ban' yiri dɔla ho poore, zo'e ka tara kanlɛ nya yɛ'a na. 16De daarɛ ho wan zom ta pin mam nɛreba Israeldoma wa wo saa saŋgbanɛ n pin saazuo se'em la. Gog, dabeha kene na, te n dekɛ ho tuluge la n nɛreba wa, la n doohe hom poan nɛɛ n mɛŋa pa'alɛ, te teŋhe baŋɛ te mam dela fa'a Na'ayenɛ. 17Daana Na'ayenɛ la n yele se'em n wana: Dagɛ hom yele te mam doohe n nɔtɔgɔheba poan Israel teŋa wa poan te ba tɔgɛ ho yele la? Saŋkaŋa ha la, ba daa porɛ me te la wan yuue ge te n ta dekɛ ho tuluge la ba. 18Sɛla n wan eŋɛ de daarɛ n wana, Na'ayenɛ la yeti, Gog han ta zabera la mam nɛreba Israeldoma wa, Mam sunsunyiim wan tulugɛ. 19N ze'ete la n iŋkerega, la n bugum sunsunyiim la poan yɛta te de daarɛ teŋmiiŋɔ kantɛ wan miim Israel teŋa la poan. 20Zim n boe ko'omen la niihe n ɛngere saazuo la mɔen dunhe la sɛla woo n de bonvɔa ɛɛra teŋa wa zuo la nɛresaala buuri woo n eere teŋa wa zuo gbi'ire me mam nɛŋan. Zɔya wa tulihe sɛ, tanhe wan wɔnrɛ, dangoone woo wan lu paɛ teŋa. 21Daana Na'ayenɛ la yeti, N wan maahom so'a yagelɛ Israel zoore woo zuo, te so'a la zabɛ la Gog. Boraa woo wan tuluge dekɛ a so'a ko' a sɔɔn Gog buuri la poan. 22N wan bahɛ te gankerɛ sige a zuo na la namehegɔ, la ziim ka'ahegɔ. N wan bahɛ te saakuga niira wo saa la bahera enŋa la a pɛɛntɛɛnreba la teŋse'ehe woo pɛɛntɛɛnreba n lagom bɔna la en la zuo. 23N eŋɛ la bala nɛɛ mam kpe'eŋo la n fa'a bɔŋa la, ge n wan pa'ale n mea nɛreba ninin. Bala te ba wan baŋɛ te mam n de Na'ayenɛ.

will be added

X\