Ezekiel 36

1Asaala dayɔa wa, porɛ bahɛ Israel zɔya wa zuo, porɛ yeti, Israel zɔya wa, kelehe ya Na'ayenɛ yetɔgom wa. 2Daana Na'ayenɛ la n yele se'em n wana: Ho diŋdaana la yeti ya, Ɛnhɛɛn, teŋkɛka la, la zɔya la nya dela tomam sɔ'ɔlom. 3Bala zuo la porɛ yeti, Daana Na'ayenɛ la n yele se'em n wana: Ban digere ho, ge kɔ'ɔn sagona ho bɔbɔrɛ woo te ho ka tara soka zen'an ge nya lu teŋhe woo nu'uhen dɛna ba sɔ'ɔlom la, nya lebege nɛra woo bonkɛhɛla, la nɛra woo bonyaalega te ba tɔgɔra ge yaala ho ban bote se'em la. 4Bala zuo, Israel zɔya wa, wom ya Daana Na'ayenɛ la n yeti se'em. Daana Na'ayenɛ la n yeti Israel zɔya kanra, la zɔya bibihe la, la va'am, la bɔn'ɔrɔ, la zen'se'ehe n sagom lebege daboto, la teŋse'ehe te ba fan' se lɔgɔrɔ te nɛreba la zɔ yehe se poan ge bahɛ se, te se'ehe n kae ya bahɛ teŋasoka kɛhera ya la se'em n wana. 5Daana Na'ayenɛ la n yele se'em n wana: Mam ze'ele la n sunsunyiim la poan tɔgɛ bahɛ teŋse'ehe n gee la zuo, la Edom teŋa wa woo zuo. Se'ere n sɔe la poorɛ pee me te ba dekɛ ba potɔɔ la ba fan' mam teŋa la te ba dɛna ba sɔ'ɔlom, te ba ta'an fan' ka bɔn'ɔrɔ la. 6Bala zuo la porɛ bahɛ zɔya la zɔya bibihe la samana la bɔn'ɔrɔ la zuo yeti, Daana Na'ayenɛ la n yele se'em n wana: Mam ze' la n nyuunre, la n sunsunya poan tɔgɔra. Se'ere n sɔe la teŋhe la ba namehe ya gaŋɛ me. 7Bala zuo la, Daana Na'ayenɛ la n yele se'em n wana: Mam dekɛ n nu'o ŋmɛ'ɛra teŋa ge pɔta yeti, teŋse'ehe woo n kae ya bahɛ teŋasoka la me wan nyɛ ya namehegɔ la, la kɛhega la taaba. 8Ge yamam Israel zɔya wa, n wan bahɛ te ya tɛn yila, la ya wom dia bo mam nɛreba Israeldoma wa, se'ere zuo la kan yuue la ban lebe kule ba teŋa ka'lam na. 9N fabele ya yele ma, n wan sure bahɛ ya, ge zɔ ya ninbɔn'ɔn, ba wan le malom kɔ ya zuo borɛ dia, 10n wan bahɛ te nɛresɛba n kɛn'ɛre ya zuo la wi'ɛ pa'ahɛ, n wan bahɛ te nɛresɛba n kɛn'ɛre Israel teŋa wa poan la malom wi'ɛ pa'ahɛ. Ban wan le malom kɛn'ɛra ba teŋhe la poan ge malom mɛ zen'se'ehe woo n gbi lebege doboto la. 11N wan bahɛ te nɛreba la dunhe malom wi'ɛ pa'ahɛ kɛn'ɛra ho poan, ba me wan malom wi'ɛ pa'ahɛ ka tara kanlɛ. N wan bahɛ te nɛreba le malom wa'ana zin'ire ho poan, ge te ho le malom tara wo lan yuun pon ana se'em la, la nya wan gaŋɛ bala. Bala te ya wan baŋɛ te mam n de Na'ayenɛ. 12N wan bahɛ te nɛresaaleba, bɔna ho poan. Ba wan sɔe sɔna ho, te ho dɛna ba sɔ'ɔlom, ho kan le fan' ba kɔma la yɛ'ɛha. 13Daana Na'ayenɛ la n yeti se'em n wana: Nɛreba n dole tɔgɔra te ho koore la nɛreba ge faanra ho teŋa la kɔma sɔdoma la zuo. 14Ho kan le ko nɛra, bii ko ho teŋa la kɔma. Daana Na'ayenɛ la n yele. 15Ho kan le wom te nɛreba wa nyiihera ho sunsunya, bii ho le nyɛ te ba kɛhere hɔ, bii ba le eŋɛ ho te ho lu. Daana Na'ayenɛ la n yele. 16Te Na'ayenɛ le tɔgɛ bo mam yeti, 17Asaala dayɔa wa, Israel teŋa nɛreba wa n yuun nan kɛn'ɛre ba mɛŋa teŋa poan la, ba yuun dekɛ la ba mɛŋa aŋa, la ba etegɔ ganlom teŋa la, ba mɛŋa aŋa la yuun ane me wo pɔka n nyɛ ka peere la mam nɛŋan. 18Bala zuo te mam yuun ka'ɛ n sunsunyiim bahɛ ba zuo na la ban ka'ahɛ ziim ba teŋa la poan ge yuun le ganlom ka la ba baga la. 19Mam n yeregɛ ba teŋa wa zuo, te ba yeregɛ bɔna teŋa woo poan mam gankɛ ba doohe la ba aŋa la, la ba etegɔ la. 20Ban daa yeregɛ bɔna zen'an woo teŋa wa zuo, ba fakere la mam yu'urɛ, sɛla n sɔe la teŋhe la nɛreba ne yɛta ba yeti, dagɛ bana n de Na'ayenɛ nɛreba la, ge te bene n nya eŋɛ te ba ka kɛn'ɛra ba mɛŋa teŋa la poan? 21Mam fabele n fa'a yu'urɛ la te Israel nɛreba wa sagona de nɛreyooro wa teŋhe la poan la me. 22Bala zuo la yele Israeldoma wa yeti ya, Daana Na'ayenɛ la n yele se'em n wana: Israeldoma wa, la dagɛ yamam zuo te n yeti n tom toondena wa, la dela mam fa'a yu'urɛ la te ya fakera dɛ teŋse'ehe woo poan te ya keŋɛ la zuo. 23N wan pa'alɛ mam fa'a yu'urɛ la te ya fakera de teŋse'ehe woo poan te ya bɔna la baŋɛ n ane se'em yu'urɛ se'ere te ya fakera bɔ'ɔra teŋhe la. Bala te teŋhe la wan baŋɛ te mam n de Na'ayenɛ. Daana Na'ayenɛ la n yele, n han doohe ya poan pa'ale te mam dela fa'a Na'ayenɛ ba ninin, nɛreba la wan baŋɛ te mam n de Na'ayenɛ. 24N wan tare ya ze'ele teŋhe la poan yehe na. N wan lagahe ya yan boe teŋse'ehe la poan woo tare ya lebe na kɛn'ɛhɛ ya mɛŋa teŋa wa poan. 25N wan dekɛ ko'somɔ miihe ya zuto te ya lebege nɛresoma, n wan pee ya ya toondɛngerɔ la, la ya baga kaanbegɔ la te ya dekɛ dɛngɛ ya mɛhe la bahɛ. 26N wan bo ya sunpaalɛ, ge dekɛ sɛ paalega kɛn'ɛhe ya. N wan foe suunre se'ere n de kugure la ya poan bahɛ, ge tee dekɛ suunre se'ere n de sunpogehegɔ kɛn'ɛhe ya poan. 27N wan dekɛ n sea kɛn'ɛhe ya poan te ka tara ya te ya dɔla mam malema la, ge man'ɛn ya mɛhe dɔla n nɔze'elego la. 28Ya wan bɔna teŋsɛka te mam yuun dekɛ bo ya sɔyaabdoma la poan, ya wan dɛna mam nɛreba, ge te ma me dɛna ya Na'ayenɛ. 29N wan fan' ya ya dɛngerɔ tooma la woo poan bahɛ. N wan bahɛ te ki maalɛ ya teŋa la poan zo'e, n kan bahɛ te kom le sige ya zuo na. 30N wan bahɛ te ya tiihe malom wom dia pa'ahɛ, ge te di sɛka woo te ya borɛ la me malom maalɛ gaŋɛ bala, te kom yanɛ da di ya teŋhe la ninin. 31Bala te ya nya wan tɛɛn toonbe'ero la, la ya pototooma la, te la ya nɛŋan la toondɛngerɔ seto te ya tom la. 32Mam bote te ya baŋɛ yeti dagɛ yamam zuo te n eta wana wa, Daana Na'ayenɛ la n yele Israeldoma wa, bahɛ ya te valom kɛn' ya, te ya sura zuto ya toonfɛn'ɛha la zuo. 33Daana Na'ayenɛ la n yele se'em n wana: De daarɛ, n duuhe ya ya yelebe'ero la woo poan bahɛ, n malom maalɛ ya teŋhe la, ge malom mɛ zen'se'ehe woo te ba gbi te se lebege dabooro la. 34Teŋsɛka n gai te nɛreba tɔla ge beha ka te ka lebege daboo la, nɛreba wan zin'an ka poan ge kɔɔra ka le yɛ'ɛha. 35Nɛreba wan le ta yɛta te teŋa la n yuun de daboo la n nya bala le ana wo Na'ayenɛ mɛŋa va'am wa. Ka teŋse'ehe woo te ba gbi se yiya bahɛ te la gan'an dɛna daboo la n nya bala te nɛreba malom mɛ yiya kɛn'ɛhe kɛn'ɛhe nya kɛn'ɛra bini wa. 36Bala te teŋse'ehe n gee lɛm ya la wan baŋɛ yeti la dela mam Na'ayenɛ mɛŋa n malom mɛ teŋa wa n da gbi gan'an wa, ge malom porɛ sɛla woo n lebege daboo la Na'ayenɛ la n tɔgɛ n wan tom de. 37Daana Na'ayenɛ la n yele se'em n wana: N wan le kelehe Israel nɛreba wa fabelegɔ wa ge la n maalɛ yele dena wa bo ba. N wan bahɛ te ba nɛreba la wi'ɛ wo piihe la, 38Ba wan wi'ɛ zona wo ban ne tare kaanbegɔ piihe wa'an kaanbegɔ saŋa Yerusalem teŋa na te se ne zo'e zona se'em la. Bala te teŋsɛka te ba yuun gbi bahɛ la wan perɛ la nɛreba. Bala te ba wan baŋɛ te mam n de Na'ayenɛ.

will be added

X\