Ezekiel 37

1Na'ayenɛ nu'o daa page n zuo mɛ, te a daa tare mam la Na'ayenɛ Sea paŋa poan yehe na, tare mam ta ze'ele bɔn'ɔn teŋasoka, te konba ma'an kɔ'ɔn perɛ bɔn'ɔn la poan bala men'ɛn. 2A tara mam dɔla kaara konba la, te mam nyɛ te konbe dela kobe kanra, zo'e gan'an bɔn'ɔn la poan kɔ'ɔn ba' ku'e paɛ bala. 3A soke mam yeti, Asaala dayɔa wa, konbe ana wa wan le ta'an nyɛ vom? Te mam lebehe yeti, Daana Na'ayenɛ, Hom ma'an n wan ta'an baŋɛ. 4Te a yele mam yeti, Porɛ bahɛ konba wa zuo yeti, kobe kɛ'ɛhe wa, kelehe ya Na'ayenɛ n yeti se'em. 5Daana Na'ayenɛ la n yeti kobe kɛ'ɛhe wa se'em n wana: N wan bahɛ te vo'ohom kɛn' ya poan, te ya vo'e. 6N wan dekɛ giinla tomehe ya, ge nya bahɛ te nɛnɔ pin ya, te iŋganɛ me nya taɛ, te n nya dekɛ vo'ohom kɛn'ɛhe ya, te ya vɔna. Bala te ya wan baŋɛ te mam n de Na'ayenɛ. 7Te mam porɛ wo ban bo mam nɔɔrɛ se'em la. Mam boe bini pota la, mam wom la lan damene kpage kpage te konba la vuta naara taaba, kobe dena ne toŋe dena, te dena me toŋe dena. 8Te mam behɛ te giinla la nɛnɔ pin koba la te iŋnaanɛ me pin taɛ, ge vo'ohom ka bɔna ba poan. 9Te a yele mam yeti, Porɛ bahɛ vo'ohom zuo, asaala dayɔa wa, porɛ yeti, Daana Na'ayenɛ la n yele se'em n wana: Vo'ohom wa, ze'ele sabeeo loga anaahe wa poan, la ho wa'ana vo'ohe eŋɛ nɛresɛba n ki gan'an wa poan te ba vo'e. 10Te mam porɛ wo ban bo mam nɔɔrɛ se'em la, mam nyɛ te vo'ohom boe ba poan, te ba vaɛ ihege ze'ele ba naba zuo, kɔ'ɔn dɛna pɛɛntɛɛnreba n zo'e ka tara kanlɛ. 11Te a yele mam yeti, Asaala dayɔa wa, konba wa dela Israel teŋa zan'an n bala. Ba yeti ba mɛhe yeti, Tomam dela konbe kɛ'ɛhe, ba ŋmaɛ to bahɛ, te ka le tara potɛn'ɛrɛ sɛsɛla poan. 12Bala zuo la porɛ bahɛ ba zuo yeti, Daana Na'ayenɛ la n yele se'em n wana: Mam nɛreba wa, n yeti n yu'uhɛ la ya yɔɔrɔ la lan ve'e ya yehe na, n wan tare ya lebe Israel teŋa wa poan na le yɛ'ɛha. 13Bala te ya wan baŋɛ te mam n de Na'ayenɛ, n han ta vugehe ya yɔɔrɔ la tare ya yehe na, mam nɛreba. 14N wan dekɛ n sea kɛn'ɛhe ya te ya vɔna, te n bahɛ te ya lebehe zin'ire ya mɛŋa teŋa wa poan. Bala te ya wan baŋɛ te mam n de Na'ayenɛ. Mam tɔgɛ bala la n me pon tom de me. Na'ayenɛ la n yele. 15Te Na'ayenɛ tɔgɛ bo mam yeti, 16Asaala dayɔa wa, dekɛ dɔɔ pareba laka, la ho golehɛ eŋɛ ko poan yeti, Yuda teŋadoma la Israeldoma sɛba n lagom naɛ la en bɔna la yele. Ge la ho le dekɛ koyema la ho golehe eŋɛ koŋɔ me poan yeti, Yosef yaahe Ephraimdoma la Israeldoma sɛba n naɛ la en bɔna la me yele. 17La ho dekɛ to nya ta' taaba, te ba dɛna dɔɔyeŋɔ ho nu'uhen te ho zanla. 18Ho teŋa nɛreba la han soke ho yeti ho kan pa'ale tɔ wana wa vɔnrɛ? 19Yele ba yeti, Daana Na'ayenɛ la n yele se'em n wana: N yeti n to'e la Yosef doore la n boe Epraimdoma nu'uhen la, la Israeldoma sɛba woo n lagom naɛ la Epraim bɔna la, la n tare ba na naɛ la Yuda doore la, te ba lebege doyenɛ, bɔna nu'o koyena poan. 20Zanla dɔɔ paraba laka la toyi' la te golehɛ eŋɛ to poan la te ba nyɛta. 21La ho yele ba yeti, Daana Na'ayenɛ la n yele se'em n wana: N wan fɔ Israeldoma wa n kɛn'ɛre teŋsɛka woo poan lebena. N wan doohe lagahe ba ban boe zen'an woo tare ba lebe ba mɛŋa teŋa wa poan na. 22N wan eŋɛ ba te ba dɛna teŋa kayena ba teŋa mea poan, Israel zoore wa zuo. Naba ayena n wan behera ba zan'an, ba kan le malom dɛna teŋhe seyi' bii ba le yelege dɛna sɔ'ɔlom boyi'. 23Ba kan le malom tara ba baga la, bii ba yelefɛn'ɛha se'a te ba maale la ba nu'uhe la, bii ba tara ba toonbe'ero la woo poan bahɛ. Ba wan dɛna mam nɛreba, te mam me dɛna ba Yenɛ. 24Mam tontona David n wan dɛna naba sɔna ba zan'an baha, enŋa n wan dɛna ba zan'an duŋkeena. Ba wan dɔla mam nɔze'elego la mam malema la soŋa soŋa. 25Ba wan kɛn'ɛra teŋsɛka te mam yuun dekɛ bo n tontona Yakob la, teŋsɛka n de ya sɔyaabdoma teŋa wa poan. Bama, la ba kɔma, la ba kɔma me kɔma, wan sɔna ka kɔ'ɔn yɛ'ɛha mam tontona David n wan dɛna naba kɔ'ɔn yɛ'ɛha. 26N wan biŋe sunma'ahom nɔbiŋere la en, te de dɛna nɔbiŋere se'ere n kan tare ba'ahegɔ. N wan sɛ' ba zin'ire teŋa la poan, ge eŋɛ ba te ba wi'ɛ pa'ahɛ ba kanlɛ poan, te n nya dekɛ n po'ohegɔ zen'an la bahɛ te ko bɔna ba teŋasoka kɔ'ɔn yɛ'ɛha. 27Mam bɔŋa zen'an la wan bɔna la ba. Mam wan dɛna ba Yenɛ, ge te bama me dɛna n nɛreba. 28Bala te teŋhe la wan baŋɛ te, Mam Na'ayenɛ n bahɛ te Israeldoma dɛna fa'a. Mam toolom zen'an la han bɔna ba teŋasoka, nɛreba wan mi' bala.

will be added

X\